26 شىلدەدە الماتى قالاسىنداعى سۋمەن قامتۋ ماسەلەسىنە قاتىستى باسپا ءسوز تۋرى ءوتتى.
وعان الماتى ەنەرگەتيكا جانە سۋمەن جابدىقتاۋ باسقارماسىنىڭ باسشىسى تالعات مالىبايەۆ، مەدەۋ اۋدانىنىڭ اكىمى ەركەبۇلان ورازالين، توتەنشە جاعدايلار دەپارتامەنتى باستىعىنىڭ مىندەتىن اتقارۋشى ەرلان الىبەكوۆ، سونىمەن قاتار، «الماتى سۋ» وكىلدەرى قاتىستى، دەپ حابارلايدى Almaty-akshamy.kz.
باسپا ءسوز تۋرى بارىسىندا جۋرناليستەر كىشى الماتى وزەنىنەن اعاتىن سۋدى كوزبەن كورىپ، «مەدەۋ» سۇزگى ستانسياسىنداعى سۋ دايىنداۋ ۇدەرىسىمەن، «بالقاش» سۋمەن جابدىقتاۋ نىسانىن رەكونسترۋكسيالاۋ جانە سۋمەن جابدىقتاۋ جەلىسىن سالۋ جۇمىستارىنىڭ بارىسىمەن تانىستى. ماماندار تاۋل وزەندەردە سۋدىڭ لايلانۋ دەڭگەيىنىڭ جوعارىلاۋ سەبەبىن، وسىعان بايلانىستى الماتى تۇرعىندارى ءۇشىن اۋىز سۋدىڭ قىسىمى تومەندەگەنىن نەمەسە سۋ بەرۋدىڭ شەكتەلگەنىن ايتىپ بەردى.
ەرلان الىبەكوۆتىڭ ايتۋىنشا، سوڭعى 13 كۇندە تەمپەراتۋرانىڭ كوتەرىلۋىنە بايلانىستى الماتى قالاسىنىڭ تاۋلى جەرلەرىندە مۇزدىقتاردىڭ ەرۋى جوعارىلايدى.
«ءبىز ءقازىر اەروۆيزۋالدى شولۋ جاسادىق، ول كىشى الماتى وزەنىندە سۋ دەڭگەيىنىڭ جوعارىلاعانىن كورسەتتى. جالپى، ءدال وسىنداي جاعداي باسقا وزەندەردىڭ ارنالارىندا دا بايقالادى. سۋ دەڭگەيىنىڭ جوعارىلاۋى وزەن جاعالاۋىن شايادى. بۇل وزەندەگى باستاپقى سۋدىڭ لايلانۋىنىڭ جوعارىلاۋىنا اكەلەدى. سونىمەن قاتار، سۋدىڭ لايلانۋى قارقىندى ەرىپ جاتقان مۇزدىقتارعا بايلانىستى»، - دەدى ول. وسىلايشا، سۋمەن جابدىقتاۋدىڭ شەكتەلۋى تەحنوگەندىك ماسەلە ەمەس، تەك تابيعي قۇبىلىستاردان تۋىندايدى.
ونىڭ ايتۋىنشا، شىلدەدە بايقالعان مۇنداي ىستىق اۋا-رايى سوڭعى رەت 8 جىل بۇرىن بولعان.
«وتكەن جىلدارى شىلدە مەن تامىز ايلارىندا سالقىن بولدى، وسىعان بايلانىستى بۇرىن مۇنداي تۇيتكىل تۋىنداعان جوق. سينوپتيكتەر جۇمادان باستاپ اپتانىڭ سوڭىنا قاراي اۋا تەمپەراتۋراسى +25-28°C دەيىن تومەندەيدى دەپ بولجايدى. بۇل تامىزدىڭ ءبىرىنشى ونكۇندىگىندە دە ساقتالادى. وسى جاعدايدا لايلانۋ كونسەنتراسياسى كەميدى، ويتكەنى مۇزدىقتاردىڭ ەرۋى ازايادى»، - دەپ ە.الىبەكوۆ تاۋلى جەرلەردە نوسەر جاڭبىر جاۋعان جاعدايدا لايلانۋ دەڭگەيىنىڭ وزگەرۋى مۇمكىن ەكەنىن ايتتى.
«ءبىز جاعدايدى باقىلاۋدا ۇستايمىز. تاۋلى جەرلەردە التى كولدە الدىن الۋ جۇمىستارى جۇرگىزىلۋدە، سونىڭ ارقاسىندا سۋ دەڭگەيى تومەندەدى. كۇن سايىن بارلىق مورەنالىق كولگە مونيتورينگ جۇرگىزەمىز، باقىلاۋ جاسايمىز»، - دەدى ەرلان الىبەكوۆ.
