الماتىدا جاستاردى كوپتەپ ءداستۇرلى سپورتقا تارتۋدى كوزدەيتىن «Youth Nomads» دەيتىن الەۋمەتتىك جوبا باستالدى. وڭىرلىك كوممۋنيكاسيالار قىزمەتىندە وتكەن پرەسس-كونفەرەنسيادا ۇيىمداستىرۋشىلار كوپشىلىكتى جوبانىڭ مان-جايىمەن تانىستىردى، دەپ حابارلايدى aqshamnews.kz
الماتىنىڭ جاستار ساياساتى باسقارماسىنىڭ قولداۋىمەن ىسكە اسىپ جاتقان بۇل جوبا – ءقازىر جۇمىسسىز وتىرعان، ەش جەردە وقىمايتىن NEET ساناتىنداعى جاستارعا باعىتتالعان. باستامانىڭ ماقساتى – ۇلتتىق سپورت پەن ءداستۇر ارقىلى ولاردى الەۋمەتتىك بەيىمدەۋگە اتسالىسۋ.
«بۇل جاستاردى الەۋمەتكە جاقىنداستىرىپ، قوعامعا بەيىمدەپ، ولاردىڭ جاڭا كاسىپتى يگەرۋىنە جول اشاتىن، جاستاردى ۇلتتىق سپورت ارقىلى دامىتۋدى كوزدەيتىن ۇلكەن جوبا. جاستاردى سالاۋاتتى ءومىر سالتىن ۇستانۋعا شاقىراتىن جول»، — دەدى جاستار ساياساتى باسقارماسى باستىعىنىڭ ورىنباسارى الماز كەڭەسباي.
بۇل جوبادا بىرنەشە ۇلتتىق سپورت تۇرلەرىن قامتىعان فەستيۆال وتپەك. الماتىنىڭ ۇلكەن-ۇلكەن بازارلارىندا جۇمىس ىستەيتىن جاستار قازاقشا كۇرەستەن، ارقان تارتۋدان، اسىق اتۋدان، توعىزقۇمالاقتان ءوزارا جارىسقا تۇسەدى وندا. العاشقى كەزەڭدە ىرىكتەۋدەن ءوتىپ، اقتىق ايقاس 28 مامىر كۇنى ءوتىپ، سول كۇنى جەڭگەندەرى سىيلىق الادى.
«Youth Nomads» جوباسىنىڭ جەتەكشىسى تاۋاسار مۇراتحاننىڭ ايتۋىنشا، فەستيۆالدا مادەني باعدارلامالار: قولونەرشىلەردىڭ بۇيىمدارى قويىلعان كورمە، كونسەرت پەن بەلسەندى جاستاردىڭ ماستەر-كلاسى دا وتپەك. بۇل جاستاردىڭ شابىتىن شىڭداپ، ەلدىڭ باي مادەنيەتىنە كىرىكتىرە تۇسپەك ولاردى.
«Youth Nomads — فەستيۆال عانا ەمەس، جاستار مەن قوعامنىڭ اراسىنداعى الەۋمەتتىك كوپىر دە. سپورت، ءداستۇر، ۇجىمدىق جۇمىس ارقىلى ولار قوعامنان ءوز ورنىن تاۋىپ، ومىرگە ۇمىتپەن، جاڭاشا قاراي باستايدى»، — دەيدى ۇيىمداستىرۋشىلار.
جوبا جوق دەگەندە قالانىڭ ەكى ۇلكەن بازارىن قامتىماق. جوبانىڭ سوڭىندا اكىمدىكتىڭ وكىلدەرى، ءماسليحات دەپۋتاتتارى، بلوگەرلەر مەن بەلسەندىلەر قازىلىق جاساپ، كوزگە تۇسكەن جاستاردى ماراپاتتايدى.
ۇيىمداستىرۋشىلاردىڭ ايتۋىنشا، جوباعا ءقازىردىڭ وزىندە جاستار مەن الەمەتتىك قۇرىلىمدار قاتتى قىزىعىپ، قاتىسۋعا ءوتىنىش بىلدىرگەن.