الماتىدا وتكىزۋ مۇمكىندىگى 2 ەسە كەڭەيتىلگەن سۋ وتكىزگىش قۇبىرلار ورناتىلادى

102 اۋماق جانە 12 ىستەن شىققان كوللەكتور انىقتالدى

الماتىدا سۋ تاسۋ ماسەلەسىن شەشۋ ءۇشىن كەشەندى جۇمىستار جۇرگىزىلۋدە. سۋدىڭ جايىلۋىنان كوبىرەك زارداپ شەككەن 56 اۋماقتا اپاتتىق-قالپىنا كەلتىرۋ جۇمىستارى باستالدى، دەپ حابارلايدى Almaty-akshamy.kz.

رايىمبەك داڭعىلىنىڭ سولتۇستىك بولىگىنە ديامەترى 1 مەترلىك 2 سۋ وتكىزگىش قۇبىر ورناتىلدى، بۇل ياسساۋي مەن ب.مومىش ۇلى كوشەلەرىنەن كەلەتىن ەرىگەن سۋدى وتكىزەدى.  وسى اۋماقتا، رايىمبەك داڭعىلىنىڭ  جولدى ءبولۋ جولاعىندا قابىلداعىش كامەرالار ورناتىلادى. سونداي-اق ياسساۋي كوشەسىنىڭ قۇبىر وتكىزگىشى بۇرىننان بار سۋ وتكىزگىش كوللەكتورعا جالعانادى، ال ب.مومىش ۇلى كوشەسىنىڭ قۇبىر وتكىزگىشى بۇرىننان بار رايىمبەك-مومىش ۇلى ايرىق جۇيەسىنىڭ وتكىزگىشىنە قوسىلادى. 
ەكولوگيا جانە قورشاعان ورتا باسقارماسىنىڭ ماماندارىنىڭ ايتۋىنشا، بۇگىندە قالا بويىنشا  ديامەترى 500 مم-لىك سۋ وتكىزگىش قۇبىرلار بار، بۇلار قالاداعى سۋ اعىنىنا توتەپ بەرە المايدى. سوندىقتان دا سۋدىڭ وتكىزگىشتىگىن قامتاماسىز ەتۋ ءۇشىن ديامەترى 1 مەترلىك قۇبىر وتكىزگىشتەر ورناتىلۋدا. وسىلايشا قالاداعى قۇبىرلاردىڭ سۋ وتكىزگىشتىگى 2 ەسەگە ۇلعايادى. 

«قالا باسشىسىنىڭ تاپسىرماسى بويىنشا ءبىزدىڭ باسقارما الماتىنىڭ سۋ جايىلاتىن ايماقتارىنا مونيتورينگ جاسادى. ناتيجەسىندە 102 اۋماق جانە 12 ىستەن شىققان كوللەكتور انىقتالدى. سولاردىڭ ىشىندە 56 اۋماق سۋدىڭ جايىلۋىنان قاتتى زارداپ شەگەتىنىن، سوندىقتان تەز ارادا بيىلدان قالدىرماي اپاتتىق قالپىنا كەلتىرۋ جۇمىستارى قاجەت ەكەنى انىقتالدى»، دەدى الماتى قالاسى ەكولوگيا جانە قورشاعان ورتا باسقارماسىنىڭ  ستراتەگيالىق دامۋ ءبولىمىنىڭ جەتەكشىسى مۇرات جەكسەمبايەۆ.

سونداي-اق مونيتورينگ بارىسىندا 12 كوللەكتورعا تازالاۋ مەن قالپىنا كەلتىرۋ جۇمىستارى قاجەت ەكەنى جانە 4 سۋ وتكىزگىش كانال  سالۋ قاجەتتىلىگى انىقتالدى. بۇگىندە قالادا ەمسوۆ پەن رىسقۇلوۆ داڭعىلىنىڭ تومەن جاعىنداعى سۋ وتكىزگىش قۇبىرلاردى قالپىنا كەلتىرۋ جۇمىستارى جۇرگىزىلۋدە. وسى اۋماقتاعى جۇمىستار 20 كۇن بويى جۇرەدى.