قۇجات جوباسى «الماتى قالاسىن دامىتۋ ورتالىعى» اق سايتىندا جاريالانعان.
الماتى قالاسىنىڭ اكىمدىگى مەن «الماتى قالاسىن دامىتۋ ورتالىعى» اق «الماتى قالاسىن دامىتۋدىڭ 2025 جىلعا دەيىنگى جوسپارىنىڭ نەگىزگى باسىمدىقتارى جانە 2030 جىلعا دەيىنگى ورتا مەرزىمدى پەرسپەكتيۆالارى» اتتى جوبانى جالپى تالقىلاۋعا ۇسىندى، دەپ حابارلايدى Almaty-akshamy.kz
«قۇرمەتتى الماتىلىقتار!
سىزدەردىڭ تالقىلاۋلارىڭىزعا «الماتى قالاسىنىڭ 2025 جىلعا دەيىنگى دامۋ جوسپارىنىڭ نەگىزگى باسىمدىقتارى جانە 2030 جىلعا دەيىنگى ورتا مەرزىمدى پەرسپەكتيۆالار» جوباسىن تالقىلاۋعا ۇسىنامىن.
ءبىز قالانىڭ بولاشاق دامۋىن ءار ءتۇرلى سالاداعى بەلسەندىلەرمەن جانە ساراپشىلارمەن تالقىلادىق، تۇرعىندارىمىزدىڭ مىڭداعان وتىنىشتەرىنە تالداۋ جاسادىق، قالا ءومىرىنىڭ بارلىق سالالارىنىڭ جاعدايىن زەرتتەدىك.
بۇل – الماتىنى جاقسى بىلەتىن جانە جاقسى كورەتىن، ونىڭ وزگەرۋىن، ودان ءارى دامۋىن جانە ساپالى ءوسۋىن قالايتىن 40-تان استام تاۋەلسىز ساراپشىلار جۇمىس جاساعان ءبىزدىڭ ۇسىنىستارىمىز.
ءبىز الماتىلىقتار ءۇشىن ناقتى جانە سەزىلەتىن ناتيجەلەر بەلگىلەنگەن الماتى قالاسىن دامىتۋ جوسپارىنىڭ نەگىزگى باسىمدىقتارىن سىزدەرگە ۇسىنۋعا تىرىستىق. ءبىزدىڭ باستى ماقساتىمىز – مەگاپوليستىڭ بارلىق تۇرعىندارىنىڭ ءومىر ءسۇرۋ دەڭگەيىن ساپالى ارتتىرۋ. بۇگىن سىزدەرگە اعىمداعى احۋال مەن الداعى سىن-تەگەۋرىندەردىڭ شىنايىلىعىن ەسكەرە وتىرىپ، الماتىنىڭ 2030 جىلعا دەيىنگى دامۋ جولدارى مەن پەرسپەكتيۆالارى ناقتىلى ۇسىنىلدى.
الماتى قالاسىنىڭ 2025 جىلعا دەيىنگى دامۋ جوسپارىن جانە ونىڭ ورتا مەرزىمدى پەرسپەكتيۆالارىن ازىرلەۋ كەزىندە قاراستىرىلاتىن جانە ەسكەرىلەتىن تۇسىنىكتەمەلەرىڭىز بەن يدەيالارىڭىزدى الۋ ءۇشىن وسى ۇسىنىستاردى 2022 جىلدىڭ 1 شىلدەسىنە دەيىن سىزدەردىڭ تالقىلاۋلارىڭىزعا ۇسىنامىز»، -دەدى الماتى قالاسىنىڭ اكىمى ەربولات دوسايەۆ.
ول ءۇشىن مەگاپوليس باسشىسى قالا تۇرعىندارىنان almatydc.kz سايتىندا ءوز پىكىرلەرى مەن يدەيالارىن ءبولىسۋدى سۇرايدى.
