الماتىدا دارىلەردى ەكولوگيالىق تۇردە كادەگە جاراتۋعا جول اشاتىن قابىلداۋ پۋنكتتەرى جۇمىس ىستەي باستادى. ياعني ماۋسىمنان باستاپ مەگاپوليستىڭ 36 ەمحاناسىنا ارنايى كونتەينەرلەر ورناتىلدى. تۇرعىندار كولدانىلماعان، جارتىلاي پايدالانىلعان نەمەسە ساقتاۋ مەرزىمى ءوتىپ كەتكەن دارىلىك پرەپاراتتاردى سول قوراپقا سالىپ كەتۋىنە بولادى.
جوبا الماتى قالاسى اكىمدىگىنىڭ، ECO Network ەكولوگيالىق ۇيىمىنىڭ جانە STADA حالىقارالىق فارماسيەۆتيكالىق كومپانياسىنىڭ قولداۋىمەن جۇزەگە اسىرىلۋدا. ۇيىمداستىرۋشىلار دارىلىك زاتتاردىڭ ءقاۋىپتى قالدىقتار ساناتىنا جاتاتىنىن ايتىپ وتىر. ولاردىڭ كوزىن دۇرىس جويماعان جاعدايدا، قۇرامىنداعى بەلسەندى زاتتار توپىراق پەن سۋعا ءوتىپ، وندا جىلدار بويى ساقتالىپ، تابيعي ەكوجۇيەنى بۇزۋى مۇمكىن.
Proxima Research ساراپتامالىق كومپانياسىنىڭ مالىمەتىنە سۇيەنسەك، 2024 جىلى قازاقستاندا 1،46 ميلليارد ورام ءدارى تۇتىنىلعان. سونىمەن قاتار، كوپتەگەن پرەپارات پايدالانىلماي قالىپ، ۋاقىت وتە كەلە ولاردى ءقاۋىپسىز تۇردە جويۋ قاجەتتىلىگى تۋىندايدى. دارىلەردى قابىلداۋ پۋنكتتەرىن قۇرۋ فارماسيەۆتيكالىق قالدىقتارعا جاۋاپكەرشىلىكپەن قاراپ، وڭدەۋ مادەنيەتىن قالىپتاستىرۋعا جانە ولاردىڭ قورشاعان ورتاعا اسەرىن ازايتۋعا باعىتتالعان ماڭىزدى قادام ەكەنى ءسوزسىز.
قابىلداۋعا جارامدى زاتتارعا تەك تابلەتكا مەن كاپسۋلا، جاقپا، كرەم، گەل، امپۋلا، فلاكون، سيروپتار جانە دارىلىك سۇيىق ەرىتىندىلەر جاتادى. شپريس، ينەلەر، ينفۋزيالىق جۇيەلەر جانە قانمەن جاناسقان كەز-كەلگەن مەديسينالىق قالدىقتار قابىلدانبايدى، ولاردى ارنايى مەديسينالىق ۇيىمداردا ارناۋلى تۇردە كادەگە جاراتۋ قاجەت.
”ەۋروپا ەلدەرىنە قاراعاندا، قازاقستاندا دارىلىك زاتتاردى ءقاۋىپسىز تۇردە كادەگە جاراتۋ جۇيەسى ءالى قالىپتاسپاعان. الماتىلىقتارعا دارىلەردى ءتيىستى ءتارتiپپەن قايتا وڭدەۋگە تاپسىرۋعا بولاتىن مۇمكىندىك ۇسىنا وتىرىپ، ءار ازاماتقا قورشاعان ورتانى قورعاۋعا ءوز ۇلەسىن قوسۋ ءۇشىن جاعداي جاساعىمىز كەلەدى. بۇگىندە قاجەتسىز دارىلەر ءالى دە قوقىسقا تاستالىپ نەمەسە كارىزگە توگىلۋدە. ال بۇل ەكوجۇيەگە، ادام دەنساۋلىعىنا ءقاۋىپ توندىرەدى. جينالعان دارىلەردىڭ ءقاۋىپسىز جانە ەكولوگيالىق تالاپتارعا ساي كادەگە اسۋىن ارنايى مامانداندىرىلعان ۇيىم قامتاماسىز ەتەدى. كادەگە جاراتۋ پروسەسى اشىق، ءارى باقىلاناتىن بولادى”، – دەيدى ECO Network ۇيىمىنىڭ نەگىزىن قالاۋشى ەۆگەنيي مۇحامەدجانوۆ.