ماماندار قالا تۇرعىندارىن تەمەكىنى قۇرعاق شوپكە تاستاماۋعا شاقىردى.
الماتىدا ىلە الاتاۋى ۇلتتىق تابيعي پاركىندە وت تۇتاتقان 27 جاستاعى ەر ادام ۇستالدى. ءتارتىپ بۇزۋشىعا 145 مىڭ تەڭگە كولەمىندە ايىپپۇل سالىندى. قالادا ورتكە قارسى رەجيم ەنگىزىلگەنى تۋرالى وڭىرلىك كوممۋنيكاسيالار قىزمەتىندە وتكەن بريفينگتە قالالىق تجد باستىعىنىڭ ورىنباسارى، ازاماتتىق قورعاۋ پولكوۆنيگى سامات اساينوۆ مالىمدەدى، دەپ حابارلايدى Almaty-akshamy.kz.
سامات اساينوۆتىڭ ايتۋىنشا، الماتىدا ءورتتىڭ ءقاۋىپتى كەزەڭى ناۋرىز ايىندا باستالىپ، ادەتتە قازان ايىنا دەيىن سوزىلادى. وسى ۋاقىتتا تجد قۇرامى كۇشەيتىلگەن تارتىپتە قىزمەت اتقارادى. تابيعي ءورتتىڭ الدىن الۋ بويىنشا مونيتورينگ جۇرگىزىلەدى.
«بيىل شىلدە ايىندا اۋا رايى قۇبىلمالى بولدى. كۇن قاتتى ىسىدى. ازداپ جاۋعان جاۋىن-شاشىننان اۋا تەمپەراتۋراسى تومەندەگەن جوق. اسىرەسە، بۇل تاۋلى ايماققا قاتىستى. الايدا ۋاقىتىلى قابىلدانعان شارالاردىڭ ارقاسىندا ءورتتىڭ الدىن الدىق. ءورتتىڭ ءقاۋىپتى كەزەڭى باستالعاننان بەرى 193 اعاش ورتەندى. بيىل قۇرعاق ءشوپتىڭ جانۋى 14،3%- عا، قۇرعاق وسىمدىكتەردىڭ جانۋى 55،2%-عا ازايدى»، – دەدى الماتى تجد باستىعىنىڭ ورىنباسارى.
بۇعان دەيىن كوكتەمدە جەرگىلىكتى اتقارۋشى ورگانداردىڭ قاتىسۋىمەن اۋقىمدى جۇمىس باستالعان. اۋدان اكىمدىكتەرى جالپى اۋدانى 153،7 گا قۇرعاق ءشوپتى تازالاۋ جۇمىستارىن باستادى. جەر جىرتىلىپ، ۇزىندىعى 75،57 كم مينەرالدى جولاقتار جاڭارتىلدى.
سونداي-اق سامات اساينوۆ الماتى قالاسى تجد مەن پوليسيا قىزمەتكەرلەرىنەن قۇرالعان ءموبيلدى توپتىڭ جۇمىسىنا توقتالدى. بۇل قىزمەتكە ورمان شارۋاشىلىعى مەكەمەلەرىنىڭ قىزمەتكەرلەرى قول ۇشىن سوزىپ، ەرىكتىلەر دە قاتىستى. بۇل توپتار ءورت تۋىنداۋى ىقتيمال دەگەن «ىستىق» ايماقتاردى تەكسەرەدى.
«موبيلدىك توپتار 82 بىرلەسكەن رەيد جۇرگىزدى. دەمالۋشىلارعا تۇسىندىرمە جۇمىستارىن جۇرگىزدى. وت تۇتاتقان 235 جاعدايعا توسقاۋىل بولىپ، 200 جەكە تۇلعانى اكىمشىلىك جاۋاپكەرشىلىككە تارتتى. ونىڭ ىشىندە ءۇش ادام اكىمشىلىك كودەكستىڭ 367-بابى بويىنشا جاۋاپكەرشىلىككە تارتىلىپ، جالپى سوماسى 437 550 تەڭگە كولەمىندە ايىپپۇل سالىندى. قالعان ءتارتىپ بۇزۋشىلارعا قاتىستى ەسكەرتۋ جاسالدى»، – دەدى سامات اساينوۆ.
تج دەپارتامەنتىنىڭ وكىلى جىل سايىن وتكىزىلەتىن الدىن الۋ شارالارىنىڭ ارقاسىندا سوڭعى 9 جىلدا تاۋلى جانە ورماندى جەرلەردە، ورمان-ساياباق ايماقتارىندا ورتكە جول بەرىلمەگەنىن ايتتى.
«بارلىق قۇتقارۋشىلار تاۋلار مەن ورمانداردا ءقاۋىپسىز ءجۇرىس-تۇرىس مادەنيەتىن ساقتاعانى ءۇشىن قۋاناتىنىن ايتقىم كەلەدى. تابيعاتتا اشىق وتتىڭ جاعىلۋىنا جول بەرمەۋ وتە ماڭىزدى. قۇرعاق ءشوپ پەن قوقىستى ورتەمەڭىز. قۇرعاق ءشوپتى ادەيى ورتەيتىن ادامدار جاقىن ايماقتى تازارتۋ ءۇشىن ءقاۋىپ توندىرەدى. مىسالى، جەكە اۋلانىڭ يەلەرى مەن باعباندار ىستىق كۇننەن كەۋىپ قالعان ءشوپ پەن قوقىستى ورتەپ جىبەرەدى»، – دەدى سامات اساينوۆ.
پولكوۆنيك قالا تۇرعىندارىنا وت جاعۋ فاكتىلەرى قاتاڭ تۇردە توقتاتىلاتىنىن ەسكەرتتى. ويتكەنى قۇرعاقشىلىق پەن ىستىق اۋا رايىندا ءشوپ تەز تۇتانادى، بۇل ورتكە ۇلاسۋى مۇمكىن. سونداي-اق، ول وڭتۇستىك استانانىڭ تۇرعىندارى مەن قوناقتارىنان تەمەكىنى قۇرعاق شوپكە تاستاماۋدى، بوتەلكە، سىنعان شىنى قالدىرماۋدى سۇرادى.
ءورت قاۋىپسىزدىگى ەرەجەلەرىن بۇزعانى ءۇشىن كىنالى ادامدار بۇزۋشىلىقتىڭ سيپاتى مەن كەلتىرىلگەن زالالعا بايلانىستى اكىمشىلىك جانە قىلمىستىق جاۋاپكەرشىلىككە تارتىلۋى مۇمكىن ەكەنىن ەستە ۇستاعان ءجون.
الماتى قالاسى تجد باستىعىنىڭ ورىنباسارى الماتى تۇرعىندارىنا «قازگيدرومەتتىڭ» الدىن الا مالىمەتتەرى بويىنشا، شىلدە ايىنىڭ ەكىنشى جارتىسىندا جانە تامىز ايىندا مەگاپوليس اۋماعىندا ازداعان جاۋىن-شاشىن، سونداي-اق اۋا تەمپەراتۋراسىنىڭ كەي جەرلەردە 40 گرادۋسقا دەيىن كوتەرىلۋى كۇتىلەتىنىن ايتتى.
وسى ۋاقىتتا الماتى قالاسى اكىمدىگىنىڭ، «قازاۋەقۇتقارۋ» جانە «قازاۋەورمانقورعاۋ» رمقك بارلىق قۇتقارۋ قىزمەتتەرى جاۋىنگەرلىك ازىرلىكتە بولادى.