الماتى قالاسىنداعى ەكى كورنەكى ورىندى جاڭعىرتۋدى جوسپارلانىپ وتىر. بۇل تۋرالى الماتى قالاسىنىڭ اكىمى ە.دوسايەۆتىڭ المالى اۋدانى تۇرعىندارىمەن كەزدەسۋىندە ءمالىم بولدى، دەپ حابارلايدى Almaty-akshamy.kz.
- ءبىزدىڭ اۋداندا قالانىڭ كورنەكى ورىندارىنا اينالۋى ءتيىس قالالىق ماڭىزى بار ەكى كورنەكتى نىسان بار. وكىنىشكە وراي، ولار ءقازىر ەشكىمگە كەرەكسىز. اۋدان اكىمىنە نيكولسكيي بازارىن قالدىرعانى ءۇشىن راحمەت. ونىڭ جەكە يەسى كىم، سونى انىقتاۋ قاجەت. مەنىڭ ۇسىنىسىم بار: بۇل نىساندى يەسىز دەپ تانۋ كەرەك. ويتكەنى ول كوپتەگەن جىلدار بويى قاڭىراپ بوس تۇر نەمەسە مەنشىك يەسىمەن سويلەسىپ، ونىڭ دۇرىس بازار جاساۋى ءۇشىن كەلىسسوزدەر جۇرگىزۋ قاجەت. الەمدە كاسىپكەرلەر ازىق-تۇلىكتى تۇرعىندار ءۇشىن قالىپتى باعامەن ساتاتىن جانە ساۋدا جانە تاماقتانۋ ورىندارىنان اقشا تاباتىن بازارلار كوپ.
ەكىنشى نىسان - ترامۆاي دەپوسىنىڭ عيماراتى. بۇرىنعى اكىم باۋىرجان بايبەك تۇجىرىمدامانىڭ اشىق كونكۋرسىن وتكىزسە، باقىتجان ساعىنتايەۆ جابىق "جەكەشەلەندىرگىشكە" اينالدىردى، قوعامدىق عيماراتتىڭ ورنىنا ساۋدا ورتالىعىنىڭ ۇسقىنسىز جوباسىن جاسادى. بۇل جوبانى ءقازىر قۇرىلىس باسقارماسى جۇزەگە اسىرۋعا تىرىسۋدا. مەنىڭ اكىم ەربولات دوسايەۆقا ءوتىنىشىم – تۇجىرىمدامانى قايتادان كوپشىلىكتىڭ جاريا تالقىلاۋىنا شىعارىپ، قالا تۇرعىندارىنا ۇناماسا، وندا جاڭا كونكۋرس وتكىزۋ كەرەك، -دەدى الماتى قالاسى قوعامدىق كەڭەسىنىڭ مۇشەسى اسەت ناۋرىزبايەۆ.
وزەكتى ماسەلەگە قاتىستى قالا باسشىسىنىڭ بەرگەن جاۋابى:
- مەن ءسىزدى قولدايمىن. راسىندا دا قالادا كورنەكى ورىندار از. ءبىز قالامىزدىڭ تاريحىنا قۇرمەتپەن قارايمىز. تاريحي ورىنداردى قايتا جاڭارتۋعا، مودەرنيزاسيالاۋعا تىرىسامىز.
نيكولسكيي بازارى بويىنشا- مۇندا مەن ءۇشىن ساياسي ماسەلە جوق. بۇگىندە وعان يەلىك ەتەتىن ادامدار بار. تيىسىنشە، سوت ىستەرى بولادى، ونىڭ قورىتىندىسى بويىنشا وسى اكتيۆپەن نە ىستەۋ كەرەكتىگى تۋرالى شەشىم قابىلدانادى. سونداي – اق، "بارىس" بازارىنا دا قاتىستى ماسەلە بار. سوت شەشىمدەرى شىققان، ونىڭ اكتيۆتەرى قالاعا بەرىلدى. ەندى ءبىز ماسەلەنى انىقتاپ، شەشىم قابىلدايمىز. نيكولسكيي بازارى دا سونداي. مەن ولاردى يەسىز دەپ تانىپ، ءبىر جىلدان كەيىن وزىمە الا المايمىن. ويتكەنى قالادا ەشكىم مەنشىك قۇقىعىن جويعان جوق. ءبىراق ءقازىر بولىپ جاتقان پروسەستەرگە قاتىستى ماسەلەلەر – ولار اياقتالعاننان كەيىن ءبىز نيكولسكيي بازارىن قولعا الاتىن بولامىز. بىرنەشە يدەيالارىمىز بار. بازاردىڭ تاريحي وتكەن جولدارى بار. ءبىراق سوڭعى 15-20 جىل ىشىندە ونىڭ ءيميدجى وزگەردى. مەنىڭ ويىمشا، ونى قالپىنا كەلتىرۋدىڭ قاجەتى جوق، ءبىراق ىڭعايلى ءارى زاماناۋي ساۋدا ورىندارىن جاساۋ كەرەك. مەن مەنشىك يەلەرىنە ۇسىنىس جاسادىم.
ەندى دەپو تۋرالى - بىزدە الماتىنىڭ كرەاتيۆتى كەڭىستىگى اياسىندا جۇمىس اياقتالۋدا. مەن جاسالاتىن نارسەلەردى كوردىم، بايقاۋىمشا ناتيجەسى جاقسى بولادى. بۇل ىسكە ءبىزدىڭ مامانداردى عانا ەمەس، شەتەلدىك كومپانيالار دا تارتىلدى. جاقىندا ءبىز بۇل جوبانى جاريالايمىز.
قالا جەكە ينۆەستورلارمەن بولعان اڭگىمەلەردەن كەيىن دەپونى وزىنە الادى جانە جاقىن ارادا بۇل الماتىنىڭ باستى كرەاتيۆتى حابىنا اينالادى. مەن قوعامدىق كەڭەستە تاپسىرما بەرەمىن. ءبىز جوبانى كورسەتەمىز جانە ايتىپ بەرەمىز. ەگەر ەسكەرتپەلەر بولسا، وندا ولاردى جوباعا ەنگىزەمىز.