الماتىدا ەسىرتكىگە ەلىككەن ەر ادام BMW كولىگىن ۇرلاپ كەتكەن، دەپ حابارلايدى اlmaty-akshamy.kz.
وبلىستىق پوليسيا مالىمەتىنشە، ۇستالعان ادام ەسىرتكىلىك ماساڭ كۇيدە بولعان، بۇل اۋىر زارداپتارعا اكەپ سوقتىراتىن جول-كولىك وقيعاسىنىڭ ءقاۋپىن ەداۋىر ارتتىرعان.
"الماتى-وسكەمەن تاسجولىندا جاريالانعان جوسپار اياسىندا اۆتوكولىك ۇرىسى ۇستالدى. اقپاراتقا سايكەس، الماتىدا بەلگىسىز بىرەۋ BMW ماركالى اۆتوكولىگىن ۇرلاپ، مەگاپوليس سىرتىنا ايداپ قاشىپ كەتكەن. پاترۋلدىك پوليسەيلەر قونايەۆ باعىتىندا جوعارى جىلدامدىقپەن كەلە جاتقان ۇرلانعان شەتەلدىك اۆتوكولىكتى بايقاپ ۇلگەردى. الماتى – وسكەمەن تاسجولىنىڭ 19-شاقىرىمىندا الماتى وبلىسىنىڭ ءتارتىپ ساقشىلارى جۇرگىزۋشىنى قۋىپ، توقتاتۋعا ماجبۇرلەپ، اقىرى ونى ۇستادى"، - دەدى الماتى وبلىستىق پوليسيا دەپارتامەنتىنىڭ باسشىسى باۋىرجان الەنوۆ.
مەديسينالىق ساراپتاما ۇستالعان ەر ادامنىڭ ەسىرتكى قابىلداعانىن راستادى. سونداي-اق، كۇدىكتىنىڭ قولىندا كولىك جۇرگىزۋ قۇقىعىن بەرەتىن قۇجاتتارى بولماعان. تاركىلەنگەن BMW كولىگىن ارنايى تۇراققا ورنالاستىرعان پوليسەيلەر كۇدىكتىنى جاقىن جەردەگى پوليسيا بولىمىنە جەتكىزدى. كولىكتى زاڭسىز يەمدەنۋ دەرەگى بويىنشا قىلمىستىق ءىس قوزعالدى.