ەكى جاسار مۇگەدەك قىز بالا مەن ءبىر جانۇيا تۇتاس امان قالدى
الماتىدا ءورت سوندىرۋشىلەر 2 جاسار مۇگەدەك بالانى ورتتەن قۇتكارىپ قالدى. بۇل تۋرالى بەلگىلى قازاقستاندىق سپورتشى، ارالاس جەكپە-جەك شەبەرى ارداق نازاروۆ ءوزىنىڭ الەۋمەتتىك پاراقشاسىندا جازدى، دەپ حابارلايدى Almaty-akshamy.kz قازاقپاراتقا سىلتەمە جاساپ.
سپورتشى بوستاندىق اۋدانىنىڭ ءورت سوندىرۋشىلەرىنە ارناپ جازبا قالدىردى.
ايتۋىنشا، ولاردىڭ جەدەل ءىس-قيمىلدارىنىڭ ارقاسىندا ەكى جاسار مۇگەدەك قىز بالا مەن ءبىر جانۇيا تۇتاس امان قالدى.
«سپورت زالعا كىرىپ ءبىر ساعاتتاي جاتتىعىپ شىققانىمىزشا قاسىمىزداعى پاتەر ورتەنىپ، ءبىزدىڭ ءورت ءسوندىرۋشى باتىرلارىمىز وتتى تولىق ءسوندىرىپ، ەكى جاسار مۇگەدەك بالانى جانە ءبىر جانۇيانى قۇتقارىپ قالىپتى. ءورت شىققان پاتەردەگى ازاماتتار، ىسقا تۇنشىققاننان با، ۇيىقتاي بەرگەن. ەگەر ءورت ءسوندىرۋشى باتىرلارىمىز كەلمەسە، ەكى جانۇيا قايعىلى جاعدايعا ۇشىرار ما ەدى ؟ ەكى جاسار مۇگەدەك بالانى ورتتەن امان الىپ شىققان جىگىت الماتى قالاسى، بوستاندىق اۋدانىنىڭ ءورت ءسوندىرۋشى مامانى ءادىل ەركىن ۇلى. باستارىن بايگەگە تىككەن باتىر جىگىتتەردىڭ ەڭبەگى باعالانسا ەكەن»،- دەپ جازدى ول Instagram پاراقشاسىندا.
قالالىق تجد باسپا ءسوز قىزمەتىنىڭ حابارلاۋىنشا، توتەنشە جاعداي 24 قاراشا كۇنى ساعات 10:31-دە بوستاندىق اۋدانى، كەكىلباي ۇلى كوشەسى، 129/3 مەكەنجايى بويىنشا ورنالاسقان ۇيدە بولعان.
ءورت سوندىرۋشىلەر وقيعا ورنىنا 6 مينۋتتا جەتكەن.
بەلگىلى بولعانداي، 3ء-شى قاباتتاعى پاتەرلەردىڭ ءبىرىنىڭ بالكونىنان شىققان ءورت بولمەگە تاراپ ۇلگەرگەن.
«ۋلى قارا ءتۇتىن تۇرعىنداردى ەۆاكۋاسيالاۋ جولدارىن بوگەپ تاستادى. قىزىل جالىن جوعارعى قاباتتاعى پاتەرگە تارالۋ ءقاۋپىن تۋدىردى. پاتەردە كىشكەنتاي بالا قالىپ قالعانى تۋرالى اقپارات كەلىپ ءتۇستى. بارلاۋ جۇرگىزۋ بارىسىندا ءموس-1 ءورت ءسوندىرۋشى-قۇتقارۋشىسى ءادىل داۋرەنقۇلوۆ قولدا بار تىنىس الۋ ورگاندارىن قورعاۋ قۇرالدارىن پايدالانا وتىرىپ، ءتورتىنشى قاباتتاعى پاتەردەن ەكى جاسار قىزدى شىعاردى. جەدەل جاردەم بريگاداسى قاراپ تەكسەرگەننەن كەيىن ءبۇلدىرشىن اتا-اناسىنا امان-ەسەن تابىستالدى»،- دەپ حابارلادى ۆەدومستۆودان.