فەستيۆالدىڭ ءتۇرلى باعدارلامالارىنا ەلۋ فيلم قاتىسقان.
الماتىدا حVI حالىقارالىق «ەۋرازيا» كينوفەستيۆالىنىڭ جابىلۋ سالتاناتى ءوتتى، دەپ حابارلايدى Almaty-akshamy.kz.
وتكەن اپتادا «ەۋرازيا» كورەرمەندەرى مەن قاتىسۋشىلارى 25 ەلدىڭ كينوكارتينالارىن تاماشالادى. بارلىق كورسەتىلىمدەر انشلاگپەن ءوتتى. فەستيۆالدىڭ ءتۇرلى باعدارلامالارىنا ەلۋ فيلم قاتىسقان، ونىڭ ۇشەۋى – الەمدىك پرەمەرالار («ارۋ ەلەنا»، «بوران» جانە «اۋىل» فيلمدەرى).
سونداي-اق «مەنى يۆانسىز جەرلەمەڭدەر» ءفيلمىنىڭ حالىقارالىق پرەمەراسى ءوتتى. ەكى ازيالىق پرەمەرا بولدى. اتاپ ايتقاندا، «ءمارمارداي سۋىق» جانە «قۇدايدىڭ شاقىرۋى» كارتينالارى. سونداي-اق كورەرمەندەر ءوز ەلدەرىنەن «وسكار» سىيلىعىنا ۇسىنىلعان ءتورت كارتينانى جانە «ازيا وسكارىنىڭ» (Asia Pacific Screen Awards) يەگەرى «ەسىمدە» ءفيلمىن كوردى.
فەستيۆال اياسىندا شەبەرلىك ساباقتارى، قازاقستاندىق رەجيسسەرلەردىڭ جاڭا فيلمدەرىنىڭ تۇساۋكەسەرىن قامتىعان work-in-progress باعدارلامالارى ءوتتى. ون ءتورت باسپا ءسوز كونفەرەنسياسى جانە «قازاق كينوسىن دامىتۋ ۆەكتورلارى» اتتى دوڭگەلەك ۇستەل ۇيىمداستىرىلدى. فەستيۆال قوناقتارى تاقىرىپتىق كەشتەرگە قاتىستى. فەستيۆال تاريحىندا تۇڭعىش رەت «ەۋرازيا» تەليەۆيزيالىق كۇندەلىكتەرى بىردەن ەلىمىزدىڭ ەكى تەلەارناسىندا كورسەتىلدى.
ءوز كەزەگىندە فەستيۆالدىڭ قازىلار القاسى كينوكورسەتىلىمدەردى قورىتىندىلاپ، بىرنەشە نوميناسيالار بويىنشا كونكۋرستىق باعدارلامالاردىڭ جەڭىمپازدارىن انىقتادى.
ەستەرىڭىزگە سالا كەتسەك، فەستيۆالدىڭ اشىلۋ سالتاناتىندا «ورتالىق ازيا كينەماتوگرافىنىڭ دامۋىنا قوسقان ۇلەسى ءۇشىن» ارنايى جۇلدەسىن اتاقتى وزبەك رەجيسسەرى الي حامرايەۆ جەڭىپ العان بولاتىن. ول وسى فەستيۆالدە حالىقارالىق بايقاۋدىڭ قازىلار القاسىن باسقاردى. ءوز كەزەگىندە «قازاق كينەماتوگرافىنا قوسقان ۇلەسى ءۇشىن» ارنايى سىيلىعىن مادەنيەتتانۋشى جانە قوعام قايراتكەرى مۇرات اۋەزوۆ الدى.
سالتاناتتى شارا جەڭىمپاز ءفيلمنىڭ كورسەتىلىمىمەن اياقتالدى.