17 ناۋرىز كۇنى اباي اتىنداعى قازاق ۇلتتىق وپەرا جانە بالەت تەاترىندا بي ونەرىنىڭ جانكۇيەرلەرى ىستىق ىقىلاسپەن قارسى العان «لازگي. جان مەن ماحاببات ءبيى» بالەتىنىڭ قويىلىمى ءوتتى. قويىلىمدى «وزبەكستاننىڭ ۇلتتىق بالەتى» ترۋپپاسى ۇسىندى.
كەشتىڭ قۇرمەتتى قوناقتارى قاتارىندا قازاقستان رەسپۋبليكاسى مەملەكەتتىك كەڭەسشىسى ەرلان قارين، وزبەكستان رەسپۋبليكاسى پرەزيدەنتىنىڭ ءبىرىنشى كومەكشىسى سايدا ميرزيويەۆا، قازاقستان رەسپۋبليكاسىنىڭ مادەنيەت جانە اقپارات ءمينيسترى ايدا بالايەۆا، الماتى قالاسىنىڭ اكىمى ەربولات دوسايەۆ بولدى.
تاشكەنتتەن الماتىعا دەيىن
بالەتتىڭ تۇساۋكەسەرى 2021 جىلى تاشكەنتتە ءوتتى. حالىقارالىق پرەمەراسى دۋباي وپەرا ساحناسىندا قويىلىپ، كەيىن پاريج، لوندون، ماسكەۋ، بەيجىڭ، باكۋ جانە ستامبۋل قالالارىندا كورسەتىلدى.
بەلگىلى نەمىس حورەوگرافى جانە بالەتمەيستەرى راۋل رايموندو رەبەك قويعان بۇل ەرەكشە قويىلىم لازگي بيىنە ارنالعان. بۇل ەجەلگى حالىق ءبيى يۋنەسكو-نىڭ ادامزاتتىڭ ماتەريالدىق ەمەس مادەني مۇراسىنىڭ ءبىر بولىگى رەتىندە مويىندالعان. ءۇش مىڭ جىلدىق تاريحى بار بۇل بي حالىقتىڭ دانالىعى مەن ۇلتتىق داستۇرلەرىنىڭ رۋحىن بەينەلەيدى. كۇردەلى قيمىلداردىڭ، ەرەكشە ءستيلدىڭ جانە قۋاتتى ەنەرگەتيكانىڭ ۇيلەسۋى بۇل ءبيدى ناعىز مادەني فەنومەنگە اينالدىرادى.
قويىلىم كورەرمەندەردى ۇلى جىبەك جولى بويىمەن ورتالىق ازيانى كەسىپ وتكەن كەرۋەندەر زامانىنداعى الىس وتكەن شاققا جەتەلەيدى. ءشول دالانىڭ اپتاپ ىستىعىندا، شاماندىق اۋەندەردىڭ سيقىرلى ىرعاعىمەن ماحاببات دۇنيەگە كەلىپ، ماڭگىلىك جان ءوزىنىڭ شەكسىز ءبيىن باستايدى. بۇل جول – وتكەننەن بۇگىنگە دەيىنگى كوپعاسىرلىق داستۇرلەر مەن حالىق رۋحىنىڭ ۇرپاقتان-ۇرپاققا جالعاسۋىن بەينەلەيدى.
كەلەسى قويىلىم – استانادا
بالەت وزبەكستاننىڭ مادەنيەت جانە ونەردى دامىتۋ قورىنىڭ (ACDF) قولداۋىمەن ۇيىمداستىرىلدى. كەلەسى قويىلىم 27 ناۋرىز كۇنى «استانا وپەرا» تەاترىندا وتەدى.
شىعارماشىلىق توپ:
يدەيا اۆتورى: سايدا ميرزيويەۆا
جوبا جەتەكشىسى: گايانە ۋمەروۆا
ليبرەتتو جانە حورەوگرافيا: راۋل رايموندو رەبەك
سەنوگرافيا: يوكو سەياما
كوستيۋم ديزاينەرى: فرول بۋريمسكيي
مۋزىكالىق وڭدەۋ جانە كومپوزيسيا: ديەۆيدسون دجاكونەللو
جارىق قويۋشى سۋرەتشى: تيم ۆاسلاۆەك
كەڭەسشىلەر: گۇلنورا مۋسايەۆا جانە گاۆحار ماتياكۋبوۆا