الماتىدا وتكەن ءبىلىم فورۋمىندا جەكەمەنشىك مەكتەپتەرگە دە باسىمدىق بەرۋ جايى ايتىلدى

بۇگىن الماتىدا  «ءبىلىمدى ۇلت: بىلىمگە ۇمتىلۋ، ەڭبەكسۇيگىشتىك جانە پاتريوتيزم» اتتى فورۋم ءوتىپ جاتىر، دەپ حابارلايدى Almaty-akshamy.kz قازاقپاراتقا سىلتەمە جاساپ.

وعان 23 مىڭ ۇستاز قاتىسىپ جاتىر.

ءداستۇرلى جيىنعا وقۋ-اعارتۋ ءمينيسترى اسحات ايماعامبەتوۆ، الماتى قالاسىنىڭ اكىمى ەربولات دوسايەۆ، سينگاپۋر مۇعالىمدەر وداعىنىڭ باس حاتشىسى مايك تيرۋمان، حەلسينكي قالاسى ءبىلىم دەپارتامەنتىنىڭ قىزمەتتەردى دامىتۋ ءبولىمىنىڭ باسشىسى مارە كيللونەن، ءبىلىم بەرۋ سالاسىنداعى قازاقستاندىق جانە شەتەلدىك ساراپشىلار، مۇعالىمدەر جانە اتا-انالار قاۋىمداستىعىنىڭ 23 مىڭنان استام وكىلى قاتىسىپ جاتىر.

فورۋمنىڭ ماقساتى – ءبىلىم بەرۋ ساپاسىن ارتتىرۋ بويىنشا ناقتى كەيستەردى تالقىلاۋ ءۇشىن ديالوگ الاڭىن ۇسىنۋ، قالانىڭ ءبىلىم بەرۋ جۇمىسىنىڭ جۇيەسىن جاقسارتۋ ءۇشىن پراكتيكالىق تاجىريبەمەن الماسۋ. الماتى اكىمى ەربولات دوسيەۆتىڭ ايتۋىنشا، بۇگىنگى كۇنى جەكەمەنشىك مەكتەپتەردىڭ الەۋەتى زور.

«بۇگىنگى تاڭدا بالالاردىڭ تالانتىن دامىتۋعا مۇمكىندىك تۋدى. الماتى قالاسىندا شىعارماشىلىققا، سيفرلى تەحنولوگياعا، يننوۆاسياعا باعىتتالعان مەكتەپتەر بار. ولاردىڭ ناتيجەسى وتە جاقسى. جاڭا وقۋ جىلىندا ەكى جەكەمەنشىك مەكتەپ اشىلادى. مىسالى، ماسكەۋدە مەكتەپتەردىڭ ۇشتەن ءبىر بولىگى - جەكەمەنشىك. الماتىدا دا سولاي بولۋ كەرەك دەپ ويلايمىن. ساپالى ءبىلىم - جاس ۇرپاقتىڭ بولاشاعى»،- دەدى ەربولات دوسايەۆ.

وقۋ-اعارتۋ ءمينيسترى اسحات ايماعامبەتوۆ الداعى ۋاقىتتا جەكەمەنشىك مەكتەپتەر تەگىن وقۋلىقپەن قامتاماسىز ەتىلەتىنىن ايتتى.

«ءقازىر جەكەمەنشىك مەكتەپتەردىڭ باسىم بولىگى قوسىمشا قارجى المايدى، سەبەبى جەكەمەنشىك ءبىلىم ورشاقتارىنا جان باسىنا شاققانداعى قارجىلاندىرۋ جۇيەسى ەنگىزىلگەن. سوندىقتان اتالعان مەكتەپتەر وقۋلىقپەن قامتاماسىز ەتىلۋى ءتيىس. سونىمەن قاتار، كۋرس ماسەلەسى تۋىنداپ وتىر. مينيسترلىك الداعى ۋاقىتتا ءتيىمدى شەشىم قابىلدايتىن بولادى»،- دەدى مينيستر.

سونداي-اق وتىرىس بارىسىندا الداعى وقۋ جىلىندا قالا مەكتەپتەرىندە ءبىلىم بەرۋ ساپاسىن ارتتىرۋ جولدارى تالقىلاندى.