راديوەلەكترونيكا جانە بايلانىس اسكەري-ينجەنەرلىك ينستيتۋتىنىڭ اقپاراتتىق-ناسيحاتتاۋ توبى تۇركسىب اۋدانىنداعى № 78 مەكتەپ-گيمنازياسىنىڭ جوعارى سىنىپ وقۋشىلارىمەن كەزدەستى.
اسكەري ءبىلىم بەرەتىن مەكەمەلەردىڭ وكىلدەرى وقۋشىلارعا ق ر قارۋلى كۇشتەرىندە قىزمەت ەتۋ پەرسپەكتيۆالارى تۋرالى اڭگىمەلەپ بەردى. ولاردى جوعارى وقۋ ورنىنىڭ تاريحىمەن، وقۋعا ءتۇسۋ ەرەجەلەرىمەن جانە اسكەري ينستيتۋتتا وقۋ شارتتارىمەن تانىستىردى، دەپ حابارلايدى Almaty-akshamy.kz ق ر قورعانىس مينيسترلىگىنە سىلتەمە جاساپ.
«كەزدەسۋ قىزىق ءوتتى. بىزگە ءومىرىن كۇردەلى، ءبىراق اسا ماڭىزدى ميسسياعا – وتاندى قورعاۋعا ارناعان اسكەري ادامداردىڭ باتىلدىعى مەن ەرلىگى تۋرالى ايتىلدى. ءوز ءومىرىمدى وسىنداي اسىل ماماندىقتى ۇيرەنۋگە ارنايمىن دەپ شەشىم قابىلدادىم»، – دەدى «جاس سارباز» سىنىبىنىڭ تاربيەلەنۋشىسى شىڭعىسحان الىمبەكوۆ.
وقۋشىلارعا بەينەماتەريالدار كورسەتىلىپ، اقپاراتتىق بۋكلەتتەر تاراتىلدى.
ينستيتۋت باستىعىنىڭ تاربيە جانە يدەولوگيالىق جۇمىس جونىندەگى ورىنباسارى پولكوۆنيك مەدعات مادراحيموۆ مۇنداي ءىس-شارالار كۋرسانتتاردى ىرىكتەۋ ساپاسىن ارتتىرۋعا ىقپال ەتەتىنىن اتاپ ءوتتى.
راديوەلەكترونيكا جانە بايلانىس اسكەري-ينجەنەرلىك ينستيتۋتى «اسكەري ىستەگى راديوتەحنيكا جانە ينجينيرينگ»، «اسكەري ىستەگى راديوەلەكترونيكا جانە ينجينيرينگ»، «اسكەري ىستەگى اۆتوماتتاندىرۋ جانە ينفوكوممۋنيكاسيالىق تەحنولوگيالار»، «اسكەري ىستەگى اقپاراتتىق قاۋىپسىزدىك جۇيەلەرى»، «اسكەري ىستەگى ديريجەرلەۋ»، «اسكەري ىستەگى جۋرناليستيكا جانە قوعاممەن بايلانىس»، «اسكەري قۇرىلىس، عيماراتتار مەن قۇرىلىستاردى پايدالانۋ» ماماندىقتارى بويىنشا وفيسەرلەر دايىندايتىنىن ەستەرىڭىزگە سالا كەتەيىك.