پارتيانىڭ اتىنا جازىلعان ءوتىنىشتىڭ 74%-ى ينتەرنەت ارقىلى جولدانعان.
باۋىرجان بايبەك ءبىر كەزدەرى قيىن جاعدايعا دۋشار بولعان الماتىلىق وتباسىلارمەن جولىقتى، دەپ حابارلايدى Almaty-akshamy.kz «استانا» تەلەارناسىنا سىلتەمە جاساپ.
الماتىلىق پوليسەي ايان عالييەۆ وسىدان 5 جىل بۇرىن تەرروريستەردىڭ قولىنان قازا تاپقان بولاتىن. قىزمەت بارىسىندا قازا تاپقان پوليسەيدىڭ ارتىندا قالعان ەكى بالاسى مەن جارىنا قولداۋ كورسەتىلىپ، ەلباسىنىڭ اتىنان پاتەر كىلتى تابىستالعان ەدى. جاڭادان قونىستانعاندارعا ءۇيدى جوندەۋگە كومەك بەرىلدى.
«بۇل تراگەديا بولعان كەزدە، بالالارىم مەن ولاردىڭ بولاشاعى ءۇشىن قاتتى الاڭدادىم. ويتكەنى، ءبىز اسىراۋشىمىزدان ايرىلىپ قالدىق. ءبىراق، كەيىن ءبىز جالعىز ەمەس ەكەنىمىزدى ۇعىندىق. بىزگە مەملەكەت، ەلباسى اۋقىمدى كومەك پەن قولداۋ كورسەتتى. بىزگە سىيعا بەرىلگەن پاتەر مەن ەرەكشە نازار اۋدارعاندارى ءۇشىن العىسىم شەكسىز»، - دەدى ايان عالييەۆتىڭ جەسىرى انار اسانوۆا.
«ەلباسى تاراپىنان ءبىز كوپ بالالى انالارعا كومەك جاسادىق. «باقىتتى وتباسى» جوباسىن باستادىق. قالا تاراپىنان دا كومەك بولدى، جەرگىلىكتى بيۋدجەتتەن، جالپى، رەسپۋبليكادان كوپ جاعداي جاسالىپ جاتىر. بۇدان بولەك كومەككە ءزارۋ جانۇيالارعا Nur Otan پارتياسىنىڭ مۇشەلەرى دە بەلسەندى تۇردە كومەك كورسەتىپ كەلەدى. سوڭعى 3 جىلدا پارتيالىقتار 500 مىڭعا جۋىق ادامدى قابىلداپ، مۇڭ-مۇقتاجىنا قۇلاق اسقان. ءوتىنىشتىڭ 74%ء-ى ينتەرنەت ارقىلى جولدانعان»، - دەدى Nur Otan پارتياسى ءتوراعاسىنىڭ ءبىرىنشى ورىنباسارى باۋىرجان بايبەك.