الماتىدا پوليسەيدى قاعىپ كەتىپ، ءىزىن سۋىتپاق بولعان جۇرگىزۋشىنىڭ ۇستىنەن تەرگەۋ باستالدى.
وقيعا 21 مامىر كۇنى تاڭعى التىدا بولعان. Toyota كولىگىنىڭ جۇرگىزۋشىسى ماس كۇيىندە اباي داڭعىلىمەن باتىس باعىتتا كەلە جاتىپ، نازاربايەۆ داڭعىلىمەن قيىلىسىندا پوليسيا قىزمەتكەرىن قاعىپ كەتكەن. پوليسەي اتالعان كولىكتى جول ەرەجەسىن بۇزعانى ءۇشىن توقتاتىپ تۇرعان، دەپ حابارلايدى Almaty-akshamy.kz.
«سوقتىعىسقاننان كەيىن Toyota جۇرگىزۋشىسى پوليسيا قىزمەتكەرلەرىنىڭ توقتاۋ تۋرالى زاڭدى تالاپتارىنا باعىنباي، جاسىرىنا باستاعان. جەلتوقسان مەن قۇرمانعازى كوشەلەرىنىڭ قيىلىسىندا جۇرگىزۋشى باعدارشام باعاناسىنا سوعىلدى. بۇل دەرەكتى مەدەۋ اۋداندىق پوليسيا باسقارماسى تەرگەپ جاتىر»، - دەلىنگەن پوليسيا مالىمەتىندە.