الماتىدا پسيحوتروپتىق زاتتاردى ساتقان كۇدىكتى ۇستالدى

جەڭىل اقشا تابۋدى ويلاعان 27 جاستاعى كۇدىكتى ۇستالدى. 

الماتى پوليسەيلەرى پسيحوتروپتىق زاتتاردى ساتتى دەگەن كۇدىكپەن 27 جاسار ازاماتتى ۇستادى، دەپ حابارلايدى Almaty-akshamy.kz.

ىشكى ىستەر مينيسترلىگىنىڭ رەسمي سايتىنداعى مالىمەت بويىنشا، كۇدىكتى كۇندىز «الماگۇل» ىقشاماۋدانىندا پسيحوتروپتىق زاتتاردى بايلانىسسىز تۇردە ساتاتىن، ياعني ولاردى «قويىپ كەتۋ» ارقىلى تاراتىپ، جەڭىل اقشا تابۋدى كوزدەگەن.

«جەرگىلىكتى تۇرعىنداردىڭ قىراعىلىعى قىلمىسقا دەر كەزىندە ارەكەت ەتۋگە كومەكتەستى. ولار كۇدىكتى جىگىتتى بايقاپ، بۇل تۋرالى ۋچاسكەلىك ينسپەكتورعا حابارلادى. ول بىردەن كورسەتىلگەن مەكەنجايعا كەلىپ، كۇدىكتىنى ۇستادى. جەكە تەكسەرۋ كەزىندە كۇدىكتىدەن يزولەنتامەن ورالعان 33 بۋما تاركىلەندى، كىرە بەرىستەن تاعى ەكەۋى تابىلدى. الدىن الا بولجام بويىنشا، ونىڭ ىشىندە سينتەتيكالىق ەسىرتكى بولعان. بۇل فاكتى ق ر قك-نىڭ 296-بابى 4-بولىگى بويىنشا سوتقا دەيىنگى تەرگەۋدىڭ ءبىرىڭعاي تىزىلىمىنە تىركەلدى. سوت-حيميالىق ساراپتاما تاعايىندالدى. ەسىرتكى تاراتۋ كانالىن ءبىلۋ جانە «جۇمىس بەرۋشى» دەپ اتالاتىن تۇلعانىڭ جەكە باسىن انىقتاۋ بويىنشا جەدەل ءىس-شارالار كەشەنى جۇرگىزىلۋدە»، – دەدى بوستاندىق اۋداندىق پب باستىعىنىڭ مىندەتىن اتقارۋشى باتۋر ابدۋماساروۆ.