ق ر مەملەكەتتىك قىزمەت ىستەرى اگەنتتىگىنىڭ الماتى قالاسى بويىنشا دەپارتامەنتى مەن الماتى قالاسى اكىمدىگى بىرلەسىپ وتكىزگەن وڭىرلىك كادر كوميسسياسىنىڭ وتىرىسى قالا اكىمى ەربولات دوسايەۆتىڭ توراعالىعىمەن ءوتتى. كوميسسيا بارىسىندا وڭىرلىك كادر رەزەرۆىنە كانديداتتاردى ىرىكتەۋ جۇرگىزىلدى، دەپ حابارلايدى aqshamnews.kz
قالا اكىمى ەربولات دوسايەۆ ىرىكتەۋدىڭ العاشقى ءۇش كەزەڭىنەن وتكەن ۇمىتكەرلەردى قۇتتىقتاپ، ولارعا ساتتىلىك تىلەدى. بارلىعى 43 ۇمىتكەر زاڭنامانى بىلۋگە، جەكە قاسيەتتەرى مەن قۇزىرەتتەرىن باعالاۋعا ارنالعان تەستىلەۋدەن ءوتتى.
«ەلىمىزدىڭ پرەزيدەنتى قاسىم-جومارت توقايەۆ تالانتتى جانە ماقساتتى جاستار ءۇشىن الەۋمەتتىك ليفتتەردىڭ ماڭىزدىلىعىن بىرنەشە رەت اتاپ ءوتتى. وڭىرلىك كادر رەزەرۆى ءبىزدىڭ ۇمىتكەرلەر ءۇشىن ءدال وسىنداي ليفت بولاتىنىنا سەنىمدىمىن»، - دەدى الماتى اكىمى.
ىرىكتەۋ بارىسىندا ۇمىتكەرلەر وزدەرىنىڭ پرەزەنتاسيالىق جوبالارىن ۇسىنىپ، ولاردىڭ يدەيالارىنىڭ ءمانى مەن ماقساتتارىن، ىسكە اسىرۋ كەزەڭدەرىن، ىقتيمال پروبلەمالار مەن كۇتىلەتىن ناتيجەلەردى جانە ولاردى شەشۋ جولدارىن باياندادى.
ىرىكتەۋ ناتيجەسىندە 30 رەزەرۆشى وڭىرلىك كادر رەزەرۆىنە قابىلداناتىن بولادى. ولار ەكى جىل ىشىندە كونكۋرسسىز قالانىڭ جەرگىلىكتى اتقارۋشى ورگاندارىنداعى ءتۇرلى بوس لاۋازىمدارعا ۇمىتكەر بولا الادى.
ق ر مەملەكەتتىك قىزمەت ىستەرى اگەنتتىگىنىڭ الماتى قالاسى بويىنشا دەپارتامەنت باسشىسى شىناراي ءالىمحان وڭىرلىك كوميسسيا ءتوراعاسىنىڭ ورىنباسارى بولىپ تابىلادى. كوميسسيا قۇرامىنا سونداي-اق قالالىق ءماسليحات ءتوراعاسى مەيىرجان وتىنشييەۆ، الماتى قالاسى بويىنشا تەكسەرۋ كوميسسياسىنىڭ ءتوراعاسى التاي بەردىقۇلوۆ جانە قالا اكىمى اپپاراتىنىڭ باسشىسى ايدار جاقىبايەۆ كىردى.
كوميسسيا قىزمەتىنىڭ اشىقتىعىن قامتاماسىز ەتۋ ماقساتىندا ىرىكتەۋدىڭ سوڭعى كەزەڭىندە مەملەكەتتىك قىزمەت ىستەرى دەپارتامەنتى تاۋەلسىز سالالىق ساراپشىلاردى تارتتى.
«ىرىكتەۋ كەزەڭدەرى وتە كۇردەلى بولدى. ءار كانديداتتىڭ قۇزىرەتى تەكسەرىلدى. ءبىز 3 كۇن ىشىندە كوميسسيا وتىرىسىن وتكىزىپ، 30 لايىقتى كانديداتتى ىرىكتەپ الۋىمىز كەرەك. وڭىرلىك كادر رەزەرۆىنىڭ ەرەكشەلىگى - ءاربىر كانديدات ءوز ەرەكشەلىگى بويىنشا وزدەرىنە جاقىن سالالىق باعىتتار بويىنشا ءوتىنىش بەرگەن»، - دەپ اتاپ ءوتتى مەملەكەتتىك قىزمەت ىستەرى دەپارتامەنتىنىڭ باسشىسى شىناراي ءالىمحان.
تاۋەلسىز ساراپشىلار بارلىق كانديداتتار ءۇشىن اشىقتىق پەن ءادىل ىرىكتەۋدىڭ قامتاماسىز ەتىلگەنىن اتاپ ءوتتى.
«بارلىق ازاماتتار كونكۋرسقا قاتىسۋعا قۇقىلى بولدى، جانە ءبىز ساراپشىلار رەتىندە قاتىسقان سوڭعى كەزەڭدە ءبىز مەملەكەتتىك قىزمەتشىلەردەن باسقا بيزنەس وكىلدەرى، مۇعالىمدەر، دارىگەرلەر، اكادەميالىق سالا مەن كۆازيمەملەكەتتىك سەكتور وكىلدەرىنىڭ دە بولعانىن كوردىك. بارلىعىنا بىردەي قولجەتىمدىلىك قامتاماسىز ەتىلدى. اشىقتىق پەن ادىلدىك قامتاماسىز ەتىلدى»، - دەدى «الماتى ازاماتتىق اليانسى» ءزتب-نىڭ ءتوراعاسى قايىرجان ءابدىحالىقوۆ.
انىقتاما: وڭىرلىك كادر رەزەرۆىنە ىرىكتەۋدىڭ ءبىرىنشى كەزەڭى 1 ناۋرىزدا باستالدى. ىرىكتەۋگە جوعارى ءبىلىمى جانە جالپى جۇمىس ءوتىلى كەمىندە 3 جىل، 35 جاستان اسپاعان قازاقستان ازاماتتارى قاتىسا الادى. الماتى قالاسى بويىنشا ءبىرىنشى كەزەڭدە 261 ۇمىتكەر قۇجاتتارىن تاپسىردى.