قالا بيۋدجەتىن ناقتىلاۋ جوباسى ازىرلەنىپ جاتىر.
الماتىدا بيزنەس پەن ازاماتتارعا كومەك كورسەتۋ ءۇشىن قالالىق بيۋدجەت قايتا قارالدى، دەپ حابارلايدى Almaty-akshamy.kz قازاقپاراتقا سىلتەمە جاساپ.
الماتى قالاسى ءماسليحاتىنىڭ كەزەكتەن تىس XIV سەسسياسى ءوتتى. قالانىڭ اكىمشىلىك جانە كۇشتىك قۇرىلىمدارىنىڭ تىنىس-تىرشىلىگىن قامتاماسىز ەتۋ ماسەلەلەرىن جەدەل شەشۋ ءۇشىن، سونىمەن قاتار، كاسىپكەرلەرگە كەلتىرىلگەن زالالدى وتەۋ جانە بيزنەس سەكتورىن ىنتالاندىرۋ ماقساتىندا ءماسليحات اكىمدىكتىڭ باستاماسى بويىنشا الماتى قالاسى بيۋدجەتىنە ناقتىلاۋ جۇرگىزدى.
جالپى جەرگىلىكتى بيۋدجەتتى ناقتىلاۋ 2021 جىلعى بيۋدجەتتىڭ كىرىس بولىگىن 30 ملرد تەڭگە سوماسىنا اسىرا ورىنداۋ ەسەبىنەن جۇرگىزىلەدى.
ءبولىنىپ وتىرعان قارجى مەملەكەت باسشىسىنىڭ قالانى تەزىرەك قالپىنا كەلتىرۋ، حالىق پەن بيزنەس نىساندارىنا كومەك كورسەتۋ جونىندەگى تاپسىرمالارىن ىسكە اسىرۋ ماقساتىندا مىنانداي شىعىستارعا باعىتتالادى:
- تارتىپسىزدىك بارىسىندا زارداپ شەككەن كاسىپكەرلەرگە كەلتىرىلگەن زالالدى وتەۋ - 5 ملرد تەڭگە؛
- شوب سۋبەكتىلەرى ءۇشىن كوممۋنالدىق شىعىستاردى تولەۋ بويىنشا شىعىنداردى سۋبسيديالاۋعا (3 اي مەرزىمگە) – 1،5 ملرد تەڭگە؛
- حالىقتى جۇمىسپەن قامتۋ باعدارلاماسىن قارجىلاندىرۋ اياسىندا قوعامدىق جۇمىستارعا جۇمىسقا ورنالاستىرۋ ءۇشىن 6 مىڭ ادامعا 3،3 ملرد تەڭگە قاراجات قاراستىرۋ جوسپارلانۋدا؛
- شاعىن جانە ورتا بيزنەس سۋبەكتىلەرىن جەڭىلدىكپەن نەسيەلەۋ تەتىگىن ەنگىزۋگە 6،3 ملرد تەڭگە ءبولىندى؛
- قۇقىق قورعاۋ ورگاندارى قىزمەتكەرلەرىنىڭ ماتەريالدىق-تەحنيكالىق جابدىقتالۋىن نىعايتۋعا. بۇل ماقساتتارعا 2،2 ملرد تەڭگە ءبولۋ جوسپارلانۋدا.
سونىمەن قاتار، قالانىڭ تىنىس-تىرشىلىگىن قامتاماسىز ەتۋ جانە قالپىنا كەلتىرۋ ءۇشىن الەۋمەتتىك ماڭىزى بار ءىس-شارالاردى قارجىلاندىرۋعا وزگە دە شىعىستار كوزدەلگەن.
«قازىرگى ۋاقىتتا قالا بيۋدجەتىن ناقتىلاۋ جوباسى ازىرلەنۋدە، وندا مەگاپوليستىڭ تىنىس-تىرشىلىگىن قامتاماسىز ەتۋ مەن قالپىنا كەلتىرۋگە قاتىستى باسقا دا ماسەلەلەر قارالاتىن بولادى» - دەدى ءماسليحات حاتشىسى ستانيسلاۆ كانكۋروۆ.
سونداي-اق، ءماسليحات سەسسياسىندا «اق جول» پارتياسىنىڭ قالالىق تىزىمىنەن روتاسيا بويىنشا جانە جەكە ارىزى نەگىزىندە يۋريي ءشيننىڭ وكىلەتتىگى توقتاتىلدى.
ونىڭ ورنىنا اۋماقتىق سايلاۋ كوميسسياسىنىڭ جانە «اق جول» پارتياسى فيليالى كەڭەسىنىڭ قاۋلىسىمەن «قازاقستاننىڭ ميكروقارجى ۇيىمدارى قاۋىمداستىعى» زتب ديرەكتورى جانە بەلگىلى زاڭگەر ەربول ومارحانوۆتىڭ كانديداتۋراسى بەكىتىلدى.