وبلىستاردىڭ، رەسپۋبليكالىق ماڭىزى بار قالالاردىڭ جانە استانانىڭ وڭىرلىك كادر رەزەرۆتەرىنە ىرىكتەۋ 1 ناۋرىزدا باستالادى.
وعان تالانتتى جانە بەلسەندى جاستاردىڭ وكىلدەرى كىرەدى. بۇل تۋرالى وڭىرلىك كوممۋنيكاسيالار قىزمەتىنىڭ الاڭىندا قازاقستان رەسپۋبليكاسى مەملەكەتتىك قىزمەت ىستەرى اگەنتتىگىنىڭ الماتى قالاسى بويىنشا دەپارتامەنتىنىڭ باسشىسى شىناراي ءالىمحان مالىمدەدى، دەپ حابارلايدى اlmaty-akshamy.kz.
جوبانىڭ نەگىزگى ماقساتى - ءار وڭىردە تالانتتى جاستار اراسىنان جاڭا ويلاۋ كوشباسشىلارى – جاس باسقارۋشىلار پۋلىن قالىپتاستىرۋ.
ىرىكتەۋگە 35 جاستان اسپاعان، جوعارى ءبىلىمى جانە كەمىندە 3 جىل ەڭبەك ءوتىلى بار ادامدار قاتىسا الادى.
مەملەكەت باسشىسىنىڭ 2023 جىلعى 15 ماۋسىمداعى جارلىعىمەن وبلىستىڭ، رەسپۋبليكالىق ماڭىزى بار قالانىڭ، استانانىڭ وڭىرلىك كادر رەزەرۆىن قالىپتاستىرۋ قاعيدالارى بەكىتىلدى.
«الماتى قالاسى بويىنشا وڭىرلىك كادر رەزەرۆىنە 2 جىل مەرزىمگە 10 كانديدات قابىلدانادى. وڭىرلىك رەزەرۆكە ىرىكتەۋ وتكىزۋ تۋرالى حابارلاندىرۋلار اگەنتتىكتىڭ، دەپارتامەنتتىڭ، الماتى قالاسى اكىمى اپپاراتىنىڭ ينتەرنەت-رەسۋرستارىندا، سونداي - اق بۇقارالىق اقپارات قۇرالدارىندا ورنالاستىرىلاتىن بولادى»، - دەپ حابارلادى ش.ءالىمحان.
ىرىكتەۋ مىناداي سالالىق باعىتتار بويىنشا جۇرگىزىلەدى: ينفراقۇرىلىمدى، ونەركاسىپتى جانە ساۋدانى دامىتۋ؛ ىشكى ساياسات جانە ينۆەستيسيالار؛ ەكونوميكالىق جانە قارجىلىق ساياسات؛ سيفرلاندىرۋ؛ الەۋمەتتىك ساياسات جانە ازاماتتىق قوعام.
ايماقتىق رەزەرۆكە ىرىكتەۋ قانداي كەزەڭدەردەن تۇرادى:
1) كانديداتتاردىڭ قۇجاتتارىن قابىلداۋ؛
2) زاڭنامانى بىلۋگە جانە جەكە قاسيەتتەرىن باعالاۋعا تەستىلەۋ؛
3) ۋاكىلەتتى ورگان جۇرگىزەتىن قۇزىرەتتەردى باعالاۋ؛
4) كوميسسياداعى قۇرىلىمدىق سۇحبات؛
5) كوميسسيا وتىرىسىندا وڭىرلىك رەزەرۆكە الۋعا كانديداتۋرالاردى قاراۋ.
قۇجاتتاردى قابىلداۋ 2024 جىلعى 1-31 ناۋرىز ارالىعىندا وتەدى. ۇمىتكەرلەر قۇجاتتاردى جوبا onir.pkrezerv.gov.kz. سايتىندا تاپسىرا الادى.
«ەگەر قۇجات تاپسىرۋ كەزىندە ۇمىتكەردىڭ جاسى 36-عا تولماعان بولسا، ونىڭ كونكۋرسقا قاتىسۋعا تولىق قۇقىعى بار»، - دەپ قوستى ءوز كەزەگىندە وكق بريفينگىنە قاتىسقان الماتى قالاسى اكىمى اپپاراتى باسشىسىنىڭ ورىنباسارى باۋىرجان قابدول.
ول ىرىكتەۋگە قاتىسۋ ءۇشىن قانداي قۇجاتتار قاجەت بولاتىنىن اتاپ ءوتتى:
- ق ر جەكە كۋالىگىنىڭ نەمەسە پاسپورتىنىڭ كوشىرمەسى؛
- ءبىلىم تۋرالى قۇجاتتاردىڭ جانە ولارعا قوسىمشالاردىڭ كوشىرمەلەرى؛
- ەڭبەك قىزمەتىن راستايتىن قۇجاتتىڭ كوشىرمەسى (ەڭبەك كودەكسىنىڭ 35-بابىنا سايكەس)؛
- سوڭعى جۇمىس ورنى بويىنشا كادر قىزمەتىمەن راستالعان ىرىكتەۋ ءتارتىبىنىڭ قوسىمشاسىنا سايكەس نىسان بويىنشا كانديداتتىڭ قىزمەتتىك ءتىزىمى؛
- ءتۇستى فوتوسۋرەت.«سونىمەن قاتار، ءبىزدىڭ دەپارتامەنتكە دوستىق داڭعىلى، 134 مەكەنجايى بويىنشا قاعاز فورماسىندا نە حابارلاندىرۋدا كورسەتىلگەن ەلەكتروندىق پوشتا مەكەنجايىنا ەلەكتروندىق تۇردە قۇجاتتاردى بەرۋ دە مۇمكىن ەكەنىن اتاپ وتكەن ءجون»، - دەپ قوستى مەملەكەتتىك قىزمەت ىستەرى اگەنتتىگىنىڭ الماتى قالاسى بويىنشا دەپارتامەنتىنىڭ باسشىسى شىناراي ءالىمحان.