تالعات مالىبايەۆ سۋ بەرۋ ماسەلەسى بىرنەشە اۋدانعا، سونىڭ ىشىندە ناۋرىزباي اۋدانىنا دا اسەر ەتكەنىن اتاپ ءوتتى. ايتۋىنشا، بۇگىنگى تاڭدا مەگاپوليس جەر استى جانە جەر ءۇستى سۋمەن جابدىقتاۋدىڭ التى نەگىزگى كوزىمەن قامتاماسىز ەتىلگەن.
«جەر ءۇستى كوزدەرىنىڭ نەگىزگىلەرى كىشى الماتى، ۇلكەن الماتى، اقساي جانە قارعالى وزەندەرى بولىپ تابىلادى. «مەدەۋ» سۋ قابىلداعىشى مەدەۋ اۋدانىنىڭ باتىس بولىگىن قامتاماسىز ەتەدى. ءبىز سۋدى سۇزگى ستانسياسىنا جەتكىزە المايمىز، سەبەبى ول بىتەلىپ قالىپ، قالا ءۇشىن ناقتى تەحنوگەندىك ءقاۋىپ پايدا بولادى. لايلانۋ ازايىپ، سۋ تازارعان كەزدە «مەدەۋ» سۋ قابىلداعىشى تولادى»، - دەدى تالعات مالىبايەۆ.
ول ەنەرگەتيكا جانە سۋمەن جابدىقتاۋ باسقارماسى باس جوسپار اياسىندا الماتىعا قوسىلعان اۋماقتاردى سۋمەن قامتاماسىز ەتۋ بويىنشا جوبا ازىرلەنىپ جاتقانىن حابارلادى. ەگەر بولاشاقتا مۇنداي جاعداي قايتالانسا، وندا ولاردى جەر استى كوزدەرىنىڭ كومەگىمەن شەشۋگە بولادى.
«ءقازىر ماسەلەنى شەشۋ ءۇشىن ءبىز كۇنىنە ەكى رەت ەمەس، ءار ساعات سايىن تاۋلىك بويى ۇزدىكسىز سۋدى تالدايمىز. ەگەر تالداۋ لايلانۋدىڭ تومەندەۋىن كورسەتسە، ءبىز سۋدى ۋاقىتشا قوسامىز. بۇگىن كىشى الماتى وزەنىنەن الىنعان سۋعا تالداۋ جاسادىق. ناتيجەلەر لايلىلىق دەڭگەيى 340 مگ/دم3 بولعانىن كورسەتتى، ءبىراق سۇزگى ستانسياسى ارقىلى قاجەتتى كولەمدە تۇراقتى سۋ بەرۋ ءۇشىن لايلىلىق دەڭگەيى 30-40 مگ/دم3 دەيىن تومەندەۋى قاجەت»، - دەدى «الماتى سۋ» سۋ كوزى دەپارتامەنتىنىڭ ديرەكتورى ولەگ يۋگاي.
باسپا ءسوز تۋرى بارىسىندا ب ا ق وكىلدەرىنە مەدەۋ اۋدانىنداعى جاڭا سۋ قويماسىنىڭ قۇرىلىس الاڭى كورسەتىلدى.
مەدەۋ اۋدانىنىڭ اكىمى ەركەبۇلان ورازالين بىلتىر كۇزدەن باستاپ مەدەۋ اۋدانىندا سوڭعى 30 جىلدا اۋقىمدى قۇرىلىس سالىنعاندىقتان سۋ قىسىمىنىڭ تومەندەگەنىن اتاپ ءوتتى. سوندىقتان، ونىڭ ايتۋىنشا، اتالعان رەزەرۆۋاردىڭ قۇرىلىسى الماتى اكىمى ەربولات دوسايەۆتىڭ تاپسىرماسى بويىنشا تج جەلىسى بويىنشا جۇزەگە اسىرىلۋدا. جوبانىڭ اكىمشىسى مەدەۋ اۋدانى اكىمدىگىنىڭ اپپاراتى بولىپ تابىلادى.
