قازاقستاندىق فيلم الەمدىك كينوفەستيۆالدەردە 50-گە جۋىق جۇلدەگە يە بولىپ ۇلگەرگەن
«قازاقفيلم» كينوستۋدياسى العاشقى اتاۋى «پريچال» بولعان «پودسولنۋح» ءفيلمىنىڭ ءتۇسىرىلىمىن 2019 جىلى اياقتادى، الايدا پاندەميا سالدارىنان بۇگىنگە دەيىن تۇساۋى كەسىلمەگەن كارتينا ءتۇرلى فەستيۆالدەرگە ۇسىنىلعان. ەلي گيلماننىڭ دراماسى 27 حالىقارالىق كينوفەستيۆالدە ءتۇرلى نوميناسيالار بويىنشا 47 جۇلدە جينادى. كينوكارتينا ق ر مادەنيەت جانە سپورت مينيسترلىگىنىڭ تاپسىرىسى بويىنشا تۇسىرىلگەن.
«پودسولنۋح» - اتا-انا اراسىنداعى تۇسىنىسپەۋشىلىك سالدارىنان كۇيزەلىسكە ۇشىراعان وتباسى ومىرىنەن سىر شەرتەتىن دراماعا تولى شىعارما. اكە-شەشەسى ءوز سۇراقتارىنا جاۋاپ ىزدەپ جۇرگەندە قاراۋسىز قالعان بالا ۇيدە دە، تۇزدە (مەكتەپتە) دە ورنىن تاپپاي، كەمسىتۋ مەن قورلىقتىڭ بار ازابىن تارتادى. ءقاۋىپسىز مەكەن ىزدەگەن ءامىر كومپيۋتەر ويىندارىنىڭ اسەرلى الەمىنە ەنىپ، ءوزىنىڭ قالاي ويىنقۇمارعا اينالعانىن بايقامايدى.
رەجيسسەردىڭ ايتۋىنشا، «كۇنباعىستىڭ» نەگىزگى يدەياسى – ادامدار اراسىنداعى قاراپايىم قارىم-قاتىناستىڭ ماڭىزدىلىعى، ونىڭ بۇگىنگى كۇنى جەتىسپەۋشىلگى. الەۋمەتتىك قىسىم، جالعىزدىق، بەلگىسىزدىكتەن قاشۋ تاقىرىپتارى بارلىق مادەني لاندشافتتاردا قيىلىسادى. مۇنىڭ ءوزى فيلم يدەيالارىن ادامدار ءۇشىن وزەكتى ەتەدى. ءبىزدىڭ كوپشىلىگىمىزگە جاناشىرلىق، تۇسىنىستىك، مەيىرىمى جەتىسپەي جاتادى، سوندىقتان بۇل يدەيالار ۇلتتىق دەڭگەيدەن اسىپ، ادامزاتتىڭ ماسەلەلەرىن كوتەرەدى.
«بۇل پروبلەما بارلىق وتباسىلارعا ءتان دەر ەدىم. مەنىڭ ءوزىم انا رەتىندە وسىنداي سىناقتان ءوتىپ، ىشتەي تىنعان بالاما ءسوزىمدى جەتكىزە الماعان شاقتاردى باستان كەشىرمەسەم، بۇل كارتينا تۋماس تا ەدى... ولار بۇگىن كورسەتىلىمگە كەلۋ كەرەك ەدى. وكىنىشكە وراي، كەلمەدى. ءبىز فيلم تيترلارىندا بالانىڭ اتىن جازبادىق، ءبىراق باستى كەيىپكەر – ومىردەن وتكەن جەتكەنشەكتىڭ ءپروتوتيپى. ءتىپتى، باس اكتەردى تاڭداعاندا دا سول بالانىڭ كەلبەتىنە ۇقساس ادامدى ىزدەدىم. كارتينانى اتالعان وتباسىعا ارنايمىن»، - دەدى رەجيسسەر ەلي گيلمان.
سەنارييىن راسۋل شىبىنتاي جازعان فيلمدەگى باستى ءرولدى جاس اكتەر راشيد مۋسين ويناسا، ونىڭ اناسىن سەربيادان كەلگەن اكتريسا سلوبودا ميچالوۆيچ سومدادى. ودان بولەك، تۇسىرىلىمگە تانىمال اكتەر كيريلل كيارو قاتىستى.
«وقۋشىلار اراسىنداي مۇنداي وقيعالار ءجيى ورىن الادى. دوستارىمىزدىڭ اراسىندا وسى ماسەلەنى ۇنەمى كوتەرەمىز. سەبەبى، بۇل تەك بالاعا عانا ەمەس، اتا-اناعا، ءتىپتى، بار قوعامعا قاتىسى بار پروبلەما. فيلمدەگى كەيبىر كادرلاردىڭ نازاربايەۆ مەكتەبىندە ءتۇسىرىلۋى دە ءبىر سيمۆوليكالىق ءمانى بار كەزدەيسوقتىق سياقتى»، - دەدى راشيد.
«پودسولنۋح» ءفيلمى كەلەسى جىلدىڭ ءساۋىر ايىندا لونگ-پروكات تۇرىندە جۇرەتىنىن ەسكەرتەمىز. ياعني، لونگ – دەگەنىمىز ۇزاق مەرزىمدى كورسەتىلىم بولاتىنىن بىلدىرەدى. ارا-تۇرا كينوتەاترلاردىڭ افيشاسىنا ءىلىنىپ، كورسەتىلىپ تۇرادى. قالاعان ۋاقىتىڭىزدا بارىپ، تاماشالاي الاسىز.