وتباسىلىق-تۇرمىستىق كۇش كورسەتۋ ءۇشىن جاۋاپكەرشىلىكتىڭ كۇشەيگەنى تۋرالى وڭىرلىك كوممۋنيكاسيالار قىزمەتىنىڭ الاڭىندا الماتى قالاسى پوليسيا دەپارتامەنتىنىڭ جەرگىلىكتى پوليسيا قىزمەتى باسقارماسى باسشىسىنىڭ ورىنباسارى دياس دۋانبەكوۆ ايتتى، دەپ حابارلايدى Almaty-akshamy.kz
الماتىنىڭ ءتارتىپ ساقشىلارى وتباسىلىق-تۇرمىستىق قارىم-قاتىناس سالاسىنداعى قۇقىقبۇزۋشىلىقتاردى تۇراقتاندىرۋ مەن جاقسارتۋعا باعىتتالعان جۇمىستاردى جۇرگىزەدى. 2023 جىلدىڭ 5 ايىنىڭ قورىتىندىسى بويىنشا تۇرمىستاعى قۇقىق بۇزۋشىلىقتاردىڭ ۇلەسى بارلىق تىركەلگەن قۇقىق بۇزۋشىلىقتاردىڭ 0،05 پايىزىن قۇرادى. وتباسىلىق-تۇرمىستىق سالاداعى قۇقىق بۇزۋشىلىقتار 2،6 ەسەگە (14-تەن 6-عا دەيىن) ازايعان.
دياس دۋانبەكوۆتىڭ ايتۋىنشا، تۇرمىس بارىسىندا كەزدەسەتىن قىلمىستىڭ نەگىزگى ءتۇرى – ادام ءولتىرۋ جانە دەنە جاراقاتىن سالۋ. مۇنداي اۋىر قىلمىستار ەرلى-زايىپتىلار اراسىندا – 2 جاعداي، بىرگە تۇراتىندار اراسىندا – 2، جاقىن تۋىستار اراسىندا – 2 وقيعا تىركەلگەن. كوبىنەسە قىلمىستار الكوگولدىك ىشىمدىك تۇتىنۋ سالدارىنان، قىزعانىش پەن ۇرىس-كەرىستەن كەيىن ورىن الادى.
«وتباسىلىق-تۇرمىستىق ومىردە كەزدەسەتىن قىلمىستىق جاعدايلاردى شەكتەۋدىڭ ءبىر جولى - قۇقىق بۇزۋشىلىق جاساعانداردى پروفيلاكتيكالىق ەسەپكە الۋ جانە ولاردى اكىمشىلىك جاۋاپكەرشىلىككە تارتۋ بولىپ تابىلادى. وسىلايشا وتكەن مەرزىمدە وتباسى-تۇرمىستىق قاتىناستار سالاسىندا 1362 ادامعا قاتىستى ءىس قوزعالدى، 2023 جىلدىڭ 5 ايىندا 3141 ادام پروفيلاكتيكالىق ەسەپكە الىندى، ونىڭ ىشىندە 2782-نە قورعاۋ نۇسقاماسى شىعارىلدى جانە 359 تۇلعانىڭ مىنەز-قۇلقىنا ەرەكشە تالاپتار قويىلدى»، - دەدى د.دۋانبەكوۆ.
پوليسەيدىڭ ايتۋىنشا، تۇرمىستىق زورلىق-زومبىلىقتىڭ نەگىزگى سەبەبى – ىشىمدىككە سالىنۋ مەن جۇمىسسىزدىق. ماس كۇيدە جاسالاتىن قىلمىستاردىڭ الدىن الۋ ماقساتىندا 5 ايدىڭ قورىتىندىسى بويىنشا 101 ادام ءماجبۇرلى تۇردە ەمدەۋگە جىبەرىلدى. الكوگولدى ساتۋ ەرەجەلەرىن بۇزعانى ءۇشىن 199 اكىمشىلىك ءىس سوتقا جولداندى.
وتباسىلىق-تۇرمىستىق قاتىناستار سالاسىنداعى قۇقىقبۇزۋشىلىق ارەكەتتەردىڭ الدىن الۋ ماقساتىندا قالالىق پوليسيا دەپارتامەنتىنىڭ جەرگىلىكتى پوليسيا قىزمەتى باسقارماسىنىڭ باستاماسىمەن اعىمداعى جىلدىڭ 15-17 اقپانى جانە بيىلعى 27-29 ناۋرىز ارالىعىندا تۇرمىستىق زورلىق-زومبىلىقتىڭ الدىن الۋعا باعىتتالعان «تۇرمىس» جەدەل-الدىن الۋ شارالارى ەكى رەت وتكىزىلدى.
وسىلايشا، تۇرمىستىق زورلىق-زومبىلىقتىڭ الدىن الۋ جانە جولىن كەسۋ، ولاردىڭ پوليسياعا سەنىمىن ارتتىرۋ، وتباسىنىڭ قوعامداعى ءرولىن نىعايتۋ، وتباسى-تۇرمىستىق قاتىناستار سالاسىنداعى قۇقىق بۇزۋشىلىقتاردى بولدىرماۋ ماقساتىندا بيىل مامىردىڭ 16-سى مەن 18ء-ى ارالىعىندا قالا اۋماعىندا الماتى قالاسى، پد جپقب باستاماسىمەن «زورلىق-زومبىلىقسىز وتباسى» قالالىق اكسياسى وتكىزىلدى. اتالعان اكسيانىڭ ماقساتى – وتباسىلىق-تۇرمىستىق قاتىناستار سالاسىنداعى زاڭسىز ارەكەتتەردىڭ الدىن الۋ، قىلمىستاردىڭ جولىن كەسۋ، ايەلدەر مەن بالالارعا قاتىستى تۇرمىستىق زورلىق-زومبىلىقتىڭ الدىن الۋ.