قۇتقارۋ بارىسىندا پوليسيا اعا لەيتەنانتى جاراقاتتاندى.
الماتىدا پوليسەي مەن فەلدشەر جانىپ جاتقان ۇيدەن ايەلدى قۇتقارىپ قالدى، دەپ حابارلايدى Almaty-akshamy.kz.
الماتى قالالىق توتەنشە جاعدايلار دەپارتامەنتىنىڭ مالىمەتىنشە، 18 جەلتوقسان كۇنى تاڭعى ساعات 10:24 كەزىندە «101» پۋلتىنە مەدەۋ اۋدانى، احمەدسافين كوشەسىندە ورنالاسقان №8 ءۇيدىڭ ورتەنىپ جاتقانى تۋرالى حابار كەلىپ ءتۇستى.
«وقيعا ورنىنا 6 مينۋتتا جەتكەن ءورت سوندىرۋشىلەر، ءۇيدىڭ شاتىرى مەن توبە جابىندىسىنىڭ جانىپ جاتقانىن انىقتادى. جالىن 120 شارشى مەتر اۋماقتى شارپىعان. ءورت 23 مينۋت ىشىندە وقشاۋلانىپ، 11:15-تە تولىعىمەن جويىلدى. ورتپەن كۇرەس ماماندارى كورشى تۇرعىن ءۇيدى ورتتەن قورعاپ قالدى. ءورتتى جويۋعا تجد قۇرامىنان 30 قىزمەتكەر، 6 بىرلىك تەحنيكا جانە قالانىڭ ءوزارا ءىس-قيمىل قىزمەتى جۇمىلدىرىلدى»،- حابارلادى الماتى قالالىق توتەنشە جاعدايلار دەپارتامەنتىنەن.
ۆەدومستۆو مالىمەتىنشە، «بۋران-240» ەكيپاجىنىڭ پاترۋلدىك پوليسيا پولكىنىڭ اعا ينسپەكتورى باعدات باقىتجان ۇلى اشەكوۆ پەن جمك № 10 ستانسياسىنىڭ فەلدشەرى تاحير رۋزەموۆ ءورت ءسوندىرۋ بولىمشەلەرى كەلگەنگە دەيىن ءوز ءومىرى مەن دەنساۋلىعىن قاتەرگە تىگىپ، جانىپ جاتقان ۇيدەن اياعىنىڭ جاراقاتىنا بايلانىستى (وتادان كەيىنگى جاعدايى) ءۇي-جايدان ءوز بەتىنشە شىعا الماي وتىرعان 31 جاستاعى ايەلدى قۇتقاردى.
قۇتقارۋ بارىسىندا، پوليسيا اعا لەيتەنانتى باعدات اشەكوۆ جاراقاتتاندى. دارىگەرلەر تەكسەرىپ، مەديسينالىق كومەك كورسەتكەننەن كەيىن ول قىزمەتىنە قايتا ورالدى.
«پاترۋلدىك پوليسيا پولكىنىڭ اعا ينسپەكتورى، اعا لەيتەنانت باعدات باقىتجان ۇلى اشەكوۆ پەن № 10 جمكق فەلدشەرى تاحير رۋزەموۆ الماتى قالاسى توتەنشە جاعدايلار دەپارتامەنتىنىڭ باسشىلىعىمەن ماراپاتتاۋعا ۇسىنىلاتىن بولادى»، - دەپ اتاپ ءوتتى دەپارتامەنتتىڭ باسپا ءسوز قىزمەتىنەن.