الماتىدا ناۋرىز مەرەكەسى 14 ناۋرىزدا كوكتوبە ساياباعىنىڭ اۋماعىندا وتكەن «كورىسۋ كۇنى» ءىس-شاراسىنان باستاۋ الادى.
نەگىزگى ءىس-شارالار 21 ناۋرىزدا تاڭعى ساعات 10:00-دە ناۋرىز مەرەكەسىنە ارنالعان شەرۋدەن باستالادى. شەرۋ الماتى قالاسىنىڭ ورتالىق كوشەلەرى – اباي جانە ابىلاي حان داڭعىلدارىنىڭ بويىمەن ءوتىپ، تولە بي كوشەسىنە دەيىن بارادى. مەرەكەلىك ءىس-شاراعا بارلىعى 500 ادام قاتىسادى
21 ناۋرىز كۇنى ساعات 11:00-دە «استانا» الاڭىندا «ناۋرىز-دۋمان» گالا-كونسەرتى وتەدى. ارتيستەر ساحنادا ۇلتتىق جانە الەمدىك مۋزىكالىق شىعارمالاردى ورىنداپ، اكتەرلەردىڭ جانە بالالار ۇجىمدارىنىڭ قاتىسۋىمەن تەاترلاندىرىلعان مۋزىكالىق قويىلىم كورسەتىلەدى.
22 ناۋرىز كۇنى ساعات 17:00-دە «استانا» الاڭىندا جاس ورىنداۋشىلاردىڭ قاتىسۋىمەن Zhuldyzdy Almaty كونسەرتى وتەدى.
21-22 ناۋرىزداعى مەرەكەلىك ءىس-شارالار كەزىندە قالا تۇرعىندارى مەن قوناقتارىنا بارلىعى 60 توننا ناۋرىز كوجە مەن باۋىرساق تاراتىلاتىن بولادى.
18-24 ناۋرىز ارالىعىندا پانفيلوۆ جانە جىبەك جولى كوشەلەرىندە «ناۋرىز Fest» ءىس-شاراسى وتەدى. بۇل كۇندەرى سۋرەتشىلەر مەن قولونەرشىلەردىڭ كورمەلەرى ۇيىمداستىرىلىپ، كەلۋشىلەر كىلەم توقۋ، جىبەك پەن كەراميكانى بوياۋ، اسىل تاستاردى كەسۋ، بىلعارىمەن، اعاشپەن، شىنى جانە سازبەن جۇمىس ىستەۋ تەحنولوگياسىمەن تانىسا الادى. ءىس-شارا اياسىندا انيماتورلاردىڭ قويىلىمدارى، حالىقتىق كاراوكە، بي فلەشموبى، كونكۋرستار، ەسترادا جۇلدىزدارىنىڭ قاتىسۋىمەن جاندى داۋىستاعى كونسەرت، سىيلىقتاردىڭ ۇتىس ويىندارى جانە باسقا دا شارالار وتكىزۋ جوسپارلانۋدا.
ابىلاي حان داڭعىلىنىڭ اۋماعىندا بالالار الاڭى ورنالاسادى. بۇل الاڭدا انيماتورلار، سيرك ارتىستەرى، قۋىرشاق تەاترىنىڭ اكتەرلەرى ونەر كورسەتەدى جانە مۇرات مۇتىرعانوۆتىڭ شوۋى مەن حالىق ەرتەگىلەرى كەيىپكەرلەرى قۋىرشاقتارىنىڭ قويىلىمدارى بولادى. سونداي-اق، بۇل الاڭدا ويىن فيگۋرالارى ورناتىلىپ، تانىمدىق باعدارلامالار، وتباسىلىق جانە بالالار ويىندارى، ەستافەتالار وتەدى.
اربالارداعى 10 ارنايى سورەدە جانە شاتىرلاردا قولونەرشىلەر جارمەڭكەسى مەن قولدانبالى ونەر كورمەلەرى ۇيىمداستىرىلادى.
تولە بي كوشەسىنىڭ بويىندا پانفيلوۆ كوشەسىنەن نازاربايەۆ داڭعىلىنا دەيىنگى ارالىقتا سپورت ايماعى ورنالاساتىن بولادى. مۇندا «اسىق اتۋ»، «جامبى اتۋ»، «ارقان تارتۋ»، «قول كۇرەس»، «قازاقشا كۇرەس»، «كوكپار تارتۋ»، «توعىز قۇمالاق» سپورتتىق-ويىن-ساۋىق ۇلتتىق جارىستارىن وتكىزۋ جوسپارلانعان.
«الاتاۋ» ءداستۇرلى ونەر تەاترىنىڭ اۋماعىندا 21-23 ناۋرىز ارالىعىندا ارتىستەردىڭ ونەرىن جانە «ناۋرىز-دۋمان» تەاترلاندىرىلعان سپەكتاكلىن كورسەتۋ ءۇشىن ارنايى ساحنا ورناتىلىپ، ەتنوقالاشىق ۇيىمداستىرىلادى. مۇندا قولونەرشىلەردىڭ كورمەلەرى، شەبەرلىك سىنىپتارى، فلەشموبتار، قۋىرشاقتار شەرۋى، سپورتتىق جارىستار وتەدى.
سونىمەن قاتار، ءداستۇرلى تۇردە قالانىڭ بارلىق اۋداندارىندا 14-24 ناۋرىز ارالىعىندا ساعات 17:00-دەن 20:00-گە دەيىن مەرەكەلىك ءىس-شارالار ۇيىمداستىرىلىپ، ساحنادا قازاق مۋزىكالىق فولكلورىنىڭ ۇزدىك شىعارمالارى ورىندالادى.