ق ر پرەمەر-مينيسترىنىڭ ورىنباسارى ەرالى توعجانوۆ «مەدينۆەستگرۋپپ قازاقستان» كومپانياسىنىڭ قولداۋىمەن اشىلعان يادرولىق مەديسينا ورتالىعىنا باردى. بۇل ەلىمىزدەگى العاشقى يننوۆاسيالىق مەديسينالىق ورتالىق، ونىڭ قىزمەتى ونكولوگيالىق اۋرۋلاردى دياگنوستيكالاۋعا باعىتتالعان. ورتالىقتا مەديسينالىق كومەكتىڭ كەپىلدىك بەرىلگەن كولەمى شەڭبەرىندە بارلىق قازاقستاندىقتارعا تەگىن جانە قولجەتىمدى زەرتتەۋلەر جۇرگىزىلەدى، دەپ حابارلايدى اlmaty-akshamy.kz
يادرولىق مەديسينا ورتالىعى ونكولوگيالىق پاتولوگيالاردى ەرتە انىقتاۋ ءۇشىن ەڭ زاماناۋي جابدىقتارمەن جابدىقتالعان. جوعارى تەحنولوگيالىق پەت سكانەرى – Biograph Horizon، Siemens پوزيتروندى-ەميسسيالىق جانە كومپيۋتەرلىك توموگرافيا مۇمكىندىكتەرىن بىرىكتىرەدى.
زەرتتەۋ ىسىكتىڭ قۇرىلىمى مەن فۋنكسيونالدىق ەرەكشەلىكتەرىن مولەكۋلالىق دەڭگەيدە باعالاۋعا مۇمكىندىك بەرەدى. بۇل ءادىس ەڭ كىشكەنتاي وشاقتاردى انىقتاۋعا جانە نەوپلازمالاردىڭ ورنالاسۋى مەن شەكارالارى تۋرالى ناقتى مالىمەتتەرمەن ادام اعزاسىنىڭ ءۇش ولشەمدى بەينەسىن الۋعا مۇمكىندىك بەرەدى. ۆيسە-پرەمەر ورتالىقتىڭ مۇمكىندىكتەرىمەن تانىسىپ، پەت/كت دياگنوستيكاسى ونكولوگيالىق اۋرۋلارمەن كۇرەسۋدىڭ ماڭىزدى قۇرالدارىنىڭ ءبىرى ەكەنىن اتاپ ءوتتى.
«يننوۆاسيالىق زەرتتەۋلەر پاسيەنتتىڭ جاعدايى تۋرالى ناقتى اقپارات الۋعا مۇمكىندىك بەرەدى. بۇل اۋرۋدى ناقتىلاۋ كەزەڭىندە دە، ەمدەۋ كەزەڭىندە دە ماڭىزدى. ەڭ زاماناۋي اپپاراتۋرامەن جابدىقتالعان مەديسينالىق ورتالىقتار قازاقستان ازاماتتارىنىڭ دەنساۋلىعىن ساقتاۋ جانە ءومىر ءسۇرۋ ۇزاقتىعىن ارتتىرۋ ءۇشىن وتە ماڭىزدى»، — دەدى ە. توعجانوۆ.
«مەدينۆەستگرۋپپ قازاقستان» كومپانياسى ساتىپ العان جانە الماتى قالاسىنىڭ يادرولىق مەديسينا ورتالىعىندا پايدالانىلاتىن اپپاراتۋرا دارىگەرلەرگە جىلىنا 7 000 پاسيەنتتى قابىلداۋعا مۇمكىندىك بەرەدى.
بۇل ەمدەۋ مەن دياگنوستيكاعا مۇقتاج قازاقستاندىقتارعا زەرتتەۋلەردىڭ كۇردەلى ءراسىمىن كۇتۋ مەرزىمىن ايتارلىقتاي قىسقارتۋعا كومەكتەسەدى. وسىنداي ورتالىقتار جاقىن ارادا ورال، شىمكەنت جانە قاراعاندى قالالارىندا MIG Qazaqstan ينۆەستيسيالىق كومپانياسىمەن مەملەكەتتىك-جەكەمەنشىك ارىپتەستىك اياسىندا اشىلاتىن بولادى.
