بۇل تۋرالى شاھاردىڭ باس يمامى تولەبي وسپان ايتتى
يمامنىڭ ايتۋىنشا، الماتى مەشىتتەرىندە قاسيەتتى رامازان ايىنا ارنالعان جوسپار بەكىتىلدى، دەپ حابارلايدى Almaty-akshamy.kz
«بيىل قالاداعى 52 مەشىتتىڭ 47-سىندە تاراۋىق نامازىندا قۇران حاتىم تۇسىرىلەدى. قالعان 5 مەشىتتە تاراۋىق نامازى قۇران حاتىمسىز وقىلادى. رامازان - قۇران ايى. سوندىقتان وسى ايدا قالا مەشىتتەرىندە قۇران الىپپەسى مەن ناماز ۇيرەتۋ كۋرستارى قارقىندى جۇرگىزىلەدى»، - دەدى الماتى قالاسىنىڭ باس يمامى تولەبي وسپان.
سونىمەن قاتار، ول الماتى ورتالىق مەشىتىندە «رامازان شاتىرى» قۇرىلىپ، كۇندەلىكتى 500 كىسىگە اۋىزاشار داستارحانى جايىلاتىنىن جەتكىزدى. قالانىڭ باسقا دا مەشىتتەرىندە اۋىزاشار بەرىلەدى. اۋىزاشار بەرگىسى كەلەتىن كىسىلەر مەشىتتەردەگى جاۋاپتى ادامدارعا جولىعۋلارىنا بولادى.
«ورازانىڭ العاشقى كۇنى جۇرتشىلىققا ورازا ايىنىڭ كەلگەنىن ءسۇيىنشى سۇراۋ ماقساتىندا «قوش كەلدىڭ، رامازان!» ايدارىمەن قالا كوشەلەرىندە 100 مىڭ دانا سۋ مەن قۇرما تاراتىلادى. بۇل شاراعا يمامدار باستاعان جاستار جاماعاتى مەن بلوگەرلەر جۇمىلدىرىلادى. سونىمەن قاتار «جاقىنىڭا سىيلىق سىيلا» جانە «جاراپازان» ەستافەتالارى ۇيىمداستىرىلادى»، - دەدى تولەبي وسپان.