الماتىدا پوليسيانىڭ سەرۆيستىك ورتالىقتارى قالاي جۇمىس ىستەيتىنى تالقىلاندى، دەپ حابارلايدى Almaty-akshamy.kz.
پوليسيا جۇمىسىنىڭ سەرۆيستىك مودەلىن ەنگىزۋ شەڭبەرىندە مەملەكەت باسشىسى الماتى قالاسىنىڭ سەگىز اۋدانىندا سەرۆيستىك ورتالىقتار اشۋدى تاپسىرعان بولاتىن. مۇنداي قادام پوليسيا بولىمشەلەرىنە تۇسەتىن اۋىرتپالىقتى ازايتۋعا جانە ولاردىڭ جۇمىس تيىمدىلىگىن ارتتىرۋعا مۇمكىندىك بەرەدى. ءقازىر مەگاپوليستىڭ تۇرعىندارى مەن قوناقتارى ءارتۇرلى ماسەلەلەر بويىنشا اۋداندىق پوليسيا بولىمدەرىنىڭ جانىنداعى فرونت-وفيستەرگە جۇگىنەدى.
بۇل كەلۋشىلەر ءۇشىن دە، قىزمەتكەرلەر ءۇشىن دە ىڭعايسىز. سەبەبى مۇندا بەيبىت تۇرعىنداردان بولەك، قىلمىس جاسادى دەپ تانىلعان كۇدىكتىلەر جەتكىزىلىپ، پروباسيا ەسەبىندە تۇرعان سوتتالعاندار دا كەلەدى. ەڭبەك ميگرانتتارىنىڭ دا قاراسى قالىڭ. سونىمەن قاتار پوليسيا عيماراتتارى رەجيمدىك نىسان بولعاندىقتان ازاماتتار تولىق تەكسەرۋدەن وتۋگە ءماجبۇر، ۇيالى تەلەفوندارى ۋاقىتشا الىنىپ، قىزمەتكەر بىرگە ەرىپ-جۇرۋى مىندەتتى. پرەزيدەنتتىڭ سەرۆيستىك ورتالىقتار قۇرۋ جونىندەگى تاپسىرماسىن ورىنداۋ ماقساتىندا ءىىم جانە الماتى قالاسى اكىمدىگى وكىلدەرىنىڭ قاتىسۋىمەن جۇمىس كەزدەسۋى ءوتتى.
"اتالمىش جوبانىڭ تۇجىرىمى – "كليەنتكە" باعدارلانۋ. بۇگىندە ءىىم باعالاۋ ينديكاتورلارىن وزگەرتىپ جاتىر. سوندىقتان دا قاجەتتى جاڭا تاسىلدەر ازاماتتارىمىزدىڭ كوڭىلىنەن شىعۋى ءتيىس"، – دەدى مينيستر مارات احمەتجانوۆ.
ەكىنشى دەڭگەي – ۋچاسكەلىك پوليسيا پۋنكتتەرى. قازىرگى ۋاقىتتا ەل بويىنشا 2700-دەن استام پۋنكت جۇمىس ىستەيدى. جاڭا فورماتتاعى ءۇش نىسان استانا، پاۆلودار جانە اقتوبە قالالارىندا ورنالاسقان. ولاردىڭ نەگىزگى "كليەنتتەرى" شاعىناۋدانداردىڭ تۇرعىندارى بولىپ تابىلادى.
ءۇشىنشى دەڭگەي – ءوتىنىش بەرۋشىلەر مەن قىزمەت الۋشىلارعا ارنالعان پوليسيانىڭ سەرۆيستىك ورتالىقتارى. سەرۆيستىك ورتالىقتاردا تەگىن 55 ءتۇرلى قىزمەت كورسەتىلەتىن بولادى. پوليسيا تاراپىنان كوشى-قون، اكىمشىلىك زاڭناما جانە قۇقىق بۇزۋشىلىقتىڭ الدىن الۋ سالاسىنداعى ماماندار ورنالاستىرىلادى.
بۇدان باسقا وندا مەدياتور، زاڭ قىزمەتتەرىن كورسەتۋ جونىندەگى كونسۋلتانت جانە پسيحولوگ جۇمىس ىستەيتىن بولادى. ايەلدەردىڭ قۇقىقتارىن قورعاۋ جونىندەگى قىزمەتتەر ۇسىنىلىپ، ءىىم جوعارى وقۋ ورىندارىنا وقۋعا جانە ءىىو-عا جۇمىسقا قابىلداۋ بويىنشا كەڭەستەر بەرىلەدى. سەرۆيستىك ورتالىقتاردىڭ نەگىزگى ماقساتى – قوعاممەن اشىق ديالوگ قۇرىپ، حالىقتىڭ سۇرانىسىنا جەدەل دەن قويۋ، قالا تۇرعىندارى مەن قوناقتارىنا كاسىبي، بىلىكتى كومەك كورسەتۋ.