الماتىدا ناۋرىز سان-سالتاناتىمەن ءوتىپ جاتىر

مەرەكەلىك شارا «استانا» الاڭىندا باستاۋ الدى

بۇگىن الماتىدا تاڭەرتەڭنەن باستاپ ناۋرىز مەيرامىنا ارنالعان حالىقتىق سەرۋەن ءوتىپ جاتىر، دەپ حابارلايدى Almaty-akshamy.kz قازاقپاراتقا سىلتەمە جاساپ.

جالپىقالالىق شارالارعا مىڭداعان مەگاپوليس تۇرعىنى مەن قوناقتارى قاتىسۋدا. مەرەكەلىك شارا «استانا» الاڭىندا باستاۋ الدى. وعان مەملەكەت باسشىسى قاسىم-جومارت توقايەۆ قاتىستى. پرەزيدەنت بارشا قازاقستاندىقتاردى ۇلىستىڭ ۇلى كۇنىمەن قۇتتىقتادى. 
باستى ساحنادا كورەرمەندەر قازاق مادەنيەتىنىڭ وزىندىك ەرەكشەلىگىن كورسەتەتىن بارابان، داۋىلپاز بەن قوبىزدى قولدانا وتىرىپ دايىنداعان تەاترلاندىرىلعان شوۋدى تاماشالادى. تەاتر قويىلىمدارىمەن قاتار رەترو موتيۆتەر، سونداي-اق زاماناۋي كومپوزيسيالار ۇسىنىلدى.
«بوزتورعاي» بالالار حورى ناۋرىز مەيرامىنا ارنايى جازىلعان قازاق جانە ورىس تىلدەرىندە «بەيبىتشىلىك بۇكىل الەمدە» («مير ۆسەم ميرە») ءانىن ورىندادى. پانفيلوۆ، جىبەك جولى جانە تولە بي كوشەلەرىندە 50-دەن استام ساۋلەت نىساندارى مەن قوندىرعى ورناتىلدى. جاياۋ جۇرگىنشىلەر كوشەلەرىندە كيىز ۇيلەر تىگىلىپ، قولونەر جارمەڭكەسى، مەيرامحانالار اللەياسى، سۋرەتشىلەر كورمەسى مەن بالالار ايماقتارى ۇيىمداستىرىلدى. كوكتەمنىڭ شۋاقتى كۇنىندە الماتىلىقتار ۇلتتىق كيىممەن كوشەگە قىدىرۋعا شىقتى. سونىمەن قاتار، قالادا سپورتتىق ويىندار ءوتىپ جاتىر. كەز كەلگەن ادام ارقان تارتۋ، كىر تاسى مەن قوشقار كوتەرۋ ويىندارىنا قاتىسىپ، باعالى سىيلىقتار ۇتىپ الا الادى. 
ايتا كەتەيىك، مەگاپوليستە نەگىزگى مەرەكەلىك شارالار 21-23 ناۋرىز ارالىعىندا وتەدى. قالانىڭ بارلىق اۋداندارىندا 80-نەن استام ءتۇرلى ءىس-شارا جوسپارلانعان. 21-22 ناۋرىزدا عىلىم اكادەمياسى عيماراتىنىڭ الدىنداعى الاڭدا «قازاق اۋەندەرى» اق نۇر-سۇلتان قالاسى ارتىستەرىنىڭ قاتىسۋىمەن كونسەرتتىك باعدارلاما ۇيىمداستىرادى.