وعان قاتىسۋعا 100-گە جۋىق الماتىلىق كومپانيا ءوتىنىم بەردى.
بۇگىن الماتىدا «قازاقستاننىڭ ۇزدىك تاۋارى» اتتى وتاندىق وندىرۋشىلەردىڭ كورمەسى باستالدى، دەپ حابارلايدى Almaty-akshamy.kz «اتامەكەن» ۇكپ باسپا ءسوز قىزمەتىنە سىلتەمە جاساپ.
وڭىرلىك كورمە-بايقاۋ ءۇش نوميناسيا بويىنشا وتەدى: «وندىرىستىك ماقساتتاعى ۇزدىك تاۋارلار»، «حالىققا ارنالعان ۇزدىك تاۋارلار»، «ۇزدىك ازىق-تۇلىك تاۋارلارى». ءار نوميناسيادا ءۇش جەڭىمپاز انىقتالادى.
شاراعا الماتى قالاسىنىڭ اكىمدىگى، ەلشىلىكتەر مەن كونسۋلدىقتار، مەملەكەتتىك ورگاندار، ءبىلىم بەرۋ ۇيىمدارى، قوعامدىق ۇيىمداردىڭ وكىلدەرى قاتىسىپ جاتىر.
«بۇگىن ءبىز الماتى بيزنەسى ءۇشىن ايتۋلى شاراعا جينالدىق. بۇگىنگى كورمە «قازاقستاندا جاسالعان» ءوندىرىستىڭ، تۇتاستاي ەكونوميكا دامۋىنىڭ ناقتى كورسەتكىشى. وتاندىق ءوندىرىس توڭىرەگىندە كوپ سىن ايتىلادى. ءتىپتى جەرگىلىكتى ءوندىرىس جوق دەيتىندەر بار. مەنىڭ ايتارىم، ءوندىرىس سالاسى جىلدان جىلعا ءوسىپ، دامىپ كەلەدى. وسى باستامالاردى پالاتا، مەملەكەت، قوعام رەتىندە بىرلەسىپ، قولداۋ كورسەتىپ قانا ىلگەرىلەتە الامىز. اركەز، مۇمكىندىگىنشە وتاندىق ءونىمدى تاڭدايىق! بارلىق قاتىسۋشىعا ساتتىلىك تىلەيمىن»، – دەپ اتاپ ءوتتى اشىلۋ سالتاناتىندا الماتى قالاسى كاسىپكەرلەر پالاتاسىنىڭ ديرەكتورى ايتۋار قوشمامبەتوۆ.
كورمەگە قاتىسىپ جاتقان الماتىلىق وندىرۋشىلەر ساۋدا، قىزمەت كورسەتۋ، ماشينا جاساۋ، مەتاللۋرگيا، تاماق ونەركاسىبى، جەڭىل ونەركاسىپ سالالارىندا ەڭبەك ەتەدى.
الماتىدا 2022 جىلعى 1 قاڭتارداعى جاعداي بويىنشا تىركەلگەن شاعىن جانە ورتا كاسىپكەرلىك سۋبەكتىلەرىنىڭ سانى 295 861 بىرلىكتى قۇرادى. 2022 جىلعى قاڭتار-ناۋرىزدا وتكەن جىلدىڭ ءتيىستى ەزەڭىمەن سالىستىرعاندا ءونىم شىعارۋ (سالىستىرمالى باعالاردا) 28،5%-عا ۇلعايدى، جۇمىسپەن قامتىلعاندار سانى 17،4%-عا ءوستى جانە جۇمىس ىستەپ تۇرعان سۋبەكتىلەردىڭ سانى 2022 جىلعى 1 ساۋىردە 10،6%-عا ءوستى.
2022 جىلعى قاڭتار-ناۋرىزدا شاعىن جانە ورتا كاسىپكەرلىك سۋبەكتىلەرىنىڭ ءونىم شىعارۋى 2854،6 ملرد تەڭگەنى قۇرادى. شوك سۋبەكتىلەرىنىڭ جالپى سانىندا جەكە كاسىپكەرلەردىڭ ۇلەسى 61%، شاعىن كاسىپكەرلىكتىڭ زاڭدى تۇلعالارى 38،1%، ورتا كاسىپكەرلىكتىڭ زاڭدى تۇلعالارى 0،3%، شارۋا نەمەسە فەرمەر قوجالىقتارى 0،6% قۇرادى.
بۇگىن كورمە اياسىندا الماتىلىق ءسان سالاسىنداعى ديزاينەرلەر ءسان شەرۋىن وتكىزدى. قوناقتار اراسىندا سىيلىقتار ۇتىسى ويناتىلدى. الماتىدا «قازاقستاننىڭ ۇزدىك تاۋارى» وڭىرلىك كورمە-بايقاۋى 29،30،31 شىلدە وتەدى.
30 شىلدەدە KASE بيرجا قورى، «دامۋ» كاسىپكەرلىكتى دامىتۋ» قورىنىڭ وكىلدەرى كاسىپكەرلەرگە ارنالعان قولداۋ، مەملەكەتتىك باعدارلامالار جايىندا اقپارات بەرىپ، شەبەرلىك ساباقتارىن وتكىزەدى. قوناقتار اراسىندا سىيلىق ۇتىسى ويناتىلادى.
ال 31 شىلدە كورمە-بايقاۋدىڭ جەڭىمپازدارى انىقتالىپ، ماراپاتتاۋ ءراسىمى ۇيىمداستىرىلادى. وڭىرلىك ىرىكتەۋ جەڭىمپازدارى ەلوردادا قازاقستان رەسپۋبليكاسى پرەزيدەنتىنىڭ قاتىسۋىمەن وتەتىن رەسپۋبليكالىق بايقاۋعا جولداما الادى. كورمەنىڭ سوڭعى كۇنى كونسەرتتىك باعدارلاما ۇيىمداستىرىلادى.