حالىقارالىق جاستار كۇنىندە NEET ساناتىنداعى جاستارعا ەرەكشە كوڭىل بولىنەتىن بولادى.
بۇل تۋرالى وڭىرلىك كوممۋنيكاسيالار قىزمەتىنىڭ بريفينگىنە جاستار ساياساتى باسقارماسى مەن جاستار ۇيىمدارىنىڭ وكىلدەرى ايتىپ بەردى، دەپ حابارلايدى Almaty-akshamy.kz.
جاستار ساياساتى باسقارماسى باسشىسىنىڭ ورىنباسارى ازيز كاجدەنبەكتىڭ ايتۋىنشا، جىل سايىن 12 تامىزدا وتكىزىلەتىن جاستار كۇنى مەرەكەسىنە وراي مادەني-بۇقارالىق ءىس-شارالاردان باسقا، جاستاردىڭ زياتكەرلىك مۇمكىندىكتەرىن، جەكە تۇلعانىڭ رۋحاني، دەنە جانە مادەني دامۋىن دامىتۋعا باعىتتالعان ءىس-شارالار وتكىزۋ جوسپاردا.
وسىنداي باستامالاردىڭ ءبىرى رەتىندە «بازاراNeەt» پودكاستى ىسكە قوسىلاتىن بولادى. جوبا اۆتورلارىنىڭ ايتۋىنشا، ولار ءبىلىمى نە تۇراقتى جۇمىسى جوق جاستاردى اڭگىمەگە تارتىپ، ولاردىڭ ماسەلەلەرىن ءتۇسىنىپ، ءارتۇرلى تاقىرىپتار بويىنشا پىكىرلەرىن تىڭدايتىن بولادى.
"وزدەرىڭىز بىلەتىندەي، پودكاستتار بەلگىلى ءبىر سالادا جەتىستىككە جەتكەن ادامداردىڭ قاتىسۋىمەن، ولارمەن سۇحبات ارقىلى جۇرگىزىلەدى. ءبىزدىڭ پودكاستتىڭ ماقساتى - ەڭبەك ادامدارىمەن، بازاردا جۇمىس ىستەيتىن قاراپايىم قالا تۇرعىندارىمەن بايلانىس ورناتۋ. ولاردىڭ اراسىندا كوپتەگەن جاستار دا بار. ءبىز ولاردىڭ قىزمەتى تۋرالى كوبىرەك بىلگىمىز كەلەدى، سونىمەن قاتار ولاردىڭ ماقساتتارىن، ويلارىن تىڭداۋ بىزگە ماڭىزدى. ايتا كەتۋ كەرەك، قوعامدا بولىپ جاتقان كوپتەگەن وقيعالار تۋرالى اقپارات ءارقاشان كوپشىلىككە دۇرىس جەتە بەرمەيدى. ءبىزدىڭ ويىمىزشا، جاس جىگىتتەر مەن قىزدار بازاردا تاڭەرتەڭنەن تۇنگە دەيىن جۇمىس ىستەي وتىرىپ، ءاردايىم قاجەتتى اقپارات الا بەرمەيدى. وسى پودكاستتى ءتۇسىرىپ، جاستارمەن كوزبە كوز كەزدەسە وتىرىپ، ءبىز ولارعا مەملەكەت تاراپىنان جاستارعا ارنالعان ءتۇرلى مۇمكىندىكتەر مەن باعدارلامالار تۋرالى ايتقىمىز كەلەدى"، - دەدى "Jaidarman" رقب الماتى قالالىق فيليالىنىڭ ديرەكتورى وڭداسىن قۇلىمبەتوۆ.
جوبا تامىز ايىنىڭ ورتاسىندا باستالادى دەپ جوسپارلانۋدا. پودكاستتى Jaidarman ويىنشىلارى جۇرگىزەدى. سپيكەر اتاپ وتكەندەي، ولارعا قاراپايىم جۇمىسشىلار - ساتۋشى، جۇك تاسۋشى جانە كۇزەتشىلەردى اڭگىمەگە تارتۋ قيىن بولمايدى.
"جايدارمان ويىندارى الەۋمەتتىك ليفت ەكەنى بەلگىلى. جالپى، ءبىزدىڭ تالداۋىمىز بويىنشا ءبىزدىڭ نەگىزگى كورەرمەندەرىمىز - NEET ساناتىنداعى جاستار. جايدارمان ويىندارىندا وينايتىن دا، قىزىعاتىن دا ءوزىمىز سەكىلدى اۋىلدىڭ جاستارى، جانە ولاردىڭ سانى جىلدان جىلعا ارتۋدا. ءبىز، جايدارمان ويىنشىلارى ءۇشىن وسى جاستارمەن بايلانىس ورناتۋ ماڭىزدى. وسىلايشا ءبىز ورتادا بايلانىستىرۋشى كوپىر بولعىمىز كەلەدى، بەلگىلى ءبىر جاستار توبىن قۇرىپ، ولارمەن كەرى بايلانىس ورناتقىمىز كەلەدى. وسى باعىتتا العاشقى قادامداردى جاساپ جاتىرمىز، ناتيجەسىن جاقىن ارادا كورەسىزدەر"، - دەپ ءسوز سوڭىندا اتاپ ءوتتى ول.