الماتىدا ءورت ءسوندىرۋ تۇتىكتەرىن ۇرلاۋ جيىلەگەن

وسى ىسكە قاتىسى بار ادام ءوزىنىڭ 10 ۇرلىق جاساعانىن مويىنداعان. 

مەدەۋ اۋدانىنىڭ پوليسيا قىزمەتكەرلەرى 27 جاستاعى تاراز قالاسىنىڭ تۇرعىنىن ۇستادى، دەپ حابارلايدى Almaty-akshamy.kz Polisia.kz-كە سىلتەمە جاساپ. 

«سوتقا دەيىنگى تەرگەۋ بارىسىندا، ويىن اۆتوماتتارىن جاقسى كورەتىن جاس جىگىت اسا ءىرى كولەمدەگى اقشاسىنان ۇتىلىپ، زاڭسىز بايۋ ماقساتىندا قالانىڭ ءارتۇرلى اۋدانىندا ورنالاسقان تۇرعىن ءۇي كەشەندەرىندە ءورت ءسوندىرۋ تۇتىكتەرىن ۇرلاعاندىعى بەلگىلى بولدى. قاسكوي يىعىندا ۇلكەن سومكەمەن ازىق-تۇلىك جەتكىزۋشىنىڭ اتىن جامىلىپ، كىرەبەرىستەرگە كىردى جانە كۇدىك تۋدىرمادى. ول ەتاجداردا ءورت قالقاندارىن اشىپ، سول جەردەن تۇتىكتەردى الىپ كەتتى. قازىرگى ۋاقىتتا ا. ەسىمدى ازامات ءوز كىناسىن جانە 10 ۇرلىق جاساعانىن مويىندادى. بۇل قىلمىستار زاتتاي ايعاقتاردىڭ بولۋىمەن، كىرەبەرىستەگى كامەرالارداعى بەينە جازبالاردىڭ بولۋىمەن، سونداي-اق ۇرلانعان مۇلىكتى ساتىپ الۋشىنىڭ ايعاقتارىمەن دالەلدەنىپ وتىر»، – دەدى مەدەۋ اۋداندىق پب-نا قاراستى پوليسيا ءبولىمىنىڭ باستىعى ءابدىنۇر تاسىبايەۆ.

بەلگىلى بولعانداي، جەڭىل اقشاعا قۇمار ازامات قالانىڭ المالى، مەدەۋ جانە بوستاندىق اۋداندارىندا ارەكەت ەتكەن. كۇدىكتى قاماۋعا الىندى.