كادر تاپشىلىعىن تومەندەتۋ جانە مامانداردىڭ الەۋەتىن ارتتىرۋ ءۇشىن قالالىق باعدارلاما اياسىندا جىل سايىن جوعارى، جوعارى وقۋ ورنىنان كەيىنگى ءبىلىمى بار كادرلاردى دايارلاۋعا قارجى بولىنەدى، دەپ حابارلايدى almaty-akshamy.kz
2021 جىلدان باستاپ الماتى قالاسىندا سۇرانىسقا يە كلينيكالىق ماماندىقتار بويىنشا رەزيدەنتۋرادا وقۋعا قابىلداۋ جەرگىلىكتى بيۋدجەت ەسەبىنەن جۇرگىزىلىپ كەلەدى. 2021-2023 جىلدار ارالىعىندا رەزيدەنتتەردى دايارلاۋعا ارنالعان 380 ءبىلىم بەرۋ گرانتى ءبولىندى (2021 جىلى – 120، 2022 جىلى – 120، 2023 جىلى – 140). 2024 جىلعا تاعى 140 قالالىق ءبىلىم گرانتىن ءبولۋ كوزدەلگەن.
رەزيدەنتۋرانىڭ قالالىق ءبىلىم بەرۋ تاپسىرىسىن ءبولۋ كەزىندە الماتى قالاسى قوعامدىق دەنساۋلىق ساقتاۋ باسقارماسىنىڭ ۆەدومستۆولىق باعىنىستى مەديسينالىق ۇيىمدارىنىڭ وتىنىمدەرىنە سايكەس قالانىڭ قاجەتتىلىگى ەسكەرىلەدى.
بيىل شىلدە ايىنداعى جاعداي بويىنشا دارىگەرلەردىڭ تاپشىلىعى بەيىندەگى ماماندار ەسەبىنەن 162 شتاتتىق بىرلىككە جەتتى، اتاپ ايتقاندا اكۋشەر-گينەكولوگتار، انەستەزيولوگتار-رەانيماتولوگتار، اللەرگولوگتار، كارديولوگتار، نيەۆروپاتولوگتار، ينفەكسيونيستەر، ەندوكرينولوگتار جانە ت.ب. تاپشى.
بەيىندى دارىگەرلەردىڭ تاپشىلىعى مامانداندىرىلعان مەديسينالىق كومەككە دەگەن قاجەتتىلىكتىڭ ارتۋىنا بايلانىستى كونسۋلتاسيالىق-دياگنوستيكالىق قىزمەتتەردىڭ كوبەيۋىمەن بايلانىستى، بۇعان بالا تۋۋ كورسەتكىشىنىڭ ءوسۋى، سالماعى از بولىپ تۋعان بالالاردى كۇتۋدىڭ جوعارى پايىزى جانە ىشكى كوشى-قون سەبەپ.
بۇعان قوسا، قالا اكىمدىگى ورتا مەديسينالىق مامانداردى دايارلاۋ بويىنشا اۋقىمدى جۇمىس جۇرگىزىپ وتىر. مىسالى، بيىل ماقساتتارعا 1 ملرد 464 ملن تەڭگە سوماسىنا 1113 گرانت ءبولىندى، بىلتىر بۇل سوما شامامەن 886 ملن تەڭگە (1032 گرانت) بولعان.
الماتى قالاسىندا ورتا بۋىن مەدبيكەلەرىن 13 مەديسينالىق كوللەدج دايىندايدى، ونىڭ 1 مەملەكەتتىك، 12 جەكەمەنشىك. ماماندار 8 ماماندىق جانە 10 بىلىكتىلىك بويىنشا دايارلانادى.
جىل سايىن 2 500-دەن استام ورتا مەديسينالىق قىزمەتكەر دايارلانادى، ونىڭ 1700-دەن استامى «مەيىربيكە ءىسى» ماماندىعى بويىنشا وقيدى.
ايتا كەتەيىك، ءۇش دەڭگەيلى جۇيە بويىنشا وقىتۋدىڭ ارنايى باعدارلاماسى جىل سايىن 3 340 مامان مەن 70 مەنەدجەردى دايىندايدى (2023 جىلى بۇل ماقساتقا جەرگىلىكتى بيۋدجەتتەن 1،9 ملرد.تەڭگە ءبولىندى). ءارى ونىڭ اياسىندا جوعارى، جوعارى وقۋ ورنىنان كەيىنگى ءبىلىمى بار 140 مامان دايارلانادى.