ءوز پىكىرىڭىزبەن ءبولىسىڭىز جانە 1 شىلدەگە دەيىن كەرى بايلانىس قالدىرا الاسىز، سىلتەمە وسىندا.
قۇجات جوباسى «الماتى قالاسىن دامىتۋ ورتالىعى» اق سايتىندا جاريالانعان. قۇجاتتا قوردالانعان ماسەلەلەردى، حالىقارالىق تاجىريبەنى، الەۋمەتتىك زەرتتەۋلەردىڭ ناتيجەلەرىن، الماتىنىڭ تاريحي ءرولىن، ونىڭ مارتەبەسىن، ەكونوميكالىق الەۋەتىن جانە اعىمداعى احۋالدى ەسكەرە وتىرىپ انىقتالعان قالانى دامىتۋدىڭ قىسقا جانە ورتا مەرزىمدى باسىمدىقتارى كورسەتىلگەن. قۇجاتتىڭ مازمۇنى الماتى قالاسىن دامىتۋدىڭ 2025 جىلعا دەيىنگى جوسپارى مەن ونىڭ 2030 جىلعا دەيىنگى ورتا مەرزىمدى پەرسپەكتيۆالارى، الماتىنىڭ 2040 جىلعا دەيىنگى باس جوسپارى جانە الماتى اگلومەراسياسىن 2030 جىلعا دەيىن دامىتۋدىڭ كەشەندى جوسپارى سىندى جوبالاردى ودان ءارى پىسىقتاۋ مەن قابىلداۋ ءۇشىن نەگىزگە الىنباق.
جوبا 7 بولىمنەن تۇرادى – «جايلى قالالىق ورتا»، «تۇراقتى ەكونوميكالىق ءوسۋ»، «باسقارىلاتىن ۋربانيزاسيا»، «الەۋمەتتىك ورنىقتىلىق پەن تۇراقتىلىق»، «جاسىل الماتى»، «سمارت سيتي»، «ءقاۋىپسىز قالا».
قۇجاتتا كورىنىس تاپقان باستامالاردى ىسكە اسىرۋ قالانىڭ ۇيلەسىمدى كەشەندى دامۋىنا قولجەتكىزۋگە مۇمكىندىك بەرەدى، ونىڭ باستى ماقساتى جايلى، ينكليۋزيۆتى جانە ءقاۋىپسىز قالالىق ورتا قۇرۋ بولىپ تابىلادى.
قۇجاتتى ازىرلەۋگە ءتۇرلى قىزمەت سالالارىنان 40-تان استام تاۋەلسىز ساراپشىلار، ونىڭ ىشىندە ەكونوميستەر، ۋربانيستەر، ەكولوگتار، قالانى جوسپارلاۋشىلار، اقپاراتتىق تەحنولوگيالار سالاسىنداعى ماماندار، قوعام قايراتكەرلەرى، كاسىپكەرلەر جانە باسقالار قاتىستى.
جوبانى قوعامدىق تالقىلاۋعا قالانىڭ ءاربىر تۇرعىنى قاتىسا الادى، 7 ءبولىمنىڭ ءارقايسىسى بويىنشا پىكىر ءبىلدىرىپ، وي بولىسۋگە بولادى. جينالعان دەرەكتەر «الماتى قالاسىنىڭ 2025 جىلعا دەيىنگى دامۋ جوسپارىن جانە ونىڭ ورتا مەرزىمدى پەرسپەكتيۆالارىن» تالقىلاۋ جانە پىسىقتاۋ كەزىندە كەشەندى تۇردە وڭدەلىپ، پايدالانىلاتىن بولادى.
سونداي-اق، سايتتا قۇجاتقا سىلتەمەنى الەۋمەتتىك جەلىلەردە جانە مەسسەندجەرلەردە ءبولىسۋ مۇمكىندىگى قاراستىرىلعان.
قۇجات 1 شىلدەگە دەيىن جالپى تالقىلاۋدا بولادى.