قالا كۇنى وتباسىلىق دەمالىس ساياباعى تانىستىرىلدى.
الماتىدا تۇرعىندار سەرۋەندەي الاتىن، كوڭىل كوتەرەتىن، دەمالاتىن جانە سپورتپەن اينالىساتىن قوعامدىق كەڭىستىكتەردى جاقسارتۋعا كوپ كوڭىل بولىنەدى. قالا كۇنى وتباسىلىق دەمالىس ساياباعى تانىستىرىلدى، دەپ حابارلايدى اlmaty-akshamy.kz.
الماتى قالاسىنىڭ اكىمى باقىتجان ساعىنتايەۆ جوبامەن تانىستى. ناۋرىزباي اۋدانى اكىمدىگىنىڭ جانىنداعى 4،56 گا اۋماقتا ەسكى ساياباقتىڭ ورنىنا جاڭا ساياباق سالىنادى.
مۇندا تەك اۋداننىڭ عانا ەمەس، بۇكىل قالا تۇرعىندارى وتباسىمەن جانە دوستارىمەن ۋاقىت وتكىزۋگە، جاڭا اتتراكسيوندارعا مىنۋگە، اللەيالاردا سەرۋەندەۋگە جانە تازا اۋادا تاماقتانۋعا كەلەتىن بولادى. ساياباقتا 44 اتتراكسيون مەن 4 فۋدكورت بولادى.
بالالار باتۋتتا سەكىرە الادى، ۆيرتۋالدى شىندىق الەمىنە ەنەدى، ءۇشىنشى قيىندىق دەڭگەيىندەگى ارقان جولىنان وتەدى، لابيرينتتەن شىعۋدىڭ جولىن تابادى، ءوزىنىڭ Lego ءۇيىن سالادى جانە، ارينە، تۋعان كۇنىن تويلاي الادى.
ساياباقتىڭ بىرەگەي تۇجىرىمداماسىنىڭ ناتيجەسىندە ونىڭ بارلىق قوناقتارى جاسىنا قاراماستان كوڭىل كوتەرە الادى. Alem Park – بۇل جاي عانا ساياباق ەمەس، ءتۇرلى-تۇستى شابىندىقتارى، ساۋلەتتىك قۇرىلىمدارى، ارقان ساياباعى، الپينيستىك قابىرعا، جايلى كافەلەر مەن باسقا دا كوپتەگەن ويىن-ساۋىقتارى بار تۇتاس قالا.
ساياباقتىڭ نەگىزگى يدەياسى – كوركەم تابيعات لاندشافتىن زاماناۋي ويىن-ساۋىق تەحنولوگيالارىمەن ۇيلەستىرۋ، مۇندا بالالار مەن ەرەسەكتەر ءۇشىن دەمالىس پەن ويىن-ساۋىق بىرىكتىرىلەدى. ءار ءتۇرلى ماستەر-كلاسستار، وتباسىلىق جارىستار، بالالار كەشتەرى، انيماتورلاردىڭ قاتىسۋىمەن اشىق اۋادا ويىندار وتەدى.
ايتا كەتەرلىگى، ساياباققا 500-گە جۋىق اعاش وتىرعىزىلادى. وسى جوبانى جۇزەگە اسىرۋدىڭ ارقاسىندا الماتىدا جاڭا ۇلكەن دەمالىس جانە ويىن-ساۋىق ساياباعى پايدا بولادى، ول تۇرعىنداردىڭ جينالاتىن ورنىنا اينالادى، الماتىلىقتاردىڭ جايلى تۇرۋى مەن دەمالىسىن قامتاماسىز ەتەدى.
