باسپا ءسوز تۋردىڭ بارىسىندا «مەدەۋ» مەملەكەتتىك وڭىرلىك تابيعي پاركىنىڭ اۋماعىندا ورمان ورتتەرىن ەرتە انىقتاۋ جۇيەسىنىڭ ىسكە قوسىلۋى تۋرالى ەكولوگيا جانە قورشاعان ورتا باسقارماسىنىڭ وكىلدەرى باياندادى، دەپ حابارلايدى almaty-akshamy.kz.
ورمان ورتتەرىن ەرتە انىقتاۋ جۇيەسى – بۇل ورمان مونيتورينگىنە ارنالعان باعدارلامالىق-اپپاراتتىق كەشەن، ول شۇعىل تۇردە شارالاردى قابىلداۋعا جانە ءورت قاۋىپتىلىگى جوعارى ماۋسىمىندا ورمان ورتتەرىنەن بولاتىن زالالدى ايتارلىقتاي ازايتۋعا مۇمكىندىك بەرەدى.
بۇل جۇيە اعىمداعى جىلى «مەدەۋ» ءموتپ كمم-نىڭ تاپسىرىسىمەن «بايلانىس تەلەكوم ەند تەحنولودجي» ج ش س مەردىگەرلىك ۇيىمىمەن ورناتىلدى. جابدىق ەكى بولىكتەن تۇرادى:
1. اپپاراتتىق – باسقارىلاتىن باقىلاۋ داچيكتەرىنىڭ (بەينەكامەرالاردىڭ) جەلىسى؛
2. باعدارلامالىق – ارنايى باعدارلامالىق جاساقتاما، ونىڭ كومەگىمەن ورمانعا جاسالىناتىن مونيتورينگ ناقتى ۋاقىتىندا جۇزەگە اسىرىلادى، ءورتتىڭ كوورديناتى ۋاقتىلى انىقتالادى.
مامانداردىڭ ايتۋىنشا، ءورتتى انىقتاۋ تاۋلىك بويى 360 گرادۋسقا قارايتىن جانە 30 كم-گە دەيىنگى راديۋستا جاعدايدى تىركەيتىن بەينەباقىلاۋ كامەرالارىنىڭ كومەگىمەن جۇزەگە اسىرىلادى، اۋماعى 10 مىڭ گەكتارعا دەيىن جەتەدى. جۇيەنىڭ قۇرامىندا تەپلوۆيزوردىڭ جانە سەزىمتالدىعى جوعارى بەينەكامەرانىڭ بولۋى ونى ءتىپتى تولىق قاراڭعىلىقتا دا ءتيىمدى ەتەدى.
«بەينەباقىلاۋ كامەرالارى 3 ۋچاسكەدە - شىمبۇلاق، مەدەۋ جانە بۋتاكوۆ شاتقالىندا ورنالاسقان انتەننا – دىڭگەك قۇرىلىستارىندا ورناتىلعان. بەينەباقىلاۋ جۇيەلەرىنەن اقپارات «مەدەۋ» ءموتپ جانىنداعى جەدەل باسقارۋ ورتالىعىنا ءتيىستى بايلانىس ارنالارى ارقىلى كەلىپ تۇسەدى، بۇدان ءارى اقپارات شۇعىل قىزمەتتەرگە ۋاقتىلى ارەكەت ەتۋ ءۇشىن ءبىرىڭعاي بەينەمونيتورينگ جۇيەسىنە بەرىلەدى»، - دەدى الماتى قالاسى ەكولوگيا جانە قورشاعان ورتا باسقارماسى باسشىسىنىڭ ورىنباسارى ميراس گايسين.
«مەملەكەت باسشىسى ورمانداردا ۆيدەومونيتورينگ جۇيەسىن ەنگىزۋگە قاتىستى تاپسىرما بەرگەن بولاتىن. وسى تاپسىرما اياسىندا «مەدەۋ» ساياباعىندا تجد داعدارىس جاعدايىن جەدەل باسقارۋى، بولعان جاعدايلارعا دەر كەزىندە نازار اۋدارۋى جانە تجد قۇرىلعىلارىن جىبەرۋگە قاتىستى مونيتورينگ جۇرگىزۋ ءۇشىن ۆيدەوكامەرالار ورناتىلعان ەدى»، - دەپ ءسوزىن تولىقتىردى الماتى قالاسى تجد مەملەكەتتىك ءورت باقىلاۋ باسقارماسى باستىعىنىڭ ورىنباسارى ەركەبۇلان جۇماتايەۆ.
ءورتتى ەرتە انىقتاۋ جۇيەسىنىڭ جۇمىسىن تەكسەرۋ ءۇشىن سىناق رەجيمىندە جاساندى ورتەۋ جۇرگىزىلدى. ناتيجەسىندە جۇيە ءتۇتىندى بىردەن بايقادى، ونىڭ ناقتى كوورديناتتارى مەن ۋاقىتىن انىقتادى.