بۇگىن الماتىنىڭ جامبىل اتىنداعى قالالىق كىتاپحاناسىندا جاڭا American Space Makerspace ءبىلىم بەرۋ ورتالىعىنىڭ سالتاناتتى اشىلۋى ءوتتى. ورتالىق اقش ەلشىلىگى مەن الماتىداعى اقش باس كونسۋلدىعىنىڭ قولداۋىمەن ىسكە قوسىلدى، - دەپ حابارلايدى aqshamnews.kz ءتىلشىسى.
اشىلۋ راسىمىنە اقش-تىڭ الماتىداعى باس كونسۋلى ميشەل ەركين، قازاقستان جازۋشىلار وداعىنىڭ ءتوراعاسى مەرەكە قۇلكەنوۆ، الماتى قالاسى مادەنيەت باسقارماسىنىڭ باسشىسى دانيار الييەۆ، مادەنيەت جانە ونەر قايراتكەرلەرى، سونداي-اق بۇقارالىق اقپارات قۇرالدارىنىڭ وكىلدەرى قاتىستى. سونىمەن قاتار ءىس-شاراعا امەريكا–قازاقستان بىرلەسكەن مۇناي كومپانياسى – «تەڭىزشيەۆرويلدىڭ» وكىلدەرى دە كەلدى.
جاڭا ورتالىق جاستارعا ارنالعان اشىق ءبىلىم الاڭى رەتىندە جۇمىس ىستەيدى. مۇندا اقش ۋنيۆەرسيتەتتەرىندە وقۋدى جوسپارلاپ جۇرگەن تالاپكەرلەرگە كەڭەس بەرۋ، اعىلشىن ءتىلى كۋرستارى، سونداي-اق كوشباسشىلىق پەن شىعارماشىلىقتى دامىتۋعا باعىتتالعان باعدارلامالار جۇزەگە اسىرىلادى.
ءىس-شارا بارىسىندا ءسوز سويلەگەن قازاقستان جازۋشىلار وداعىنىڭ ءتوراعاسى مەرەكە قۇلكەنوۆ ەكى ەل اراسىنداعى مادەني جانە ادەبي بايلانىستىڭ ماڭىزىن اتاپ ءوتتى.
"ەل مەن ەلدى جاقىنداستىراتىن ەڭ قۋاتتى رۋحاني كوپىر – ادەبيەت. وكىنىشكە قاراي، تاۋەلسىزدىك العان وتىز جىلدان استام ۋاقىت ىشىندە قازاقستانعا امەريكالىق جازۋشىلاردىڭ كەلۋى وتە سيرەك بولدى. ادەبيەت – ساياسات تا ەمەس، بيزنەس تە ەمەس، ول حالىقتاردى بىر-بىرىمەن بايلانىستىراتىن سالا. الماتىدا وسىنداي ورتالىقتىڭ اشىلۋى قازاقستان مەن اقش اراسىنداعى ادەبي بايلانىستاردىڭ جاندانۋىنا سەرپىن بەرسە دەيمىز. ءبىز ەلىمىزدە قازىرگى امەريكالىق ادەبيەتتىڭ وكىلدەرىن كورگىمىز كەلەدى. سونىمەن قاتار اعىلشىن تىلىنەن قازاق تىلىنە تىكەلەي اۋدارما جاسايتىن شىعارماشىلىق ورتالىقتاردىڭ كوبەيگەنىن قالايمىز"، – دەدى ول.
ۇيىمداستىرۋشىلاردىڭ ايتۋىنشا، American Space Makerspace الداعى ۋاقىتتا جاستاردىڭ حالىقارالىق ءبىلىم كەڭىستىگىنە شىعۋىنا، سونداي-اق مادەني جانە زياتكەرلىك الماسۋعا جول اشاتىن ماڭىزدى ورتالىقتاردىڭ بىرىنە اينالماق.