جىل سايىن جاڭا جىلدىق مەرەكە كۇندەرى الماتى قالاسىندا جولاۋشىلار اعىنى ايتارلىقتاي تومەندەيدى. مىسالى، 2022-2023 جج. جاڭا جىلدىق دەمالىس كۇندەرى كولىك حولدينگىنىڭ مالىمەتىنشە، جولاۋشىلار اعىنى كۇنىنە 300 مىڭ ادامدى قۇرادى، ال جۇمىس كۇندەرى بۇل كورسەتكىش 1،5 ملن ادامعا جەتەدى.
الداعى مەرەكە كۇندەرى الماتىدا قوعامدىق كولىك كەلەسى كەستە بويىنشا جۇمىس ىستەيتىن بولادى:
• 2023 جىلعى 30 جانە 31 جەلتوقساندا جانە 2024 جىلعى 2 قاڭتاردا – شتاتتىق رەجيمدە ساعات 23:00-گە دەيىن، جەلىدە جىلجىمالى قۇرامنىڭ 80% - ى جۇرەتىن بولادى؛
• 2024 جىلعى 1 قاڭتاردا جولاۋشىلار اعىنىنىڭ ايتارلىقتاي تومەندەۋى كۇتىلۋدە، وسىعان بايلانىستى اۆتوبۋستاردىڭ 50% جەلىگە شىعارىلاتىن بولادى.
«مەدەۋگە» دەيىن جۇرەتىن №12 مارشرۋت جىلجىمالى قۇرامنىڭ 20 بىرلىگى جەلىگە شىعا وتىرىپ، دەمالىس كۇنىنىڭ كەستەسى بويىنشا ساعات 23:30-عا دەيىن شتاتتىق رەجيمدە جۇمىس ىستەيتىن بولادى. №3 تۇنگى مارشرۋتتىڭ جۇمىسى وزگەرىسسىز قالادى.
الماتى مەتروپوليتەنى دەمالىس كۇنىنىڭ كەستەسى بويىنشا ساعات 06:20-دان 00:00-گە دەيىن جۇمىس جاسايتىن بولادى، قوزعالىس ارالىعى 12 مينۋتقا دەيىن.