ەكولوگيا جانە قورشاعان ورتا باسقارماسى بيىل ناۋرىز ايىندا سايران، قاراسۋ جانە اۋەجاي وزەندەرىن مەحانيكالىق تازارتۋ جۇمىستارىنا كىرىستى. سۋ قويمالارىنىڭ ءتۇبىن قۇرعاتۋ ءۇشىن ولاردى سۋمەن قامتاماسىز ەتەتىن ەسەنتاي، ۇلكەن جانە كىشى الماتى وزەندەرىنىڭ اعىسى توقتاتىلدى، دەپ حابارلايدى اlmaty-akshamy.kz.
سايران سۋ قويماسىنىڭ ءتۇبى سوڭعى 50 جىلدان بەرى العاش رەت تازارتىلۋدا. قوقىس پەن لايدان تازالاۋ جۇمىستارىنا 4 ەكسكاۆاتور مەن 30 ساموسۆال جۇمىلدىرىلدى. جوبالىق اۋدانى 60 گا قۇرايتىن اۋماقتان 140 مىڭ م3-تان استام قوقىس پەن لاي شىعارىلدى. تازارتۋ جۇمىستارىن جاقىن كۇندەرى اياقتاۋ جوسپارلانعان.
ماۋسىم ايىنىڭ سوڭىنا دەيىن ەسەنتاي وزەنىنىڭ ءال-فارابي داڭعىلىنان شيەۆچەنكو كوشەسىنە دەيىنگى بولىگىن مەحانيكالىق تازارتۋدى اياقتاۋ جوسپارلانۋدا. سونىمەن قاتار، ەسەنتاي وزەنىنىڭ ءال-فارابي داڭعىلىنان رىسقۇلوۆ داڭعىلىنا دەيىنگى ارالىعىنداعى كەيبىر بولىكتەرىنە كۇردەلى جوندەۋ جۇرگىزۋ ءۇشىن جوبالىق سمەتالىق قۇجاتتاما ازىرلەۋگە بيۋدجەتتىك ءوتىنىش بەرىلدى.
بۇگىندە ۇلكەن الماتى وزەنىنىڭ №1 تۇندىرعىشتان اباي داڭعىلىنا دەيىنگى بولىگىن اينالاسىن اباتتاندىرۋ جانە رەكونسترۋكسيالاۋ جۇمىستارى ازىرلەنۋدە. وزەن ارناسىن تازارتۋ جۇمىستارى قاراستىرىلعان جوبا مەملەكەتتىك ساراپتامادان وتۋدە.
سونداي-اق، ۇلكەن الماتى وزەنىنىڭ №1 تۇندىرعىشتان اباي داڭعىلىنا دەيىنگى بولىگىن، ەسەنتاي وزەنىنىڭ ءال-فارابي داڭعىلىنان تومەن كەيبىر بولىكتەرىن، ەسەنتاي وزەنىنىڭ “دوروجنيك” شاعىناۋدانى مەن وندىرىستىك بازا ماڭىنداعى بولىكتەرى، كىشى الماتى وزەنىنىڭ ءال-فارابي داڭعىلىنان ساتبايەۆ كوشەسىنە دەيىنگى اباتتاندىرىلعان بولىگىن سانيتارلىق تازارتۋ، كۇتىپ ۇستاۋ جۇمىستارى جۇرگىزىلىپ جاتىر.
جالپى، الماتى قالاسىنىڭ اۋماعىندا 109 اعىندى سۋ بار، ونىڭ ىشىندە ءىرى 49 وزەننىڭ جالپى ۇزىندىعى 447 كم قۇرايدى. ەسكە سالا كەتەيىك، بىلتىر الماتىدا جالپى ۇزىندىعى 14 كم قۇرايتىن وزەن جاعالاۋى بەكىتىلىپ، اباتتاندىرىلعان بولاتىن. سوڭعى جىلدارى ۇزىندىعى 206 كم قۇرايتىن جاعالاۋدى بەكىتۋ جۇمىستارى جۇرگىزىلدى، ەندى تاعى 127،7 كم جاعالاۋ بەكىتۋدى قاجەت ەتەدى.