بۇگىن الماتىدا تۇرعىندار مەن قالا قوناقتارى ءۇشىن اشىق اسپان استىندا ءتورت كونسەرت وتەدى. حالىق بارلىق ءىس-شرانى تەگىن تاماشالاي الادى. «اسىل قازىنا» اتتى العاشقى اۋقىمدى كونسەرت 18:00-دە «الاتاۋ» ءداستۇرلى ونەر تەاترىنىڭ الدىنداعى الاڭدا بولادى. ساحنادا رامازان ستامعازييەۆ، ساۋلە جانپەيىسوۆا، ەركىن شۇكىمان، امانگەلدى كۇزەۋباي جانە ت.ب. تانىمال ءداستۇرلى انشىلەر مەن ارتيستەر ونەر كورسەتەدى، دەپ حابارلايدى aqshamnews.kz
كەيىن ساعات 19:00-دە وسى الاڭدا «الماتى ءتۇنى» اتتى ەكىنشى كونسەرت باستالادى، كورەرمەن قاۋىمقا اتى اڭىزعا اينالعان «دوس-مۇقاسان» ءانسامبلى ءان شىرقايدى. ءبىر ساعاتتان سوڭ 20:00-دە ساحناعا «مۋزارت» توبى شىعادى. ساكەن مايعازييەۆ، مەيرامبەك بەسبايەۆ جانە كەنجەبەك تۇرسىنباي ۇلى كوپشىلىكتىڭ سۇيىكتى اندەرىن ورىنداپ، الماتىلىقتاردى كەلە جاتقان قالا كۇنىمەن قۇتتىقتايدى.
تاعى ءبىر مەرەكەلىك ءىس-شارا ارباتتا وتەدى. تۇرعىندار مەن قوناقتارعا «جاڭا عاسىر» تەاترىنىڭ ارتيستەرى «الماتى – ماحابباتىم» كونسەرت-سپەكتاكلى ۇسىنادى ولار ش. ايمانوۆ اتىنداعى «قازاقفيلم» كينوستۋدياسىنىڭ التىن قورىنداعى فيلمدەردىڭ ساۋندترەكتەرىن قالا تۇرعىندارىمەن بىرگە ورىندايدى. سونىمەن قاتار، جاس ءارى تالانتتى اكتەرلەر ءانونيمدى حات جازىپ، شىنايى سەزىمى مەن تولعانىسىن بىلدىرۋگە بەل بۋعان ادامداردىڭ ىشكى جان سەزىمىن تەاترلاندىرىلعان درامالىق كورىنىس ارقىلى كورەرمەن نازارىنا ۇسىنادى.
ءىس-شارالار جوسپارىنىڭ تولىق نۇسقاسى almaty.kz (https://www.almaty.kz/almaty-alasy-k-ni/؟lang=kz) سايتىندا، سونداي-اق اكىمدىكتىڭ Instagram پاراقشاسىندا، الماتى مادەنيەت باسقارماسى مەن اۋداندىق اكىمدىكتەردىڭ رەسمي پاراقشالارىندا جاريالانعان. ەسكەرتەيىك، ازداعان وزگەرىستەر بولۋى مۇمكىن. اقپاراتتى اكىمدىكتىڭ رەسمي ينتەرنەت-رەسۋرستارى ارقىلى باقىلاپ وتىرۋدى سۇرايمىز.