«نىسان وتە ماڭىزدى، ونى ىسكە اسىرۋ بيىل مەدەۋ اۋدانىنىڭ وڭتۇستىك بولىگىندەگى ءبىرقاتار شاعىن اۋداندى تۇراقتى سۋمەن قامتاماسىز ەتۋگە مۇمكىندىك بەرەدى. جوبادا 4 ۇڭعىمانى بۇرعىلاۋ، ساعاتىنا سۋدىڭ جالپى دەبەتى 200-220 تەكشە مەترگە دەيىن جانە ءقازىر سالىنىپ جاتقان ەكى ۇلكەن رەزەرۆۋار قاراستىرىلعان. ءارقايسىسىنىڭ كولەمى 3 مىڭ تەكشە مەتر. جۇمىس ءپرينسيپى - ۇڭعىمالار رەزەرۆۋارلاردى تولتىرادى، سول جەردەن سۋ كامەنسك ۇستىرتىنە، بۋتاكوۆكاعا، يۋبيلەينىي جانە كولساي ش / ا-عا جەتكىلىكتى مولشەردە جىبەرىلەدى. 20 مىڭعا جۋىق تۇرعىن تۇراقتى سۋمەن قامتاماسىز ەتىلەدى. ىسكە اسىرۋ مەرزىمى – 2023 جىلدىڭ جەلتوقسانىنا دەيىن. بارلىق جۇمىس "الماتى سۋ" كومپانياسىنىڭ تالابى مەن كەلىسىمى بويىنشا جۇرگىزىلەدى. بۇل جوبانى ودان ءارى كوممۋنالدىق كاسىپورىننىڭ پايدالانۋىنا جانە كۇتىپ-ۇستاۋعا بەرۋدى قامتاماسىز ەتەدى»، - دەدى الماتى قالاسىنىڭ مەدەۋ اۋدانىنىڭ اكىمى.
ول سۋمەن جابدىقتاۋ شەكتەلگەن مەدەۋ اۋدانىنداعى سۋ تاسيتىن كولىكتەردىڭ سانى ارتقانىن حابارلادى.
"كەشە ءبىز 8 سۋ تاسيتىن كولىكتى، بۇگىن تاعى 6 كولىكتى جۇمىلدىرىپ، ەرتەڭ ولاردىڭ سانىن 18 بىرلىككە دەيىن ارتتىرامىز. بۇل رەتتە، ءبىر ادامعا ءبىر ليتر سۋ مولشەرى شەكتەلمەيدى، ياعني تۇرعىندار ءوز قاجەتتىلىكتەرىنە سايكەس سۋ الادى"، - دەدى ە.ورازالين.
بيوتۋالەتتەرگە كەلسەك، بۇگىنگى تاڭدا مەدەۋ اۋدانىنىڭ وڭتۇستىك بولىگىندە 28 بىرلىك ورناتىلدى. ءارى ولاردىڭ سانى تۇرعىنداردىڭ سۇرانىسى بويىنشا كوبەيەدى.
سۋمەن قامتۋ ماسەلەسىنە بايلانىستى وتىنىشتەر ءۇشىن جەدەل جەلىلەر ۇيىمداستىرىلدى. ول مىنا نومىرلەر بويىنشا قابىلدانادى: + 7 775 594 90 94 (دارەتحانالار بويىنشا)، + 7 707 776 47 72 (سۋ تاسيتىن كولىكتەر بويىنشا). اۋىز سۋدى جەتكىزۋ ماسەلەسى بويىنشا وتىنىمدەردى «الماتى سۋ» مكك ديسپەچەرلىك قىزمەتى كەلەسى نومىرلەر بويىنشا قابىلدايدى: 274-66-66، +7 777 852 91 01.
انىقتاما:
«الماتى سۋ» مكك دەرەكتەرى بويىنشا قازىرگى ۋاقىتتا يۋبيلەينىي، تاۋ سامال (كامەنسك ءۇستىرتى)، «ۆيپ الەم» كوتتەدج قالاشىعى، «ەۆروپوليس» تۇك، كەرەي مەن جانىبەك حاندار كوشەسى، وڭداسىنوۆا، لادۋشكينا، وسپانوۆا، قىز جىبەك، جانىبەكوۆا، نايمانبايەۆا، دوستىق، چايكينا كوشەسىندەگى تۇتىنۋشىلارعا سۋ بەرۋ شەكتەلدى.
جەلىلەردەگى سۋ قىسىمىنىڭ تومەندەۋى قاجىمۇقان، بايجانوۆ، لۋگانسكيي، دوستىق داڭعىلى، نۇرماعامبەتوۆ، ساحارييەۆ، «كوكتوبە»، «سامال-1، 3»، «تاۋلى قىرات» شاعىن اۋداندارىنداعى كوشەلەردە بايقالادى.