الماتىدا وقۋ ورنىنىڭ جاتاقحاناسى جەكە كاسىپكەرگە قىزمەت ەتىپ كەلگەن

بۇعان دەيىن ول جەردە مەيرامحانا مەن كەڭسەلەر بولعان.

ەندى ۋنيۆەرسيتەت يەلىگىنە قايتارىلعان 300 ورىندىق جاتاقحانا ستۋدەنتتەردىڭ يگىلىگىنە جارايدى، دەپ حابارلايدى Almaty-akshamy.kz

الماتىداعى قازاق ۇلتتىق اگرارلىق زەرتتەۋ ۋنيۆەرسيتەتى وسىعان دەيىن جەكە كاسىپكەرگە قىزمەت ەتىپ كەلگەن جاتاقحانانى ءوز يەلىگىنە قايتاردى.

ۋنيۆەرسيتەت بيۋدجەتىنەن 160 ملن تەڭگە ءبولىنىپ كۇردەلى جوندەۋ جاسالدى. ستۋدەنت پەن ماگيسترلەردىڭ جايلى ءومىر ءسۇرۋى ءۇشىن قاجەتتى تۇرمىستىق تەحنيكامەن جابدىقتالعان. ايتا كەتەيىك، ءبىلىم ورداسى جازدا تاعى ءبىر نىساندى تۇرعىن ءۇي قورىنا قايتارىپ، 280 بىلىمگەر باسپانالى بولدى. وسىلايشا الماتى قالاسىندا ءوز ستۋدەنتتەرىن جاتىن ورىنىمەن تولىق قامتاماسىز ەتكەن جالعىز ۋنيۆەرسيتەت اتاندى. ەندى ينۆەستيسيا كولەمى 2،3 ملرد تەڭگەدەن اساتىن تاعى ءبىر جاتاقحانا جوباسى قولعا الىندى.

«بيىلدان باستاپ ءبىز تاعى دا جاڭا جاتاقحانانىڭ قۇرىلىسىنا كىرىستىك. ول 9 قاباتتى ۇلكەن عيمارات بولادى. وندا 500-دەي ستۋدەنت تۇراتىن بولادى، جاس عالىمدار تۇراتىن بولادى. ءقازىر ءبىزدىڭ سەرىكتەسىمىز ينۆەستور، جۇمىسىنا كىرىسىپ، قۇرىلىستى باستاپ جاتىر. بۇيىرتسا 12 ايدىڭ ىشىندە جاڭا جاتاقحانامىز دايىن بولادى دەپ ويلايمىز»، - دەيدى قازۇازۋ ۋنيۆەرسيتەتىنىڭ باسقارما ءتوراعاسى، رەكتورى اقىلبەك كۇرىشبايەۆ.