سونداي-اق، جەكە كابينەتتە بارلىق قۇجاتتار توپتاماسىن تىركەپ، ۇسىنعاننان كەيىن ۇمىتكەر ءوڭىردى جانە سالالىق باعىتتى تاڭدايتىنىن ءتۇسىندىردى. ءبىر ايماقتى جانە ءبىر سالالىق باعىتتى تاڭداۋعا رۇقسات ەتىلەدى.
ىرىكتەۋدىڭ ەكىنشى كەزەڭى زاڭنامانى بىلۋگە جانە جەكە قاسيەتتەردى باعالاۋعا ارنالعان تەستىلەۋدەن تۇرادى. تەستىلەۋ ق ر پرەزيدەنتى جانىنداعى مەملەكەتتىك باسقارۋ اكادەمياسىنىڭ الماتى قالاسى بويىنشا فيليالىنىڭ تەستىلەۋ زالدارىندا وفلاين فورماتتا وتەدى
«تەستىلەۋدى تاپسىرۋ ءتىلىن ۇمىتكەر ءوز بەتىنشە تاڭدايدى. تەستىلەۋ ناتيجەلەرىن ەسەپتەۋ اۆتوماتتى تۇردە جۇزەگە اسىرىلادى. "زاڭنامانى بىلۋگە ارنالعان تەستىلەۋ" ءبىرىنشى بلوگى 5-9 ءساۋىر ارالىعىندا وتەدى. «جەكە قاسيەتتەردى باعالاۋعا ارنالعان تەستىلەۋدىڭ» ەكىنشى بلوگىنا زاڭنامانى بىلۋگە تەستىلەۋدى ەڭ جوعارى باللمەن تاپسىرعان ۇمىتكەرلەردىڭ 50% - ى وتەدى»، - دەپ اتاپ ءوتتى سپيكەر.
ءۇشىنشى كەزەڭ - «قۇزىرەتتەردى باعالاۋ» استاناداعى ق ر پرەزيدەنتى جانىنداعى مەملەكەتتىك باسقارۋ اكادەمياسىنىڭ بازاسىندا وفلاين فورماتتا وتەدى (الدىن الا 22 ءساۋىر – 7 ماۋسىم).
قاتىسۋشىلار كونكۋرسقا قاتىسۋ شىعىندارىن ءوز قاراجاتى ەسەبىنەن جۇرگىزەدى. بۇل كەزەڭ كانديداتتاردىڭ مىنەز-قۇلىق ينديكاتورلارىنىڭ جيىنتىعى ارقىلى بەلگىلى ءبىر قۇزىرەتتەردى (بەلسەندىلىك، قىزمەتتى باسقارۋ، ماسەلەلەردى تالداۋ جانە شەشۋ، كوشباسشىلىق، سەنىمدىلىك) انىقتاۋعا جانە باعالاۋعا باعىتتالعان جانە توپتىق جانە جەكە جاتتىعۋلاردى قامتيدى، ولاردىڭ بارىسىندا كانديداتتاردىڭ مىنەز-قۇلقىن سەرتيفيكاتتالعان ساراپشى-باعالاۋشىلار باقىلايدى.
ءتورتىنشى كەزەڭ بارىسىندا قاتىسۋشىلار تاڭدالعان سالالىق باعىتقا سايكەس ءوز جوبالارىن تانىستىرادى.
قۇرىلىمدىق سۇحبات جۇرگىزۋ كەزەڭىندە وڭىرلىك رەزەرۆكە ىرىكتەۋدىڭ اشىقتىعىن قامتاماسىز ەتۋ ءۇشىن قوعامدىق بىرلەستىكتەردىڭ، ۇەۇ، ب ا ق، بيزنەس-قوعامداستىقتاردىڭ وكىلدەرى جانە سالالىق ساراپشىلار تارتىلۋى مۇمكىن.
بەسىنشى كەزەڭدە – «كوميسسيا وتىرىسى» رەزەرۆكە كانديداتتاردى قابىلداۋ تۋرالى ۇسىنىس شىعارىلدى.
«ءاربىر كەزەڭنىڭ ناتيجەلەرى كوميسسيا شەشىم قابىلداعاننان كەيىن ءبىر جۇمىس كۇنى ىشىندە ينتەرنەت-رەسۋرستاردا، كانديداتتاردىڭ جەكە كابينەتتەرىندە، سونداي-اق جوبا سايتىندا ورنالاستىرىلاتىن بولادى. سونداي - اق ۇمىتكەرلەر ءتىلدى تاڭداپ، ءار كەزەڭنىڭ ءوتۋ كۇنى مەن ۋاقىتىن رەزەرۆتەۋگە مۇمكىندىك الادى»، - دەپ تولىقتىردى ش.ءالىمحان.
ەستەرىڭىزگە سالا كەتەيىك، وتىنىمدەردى قابىلداۋ 2024 جىلعى 1-31 ناۋرىز ارالىعىندا سايتتا وتەدى onir.pkrezerv.gov.kz.