الماتىدا «ناركوستوپ» جوباسى اياسىندا جاستار اراسىنداعى ناشاقورلىقتىڭ الدىن الۋ جانە ونىمەن كۇرەسۋ شارالارى تالقىلاندى
سينتەتيكالىق ەسىرتكى - ءبىزدىڭ زامانىمىزدىڭ قاسىرەتى. بۇل تۋرالى وكق بريفينگىندە الماتى قالاسى جاستار ساياساتى باسقارماسىنىڭ جاستاردى الەۋمەتتەندىرۋ جانە جاستار باستامالارىن قولداۋ ءبولىمىنىڭ باسشىسى نۋرسۋلتان بەككايروۆ مالىمدەدى.
ناشاقورلىقتىڭ الدىن الۋ بويىنشا «ناركوستوپ» جوباسى العاش رەت الماتىدا 2021 جىلى ىسكە قوسىلدى.
جوبانى الماتى قالاسىنىڭ جاستار ساياساتى باسقارماسى جۇزەگە اسىرۋدا. ول ەكى باعىتقا بولىنەدى. ءبىرىنشىسى ەسىرتكىنى قولداناتىندارعا جانە تاۋەلدىلىكتەن ارىلعىسى كەلەتىندەرگە باعىتتالعان (call-ورتالىق، تاۋەلدىلەرمەن جاسىرىن جۇمىس، ولاردىڭ اتا-انالارى)، ەكىنشى باعىت - ناشاقورلىقتىڭ الدىن الۋ (كونتەنت ءوندىرىسى، دەمالىس ورتالىقتارى، دارىستەر، ەرىكتىلىك، ەڭبەك بيرجاسى). جوبانىڭ نىسانالى اۋديتورياسى - جاستار.
«ءبىز «ناركوستوپ» جوباسىنىڭ تاپسىرىس بەرۋشىلەرىمىز. بۇگىن مەن سىزدەردى جاستارىمىز ءۇشىن سالاۋاتتى جانە ءقاۋىپسىز ورتا قۇرۋعا دەگەن ورتاق ۇمتىلىسىمىزعا ارنالعان وسى ماڭىزدى ءىس-شارادا كورگەنىمە قۋانىشتىمىن. بۇگىنگى ۇرپاق كوپتەگەن قيىندىقتار مەن قاۋىپكە تاپ بولۋدا، ولاردىڭ ىشىندەگى ەڭ ماڭىزدىلارىنىڭ ءبىرى ەسىرتكىنىڭ تارالۋى. بۇل تەك جەكە ادامدارعا عانا ەمەس، بۇكىل قوعامعا اسەر ەتەتىن، كوپتەگەن جاستاردىڭ ءومىرى مەن بولاشاعىنا بالتا شاباتىن ماسەلە»، - دەدى نۋرسۋلتان بەككايروۆ.
ونىڭ ايتۋىنشا، جاستار ساياساتى باسقارماسى بۇل زۇلىمدىققا قارسى كۇرەستە جاۋاپكەرشىلىكتى ءوز موينىنا الادى. «ناركوستوپ» جوباسى جاي عانا باستاما ەمەس - بۇل بولاشاق ۇرپاق الدىنداعى ولارعا ءقاۋىپسىز جانە سالاۋاتتى بولاشاقتى قامتاماسىز ەتۋ مىندەتتەمەسى.
بريفينگكە قاتىسقان «پسيحيكالىق دەنساۋلىق ورتالىعى» ديرەكتورىنىڭ ناركولوگيالىق قىزمەت جونىندەگى ورىنباسارى گۇلميرا ابدىبايەۆا وتكەن جىلى ناركولوگتاردىڭ ەسەبىندە 1100-دەن استام ادام بولعانىن حابارلادى. ونىڭ ىشىندە العاش رەت 276 ادام تىركەلسە، ولاردىڭ قاتارىندا 18 ءجاسوسپىرىم بار. ول اتاپ وتكەندەي، ورتالىق قالالىق اكىمدىك، ءبىلىم جانە قوعامدىق دەنساۋلىق ساقتاۋ باسقارمالارىمەن، سونداي-اق پوليسيا دەپارتامەنتىمەن بىرلەسىپ جۇزەگە اسىرىلاتىن ناشاقورلىققا قارسى كۇرەستىڭ كەشەندى جوسپارى جۇزەگە اسىرىلۋدا.
«سينتەتيكالىق پرەپاراتتار سوڭعى بىرنەشە جىلدا كەڭىنەن تارالىپ كەتتى. ناشاقورلار اراسىندا «سكوروست»، مەفەدرون جانە باسقا پسيحواكتيۆتى زاتتار كەڭىنەن قولدانىلادى. پاسيەنتتەرىمىزگە وتباسىلارىنا قايتا ورالۋعا، ولاردىڭ قوعاممەن ارالاسۋىنا كومەكتەسۋ ءۇشىن ءبىز الماستىرۋ تەراپياسىن قولدانامىز. بۇگىن وسى باعدارلاما بويىنشا بىزدە 29 پاسيەنت وتۋدە. ولار كۇن سايىن تاڭەرتەڭ كەلىپ، ءدارى قابىلدايدى. دارىگەرلەر مەن پاسيەنتتەردىڭ تۋىستارى بۇگىندە تەراپيانىڭ وڭ ناتيجەلەرىن كورىپ وتىر»، - دەپ اتاپ ءوتتى گ. ابدىبايەۆا.