"قۇقىقتىق ءتارتىپ" رەسپۋبليكالىق جەدەل الدىن الۋ ءىس-شاراسى اياسىندا الماتى قالاسىنىڭ تۇركسىب اۋداندىق پب اكىمشىلىك پوليسيا بولىمشەسىنىڭ قىزمەتكەرلەرى قالاداعى ەكى اۆتوبۋس پاركىنىڭ جۇمىسىن تەكسەردى، - دەپ حابارلايدى Aqshamnews.kz.
ماقسات – جولاۋشىلار تاسىمالىنىڭ قاۋىپسىزدىگىن ارتتىرۋ جانە قوعامدىق كولىك قۇرالدارىنىڭ تەحنيكالىق جاي-كۇيىن قاتاڭ باقىلاۋ. ءىس-شارانىڭ مىندەتتەرى – قوعامدىق كولىكتەردى جەلىگە شىعارۋعا دەيىن اۆتوپاركتەردىڭ دايىندىعىن، رەيس الدىنداعى تەكسەرۋلەردىڭ، ونىڭ ىشىندە مەديسينالىق باقىلاۋدىڭ تالاپتارعا ساي بولۋىن قاداعالاۋ، سونداي-اق جولاۋشىلاردى تاسىمالداۋ قىزمەتىنىڭ ساپاسىن باقىلاۋ.
پوليسيا قىزمەتكەرلەرى اۆتوبۋستاردىڭ تەحنيكالىق جاعدايىن، قاجەتتى قۇجاتتاردىڭ بولۋىن، جۇرگىزۋشىلەردىڭ رەيس الدىنداعى مەديسينالىق تەكسەرۋدەن ءوتۋ ءتارتىبىن جانە كولىكتىڭ ءقاۋىپسىز جۇمىسقا دايىندىعىن تەكسەردى.
تەكسەرۋ ناتيجەسىندە زاڭ بۇزۋشىلىقتار انىقتالدى. اۆتوپارك لاۋازىمدى تۇلعاسىنا قاتىستى تەحنيكالىق اقاۋى بار كولىكتى جەلىگە شىعارعانى ءۇشىن جاۋاپقا تارتىلادى. ءبىر قوعامدىق كولىك ارنايى ايىپپۇل تۇراعىنا قويىلدى.
- پروفيلاكتيكا جىلى اياسىندا جولاۋشىلار تاسىمالى ساپاسىنا باقىلاۋ كۇشەيتىلدى. ءبىزدىڭ ماقساتىمىز – تەك زاڭبۇزۋشىلىقتى انىقتاۋ ەمەس، سونىمەن قاتار ازاماتتار ءۇشىن بولۋى مۇمكىن قاۋىپ-قاتەردىڭ الدىن الۋ. "قۇقىقتىق ءتارتىپ" ءىس-شاراسى اياسىنداعى جۇمىستار تاسىمالداۋشىلاردىڭ ءتارتىبىن ارتتىرىپ، قالا جولدارىنداعى قاۋىپسىزدىك دەڭگەيىن جوعارىلاتۋعا مۇمكىندىك بەرەدى، – دەدى تۇركسىب اۋداندىق پوليسيا باسقارماسىنىڭ باستىعى دۋمان اۋحادييەۆ.