«ورتالىق ازيا جانە بۇۇ بىتىمگەرلىگى: اعىمداعى قىزمەت جانە پەرسپەكتيۆالار».
وسى تاقىرىپتا قورعانىس مينيسترلىگى بىتىمگەرلىك وپەراسيالار ورتالىعىندا وڭىرلىك دوڭگەلەك ۇستەل ءوتتى، دەپ حابارلايدى Almaty-akshamy.kz.
قورعانىس مينيسترلىگىنىڭ مالىمەتىنشە، بۇۇ-نىڭ حالىقارالىق بىتىمگەرلەر كۇنىنە ورايلاستىرىلعان ءىس-شارا قازاقستان مەن تاجىكستان قورعانىس ۆەدومستۆولارىنىڭ، بىرىككەن ۇلتتار ۇيىمىنىڭ، «بۇۇ-ايەلدەر» قۇرىلىمى كەڭسەسىنىڭ، حالىقارالىق قىزىل كرەست كوميتەتىنىڭ جانە وتاندىق جوعارى وقۋ ورىندارىنىڭ وكىلدەرىن جينادى.
وتىرىسقا قاتىسۋشىلار ورتالىق ازيا ەلدەرىنىڭ بەيبىتشىلىكتى نىعايتۋ ىسىنە قوسقان ۇلەسىن اتاپ ءوتتى، سونداي-اق حالىقارالىق گۋمانيتارلىق قۇقىق جانە بىتىمگەرلىكتىڭ گەندەرلىك اسپەكتىلەرى ماسەلەلەرىن تالقىلادى.
قورعانىس مينيسترلىگى بىتىمگەرلىك وپەراسيالار ورتالىعىنىڭ باستىعى پولكوۆنيك باۋىرجان نىعمەتۋللين بىتىمگەرلىك كونتينگەنتىن ءوز بەتىنشە ورىستەتۋ، اسكەري قىزمەتشىلەردى بىتىمگەرلىك جانە تىلدىك دايىنداۋ تاجىريبەسىن ورتالىق ازيا ەلدەرىندەگى ارىپتەستەرىمەن بولىسۋگە دايىن ەكەنىن جەتكىزدى.
– ءبىز ورتالىق ازيا ەلدەرىنىڭ بىتىمگەرلىك الەۋەتىن كۇشەيتۋ اياسىندا بۇۇ ميسسيالارى ءۇشىن ساراپشىلاردى دايىنداۋدا جانە بىرلەسكەن باستامالاردى ىسكە اسىرۋدا كۇش-جىگەرىمىزدى بىرىكتىرە الامىز، – دەپ اتاپ ءوتتى ول.
بىرىككەن ۇلتتار ۇيىمىنىڭ نيۋ-يوركتەگى باس كەڭسەسىنىڭ بىتىمگەرلىك وپەراسيالار دەپارتامەنتىنىڭ وكىلى گەربەرت لورەت قازاقستاننىڭ بىتىمگەرلىك وپەراسيالارعا قاتىسۋ ءۇشىن ءوز كونتينگەنتتەرىن جىبەرەتىن ەلدەرمەن ءوزارا ءىس-قيمىل جاساۋداعى قىزمەتىن وڭ باعالادى. ول ءىس-شارا ورتالىق ازيا وڭىرىندە ءبىلىم مەن تاجىريبە الماسۋ، دايىندىق تۇرعىسىنان سەرىكتەستىك قارىم-قاتىناس ورناتۋعا ىقپال ەتەتىنىنە سەنىم ءبىلدىردى.
بۇگىندە بىتىمگەرلىك وپەراسيالار ورتالىعى وڭىردەگى بىرەگەي الاڭ بولا وتىرىپ، اسكەري قىزمەتشىلەردى بۇۇ ميسسيالارىنا قاتىسۋعا وقىتۋ مەن دايىنداۋداعى تاسىلدەردى جەتىلدىرۋ مەن تۇرلەندىرۋ بويىنشا ۇنەمى جۇمىس ىستەپ كەلەدى.
ورتالىق بازاسىندا ءارتۇرلى ەلدەردىڭ تىڭداۋشىلارىنىڭ قاتىسۋىمەن بىرىككەن ۇلتتار ۇيىمى سەرتيفيكاتتاعان كۋرستار وتكىزىلىپ تۇرادى. ۋنيۆەرسيتەتتەرمەن تىعىز ىنتىماقتاستىقتا حالىقارالىق گۋمانيتارلىق قۇقىقتى زەردەلەۋ ۇيىمداستىرىلىپ، ستۋدەنتتەرگە بىتىمگەرلىك تاقىرىبى بويىنشا كۋرستار وتكىزىلەدى.
ايتا كەتۋ كەرەك، قازاقستان بۇۇ-نىڭ بىتىمگەرلىك وپەراسيالارىنا قاتىسۋ كوكجيەگىن ۇنەمى كەڭەيتىپ كەلەدى. ەلىمىز اسكەري قىزمەتشىلەردى نەپالداعى، كوت-د ' يۆۋارداعى جانە ماليدەگى بۇۇ ميسسيالارىنا جىبەردى. قازىرگى ۋاقىتتا ءبىزدىڭ بىتىمگەرلەر ليۆاندا، باتىس ساحارادا، ورتالىق افريكا رەسپۋبليكاسىندا جانە كونگو دەموكراتيالىق رەسپۋبليكاسىنداعى ميسسيالاردا قىزمەت ەتەدى.
سونداي-اق، بۇۇ-نىڭ گولان جوتالارىنداعى ميسسياسىنا العاشقى تاۋەلسىز بىتىمگەرلىك كونتينگەنت ورنالاستىرىلدى. بۇل تاريحي قادام ەلىمىزدىڭ ىنتىماقتاستىققا، بەيبىتشىلىك پەن جاھاندىق قاۋىپسىزدىكتى ساقتاۋعا دەگەن ۇمتىلىسىن كورسەتتى.