رەجيسسەر ايجان قاسىمبەكتىڭ «وت» كارتيناسىنىڭ پرەمەراسى بولدى
كورسەتىلىم «باستاۋ» ءىح حالىقارالىق ستۋدەنتتىك جانە دەبيۋتتىك فيلمدەر كينوفەستيۆالى اياسىندا ءوتتى، دەپ حابارلايدى Almaty-akshamy.kz 24kz-كە سىلتەمە جاساپ.
ءفيلمنىڭ الەمدىك پرەمەراسى وسى جىلى پۋسانداعى حالىقارالىق كينوفەستيۆالدە وتكەن بولاتىن. باسقا دا بايقاۋلارعا قاتىسىپ، ولجالى ورالىپ ءجۇر.
«وت» كارتيناسى قازاقستاندىق قاراپايىم وتباسى جايىندا. وتاعاسى ەل قاتارلى تىرشىلىك ەتىپ، اراسىندا نەسيە دە الىپ تۇرادى. كۇندەردىڭ كۇنىندە ءجاسوسپىرىم قىزىنىڭ جۇكتى بولىپ قالعانىن ەستيدى.
«مەنىڭ كەيىپكەرىم نان تاسۋشى بولىپ ىستەيدى. وزدەرى پاتەر جالداپ تۇرادى. بانكتەن العان نەسيەسى دە بار. وسىلاي كۇنەلتىپ جۇرگەن جان. وسىنداي قيىن جاعدايعا قاراماستان، مەنىڭ كەيىپكەرىم ادامدىق اردان اتتامايدى. ءون بويىنان ماحاببات، مەيىرىمدىلىك، ادالدىق پەن ادىلدىك ءبىلىنىپ تۇرادى»، - دەيدى اكتەر تولەپبەرگەن بايساقالوۆ
تۋىندى شەتەلدىك كورەرمەننىڭ ءىلتيپاتىنا بولەنىپ ءجۇر. پۋساننان كەيىن گەرمانيا مەن سينگاپۋردا كورسەتىلدى. ال باستى ءرولدى ويناعان تولەپبەرگەن بايساقالوۆ X Russian British Sochi International Film Festival & Awards 2021 جانە لوس-اندجەلەستەگى Asian World Film Festival-دە ەكى ماراپاتتى جەڭىپ الدى. ال مينسكىدە وتكەن حالىقارالىق «ءلىستاپاد» كينوبايقاۋىندا كارتينا «ۇزدىك رەجيسسەر» جانە «ۇزدىك مۋزىكا» نوميناسيالارى بويىنشا جۇلدەگە يە بولدى.
«بۇل جانۇيا وسىنداي قيىندىققا قالاي تاپ بولدى، ونى قالاي شەشەدى، وسىنى كورسەتكىمىز كەلدى. ءبىرىنشى ورىنعا وتباسى جانە كومەك ۇعىمدارىن شىعاردىق. سەبەبى قاربالاس تىرشىلىكپەن ءجۇرىپ، قاسىمىزداعى جاندارعا كوڭىل بولمەي كەتەمىز. وسىنى ەستەن شىعارماساق دەيمىن»،- دەدى «وت» ءفيلمىنىڭ رەجيسسەرى ايجان قاسىمبەك.
«باستاۋ» حالىقارالىق كينوفەستيۆالى اياسىندا قوعامعا وي سالاتىن كارتينالاردى كورەرمەنگە ۇسىنۋ يگى داستۇرگە اينالىپ وتىر. بيىلعى ستۋدەنتتىك جانە دەبيۋتتىك فيلمدەر بايقاۋىنا 80 تۋىندى ىرىكتەلىپ الىنعان. ولار 4 جەلتوقسانعا دەيىن «Chaplin Cinemas» كينوتەاترلار جەلىسىندە تەگىن كورسەتىلەدى.