الماتى قالاسىندا "قۇقىقتىق ءتارتىپ" جەدەل الدىن الۋ ءىس-شاراسى جالعاسىپ جاتىر.
ناۋقان باستالعاننان بەرى الماتى قالاسى پوليسيا دەپارتامەنتىنىڭ ازاماتتىق جانە قىزمەتتىك قارۋ اينالىمىن باقىلاۋ ءبولىمىنىڭ قىزمەتكەرلەرى جەرگىلىكتى پوليسيا قىزمەتىمەن بىرلەسىپ، قارۋ يەلەرىنىڭ قارۋدى ساقتاۋ شارتتارىنىڭ ساقتالۋىن باقىلاۋ ماقساتىندا مەكەنجاي بويىنشا تەكسەرۋلەر ۇيىمداستىردى، دەپ حابارلايدى aqshamnews.kz Polisia.kz-كە سىلتەمە جاساپ.
بۇگىنگى كۇنگە دەيىن 691 قارۋ يەسى تەكسەرىلىپ، قارۋدى ساقتاۋ ەرەجەلەرىن، سونداي-اق قارۋدى تىركەۋ جانە قايتا تىركەۋ مەرزىمدەرىن بۇزۋدىڭ 17-دەن استام دەرەگى انىقتالدى.
-جىبەرىلگەن قۇقىق بۇزۋشىلىقتار ءۇشىن قارۋ يەلەرى قازاقستان رەسپۋبليكاسىنىڭ زاڭناماسىنا سايكەس اكىمشىلىك جاۋاپكەرشىلىككە تارتىلدى. ءبىز تەكسەرۋمەن شەكتەلمەيمىز، ءاربىر قارۋ يەسىمەن قارۋدى ساقتاۋ ەرەجەلەرى مەن رۇقسات قۇجاتتارىنىڭ مەرزىمدەرىن قاتاڭ ساقتاۋ تۋرالى پروفيلاكتيكالىق اڭگىمە جۇرگىزىلەدى. سونداي-اق بۇزۋشىلىقتاردىڭ سالدارى، ونىڭ ىشىندە قىلمىستىق جاۋاپكەرشىلىككە دەيىن جەتكىزىلەتىنى ەسكەرتىلەدى، – دەدى الماتى قالاسى پد اكىمشىلىك پوليسيا باسقارماسىنىڭ باستىعى اسحات قۇلبايەۆ.
الماتى قالاسىنىڭ پوليسياسى، قارۋدى تۇرعىلىقتى جەردە ساقتاۋ بەلگىلەنگەن تالاپتارعا ساي بولۋى كەرەكتىگىن ەسكە سالادى. قارۋ يەلەرى رۇقسات قۇجاتتارىنىڭ مەرزىمىن ۋاقىتىندا ۇزارتۋعا جانە ازاماتتىق پەن قىزمەتتىك قارۋدىڭ اينالىمى سالاسىنداعى زاڭناما نورمالارىن قاتاڭ ساقتاۋعا مىندەتتى.