الماتىدا پۋشكين كوشەسى بويىنداعى اۋماقتى اۋقىمدى جاڭعىرتۋ جۇمىستارى جالعاسىپ جاتىر. جوبا اۋماعى رايىمبەك داڭعىلىنان گوگول كوشەسىنە دەيىنگى ارالىقتى قامتيدى. بۇل كەڭىستىك سەرۋەندەۋگە، دەمالۋعا جانە قالا ورتالىعىنىڭ تىنىسىن سەزىنۋگە قولايلى، زاماناۋي قالالىق دالىزگە اينالۋدا. مۇندا جاي عانا جاڭارتىلعان تروتۋار ەمەس، ويلاستىرىلعان جارىقتاندىرۋ جۇيەسى، اۆتوماتتى سۋارۋ تەتىگى جانە كەدەرگىسىز ورتا قاراستىرىلعان تولىققاندى جاسىل كوشە قالىپتاسىپ كەلەدى. مۇنى تۋرالى الماتى قالاسىنىڭ قوعامدىق كەڭىستىكتەردى دامىتۋ باسقارماسىنىڭ ماماندارى ايتتى.
جوبادا كوگالداندىرۋعا ەرەكشە ءمان بەرىلگەن. كوشە بويىنا شامامەن 300 اعاش پەن 8 مىڭعا جۋىق بۇتا وتىرعىزىلعان. كوگالداندىرۋ كەزىندە گەرمانياداعى ءتالىمباقتان اكەلىنگەن فريمان ۇيەڭكىسى، ءتوزىمدى شەگىرشىن، ءىرى جاپىراقتى پالليدا، سونداي-اق تۇركيادان جەتكىزىلگەن گينكگو بيلوبا پايدالانىلدى. گينكگو اعاشى الماتىدا العاش رەت وتىرعىزىلىپ، قالالىق لاندشافتتىڭ جاڭا ءارى ايشىقتى ەلەمەنتىنە اينالماق. جاسىل قاباتتى كوكجالبىز، اق ءسانتال «ەلەگانتيسسيما»، رۋگوزا راۋشانى، قىلتانباس، جاپون توبىلعىسى مەن كوپىرشىك تولىقتىرىپ، جىل بويى ءتۇرلى رەڭك پەن كوركەمدىك بەرەدى.
سونىمەن قاتار جابىندار جاڭارتىلىپ، جاڭا كوشە جارىعى ورناتىلۋدا، تاس توسەۋ جانە سۋ بۇرۋ جۇيەسىن جاساۋ جۇمىسى قولعا الىنعان. قازىرگى تاڭدا ەسكىرگەن تروتۋارلار مەن تروللەيبۋس جەلىلەرى تولىعىمەن الىنىپ، كابەلدىك جەلىلەردىڭ نەگىزگى ماگيسترالدارى تارتىلدى، اۆتوماتتى سۋارۋ جۇيەسىنىڭ باسىم بولىگى مەن جارىقتاندىرۋ تىرەكتەرى ورناتىلدى. رەزەرۆۋار قۇرىلىسى اياقتالۋعا جاقىن، جۇرگىنشىلەر ينفراقۇرىلىمىن قالىپتاستىرۋ جانە كوگالداندىرۋ جۇمىستارى جالعاسىپ جاتىر.
جاڭارتىلىپ جاتقان اۋماقتىڭ ۇزىندىعى — 1،1 شاقىرىم، جالپى كولەمى — 6،5 گەكتار. نىساننىڭ دايىندىق دەڭگەيى شامامەن 80 پايىزعا جەتتى. بارلىق جۇمىس اياقتالعان سوڭ پۋشكين كوشەسى الماتىنىڭ تاريحي ورتالىعىن جاڭا قىرىنان تانىتاتىن، كولەڭكەسى مەن جاسىل جەلەگى مول، تۇرعىندار مەن قالا قوناقتارىنا جايلى سەرۋەن باعىتىنا اينالادى. كورىكتەندىرۋ جۇمىستارى بەلگىلەنگەن كەستەگە ساي جالعاسىپ، زاماناۋي ءارى قولايلى قالالىق ورتا قالىپتاستىرۋعا باعىتتالعان.