الماتىدا ناۋقاستار كوروناۆيرۋستى ءجيى جۇقتىراتىن نىساندار اتالدى

سوڭعى اپتادا كۆي بويىنشا ەپيدەميولوگيالىق جاعداي ايتارلىقتاي ناشارلادى.

الماتىدا ەپيدەميولوگيالىق تەكسەرۋ ناتيجەلەرى بويىنشا ناۋقاستار كوروناۆيرۋستى جۇقتىراتىن نەگىزگى ورىندار انىقتالدى. مۇنداعى تىزىمدە ساۋدا جانە تاماقتانۋ ورىندارى جۇقتىرۋ جونىنەن كوش باستاۋدا، دەپ حابارلايدى Almaty-akshamy.kz.

سوڭعى اپتادا كۆي بويىنشا ەپيدەميولوگيالىق جاعداي ايتارلىقتاي ناشارلادى. 23 شىلدەدەن باستاپ كۆي-دى تاۋلىكتىك تىركەۋ 1 مىڭنان استى. 23 شىلدەدە – 1080 جاعداي، 24 شىلدەدە – 1191 جاعداي، 25 شىلدەدە – 1219 جاعداي انىقتالدى. وسىلايشا، جىل باسىنان بەرى كۆي-دىڭ 72 696 جاعدايى تىركەلدى، ال ايدىڭ باسىنان 25 شىلدەگە دەيىن – 16 911 جاعدايى انىقتالدى.

وتكەن اپتادا الدىڭعىمەن سالىستىرعاندا، كۆي جاعدايىنىڭ تىركەلۋى 1،2 ەسەگە – 5 483 جاعدايدان 6 818 جاعدايعا دەيىن ءوستى، تاۋلىكتىك ءوسىم 1،3%-دى قۇرادى. سيمپتومدىق ناۋقاستاردىڭ ۇلەس سالماعىنىڭ ارتۋى باياۋلاپ، 90% دەڭگەيىندە قالدى.

سوڭعى 2 اپتاداعى جاس قۇرامىن تالداۋ بويىنشا 1 جاسقا دەيىنگى بالالاردىڭ دەرت جۇقتىرۋى 0،3%-عا ارتىپ، 2،8%-دى كورسەتتى (وتكەن اپتادا 135 بولسا، تاعى 178 بالا قوسىلدى). كۆي دەرتى 20 مەن 40 جاس ارالىعىنداعى جاستار اراسىندا – 38%، 40 پەن 59 جاس ارالىعىنداعى ازاماتتار اراسىندا – 25% جانە 60 جاستان اسقان ادامدار اراسىندا – 20% قۇرايدى. قالعان جاستاعىلار ادامدار اراسىندا ايتارلىقتاي وزگەرىس جوق.

حالىقتى جۇمىسپەن قامتۋ بويىنشا سوڭعى 14 كۇندە ءوزىن-وزى جۇمىسپەن قامتىعانداردىڭ – 41% (بۇرىنعى دەڭگەيدە)، ءتۇرلى ج ش س، جك، اق قىزمەتكەرلەرىنىڭ – 18% (1% – عا ءوسۋ)، زەينەتكەرلەردىڭ – 17،1% (1% – عا ءوسۋ)، سونداي-اق وقۋشىلاردىڭ – 9% (0،2%-عا تومەندەۋ) جانە مەكتەپ جاسىنا دەيىنگى بالالاردىڭ – 6،3% (بۇرىنعى دەڭگەيدە) كۆي دەرتىن جۇقتىرۋى باسىم، بۇل  جالپى سانىنىڭ 91%-دان استامىن قۇرايدى.

سوڭعى اپتادا  بەلگىلەنگەن جۇقتىرۋ ورىندارى بويىنشا، الدىڭعىمەن سالىستىرعاندا، تۋىستارمەن جانە كورشىلەرمەن بايلانىس كەزىندە كۆي جۇقتىرۋ دەڭگەيى 0،2 – 0،4%-عا ارتتى.

جۇقتىرۋ ءقاۋپى جوعارى ورىندار بويىنشا ورامىشىلىك ازىق-تۇلىك ەمەس دۇكەندەردە 0،1%-عا جانە قوعامدىق تاماقتانۋ نىساندارىندا، مەيرامحانالار، كافە مەن اسحانالاردا – 0،2%-عا، مونشا مەن ساۋنالاردا – 0،4%-عا جۇقتىرۋ بايقالدى.

سوڭعى 7 كۇندە كۆي جۇقتىرۋدىڭ نەگىزگى ورىندارى ساۋدا نىساندارى – 35%، وتباسىنداعى بايلانىستار – 19%، قوعامدىق كولىكتە قاتىناۋ – 16%، بازارلار - 14%، ساياباق پەن حالىق دەمالاتىن جاياۋ جۇرگىنشىلەر كوشەلەرى – 3،6% قۇرادى. 

كۆي تارالۋىنا جول بەرمەۋ جونىندەگى شتاب الماتى تۇرعىندارىن قازىرگى قالىپتاسقان احۋالعا جاۋاپكەرشىلىكپەن قاراۋعا شاقىردى. كارانتيندىك شەكتەۋ مەن بەتپەردە رەجيمىن قاتاڭ ساقتاۋ قاجەت. دەنساۋلىقتى قورعاۋدىڭ جالعىز جولى – ۆاكسينا الۋ. وسىعان بايلانىستى قالا تۇرعىندارى بەلسەندى تۇردە ۆاكسينا الىپ، تۋىستارى مەن جاقىندارىن ەكپە پۋنكتىنە ىڭعايلى ۋاقىتتا شاقىرۋى كەرەك.

جالپى، 1 اقپان مەن 26 شىلدە ارالىعىندا I كومپونەنتپەن 680 722 ادام ەكپە الدى. 60 جاستان جوعارى ۆاكسينا العان ادام سانى 95 813 ادامدى قۇرايدى. قالادا مەديسينالىق ۇيىمداردا، مەكتەپتەردە، مادەنيەت، سپورت نىساندارىندا، بازار مەن قالانىڭ سوسو-دا 212 ۆاكسينا پۋنكتى جۇمىس ىستەيدى. 1 260 ادام جۇمىلدىرىلعان 308 ەكپە بريگاداسى جۇمىس جاساۋدا.