الماتىدا وسىدان ەكى اپتا بۇرىن تاكسي جۇرگىزۋشىسىنە شابۋىلداعان قاراقشىلار ۇستالدى

اۋىر قىلمىس ەكى اپتا بۇرىن تۇركسىب اۋدانىندا ورىن العان.

تاكسي جۇرگىزۋشىسىنە بىرنەشە جەردەن پىشاق سۇققان ءۇش كۇدىكتى قولعا ءتۇستى، دەپ حابارلايدى Almaty-akshamy.kz Polisia.kz-كە سىلتەمە جاساپ.

«ءۇش ەر ادام بيزنەس-كلاستاعى تاكسيگە تاپسىرىس بەرىپ، جۇرگىزۋشىدەن ولاردى اۋەجايعا جەتكىزىپ تاستاۋىن سۇراعان. الايدا جولدا جولاۋشىلار تاكسي جۇرگىزۋشىسىنە شابۋىل جاساپ، وعان كوپتەگەن پىشاق جاراقاتىن سالعان. شابۋىلدىڭ ناتيجەسىندە قاسكويلەر Toyota Camry كولىگىن يەمدەنگەن. اتالعان قىلمىستى اشۋ ماقساتىندا جەدەل ىزدەستىرۋ توبى قۇرىلىپ، ونىڭ قۇرامىنا كريمينالدىق پوليسيا جانە تۇركسىب اۋداندىق پب-نىڭ قىزمەتكەرلەرى كىردى. كۇدىكتىلەر دەرەۋ انىقتالدى. ولار جاسىرىنۋعا تىرىسقان. الايدا ءقازىر كۇدىكتىلەر ۇستالدى جانە قاماۋعا الىندى. قىلمىسكەرلەر باسقا بىرەۋدىڭ كولىگىن كادەگە جاراتا المادى. شەتەلدىك كولىك يەسىنە قايتارىلدى»، – دەدى الماتى قالالىق پوليسيا دەپارتامەنتى باستىعىنىڭ ورىنباسارى بەرىك ابىلبەكوۆ.

ءقازىر ۇستالعانداردىڭ باسقا دا قىلمىستارعا قاتىسى بار-جوعى تەكسەرىلۋدە. ولار – 1993، 1998 جانە 2000 جىلى تۋعان الماتى وبلىسى تالعار اۋدانىنىڭ تۇرعىندارى.

«ماعان شابۋىل جاساعان ادامداردىڭ ۇستالعانى تۋرالى حابارلاعاندا، شىنىمدى ايتسام، قاتتى قۋاندىم. پوليسيا قىزمەتكەرلەرىنە كاسىبي قىزمەتى ءۇشىن العىس ايتامىن»، — دەدى قاراقشىلاردىڭ قولىنان جاپا شەككەن الماتىلىق.