قازاق كينو ونەرىندە ەسىمى ەلگە تانىمال رەجيسسەر جانە سەناريست ناريمان تورەبايەۆ 13 ناۋرىزدان باستاپ الماتىدا "كۇندەر" اتتى جاڭا ءفيلمىنىڭ ءتۇسىرىلىمىن باستادى.
تۋىندى ولىمگە اكەلەتىن اۋرۋ دياگنوزى قويىلعاننان كەيىن ءومىرىنىڭ تاس-تالقانى شىققان قاراپايىم ادام تۋرالى باياندايدى، دەپ حابارلايدى aqshamnews.kz.
ءتۇسىرىلىم جۇمىستارى ءساۋىر ايىنىڭ ورتاسىنا دەيىن جالعاسادى. نەگىزگى لوكاسيا - الماتى قالاسى. فيلم مادەنيەت جانە اقپارات مينيسترلىگىنىڭ قولداۋىمەن، سونداي-اق ۇلتتىق كينونى قولداۋ مەملەكەتتىك ورتالىعىنىڭ كومەگىمەن تۇسىرىلۋدە. كارتينا كەلەسى جىلدىڭ باسىندا تولىعىمەن اياقتالىپ، سودان كەيىن الەمدىك فەستيۆالدەرگە جونەلتىلەدى.
“بۇل ءوزىن-وزى جوعالتقان جاننىڭ تراگەدياسى. ول ومىرىندەگى بارلىق نارسەدەن ايىرىلىپ، وزىنە جاقىن ادامداردىڭ بارىنەن باس تارتقان. ولەر الدىندا ول مۇنى تۇسىنۋگە تىرىسادى، ءبىراق ساتسىزدىككە ۇشىرايدى. بۇل ادام بالاسىنىڭ ءوز باقىتىن جالعان زاتتارعا الماستىرۋى تۋرالى اڭگىمە”، - دەيدى رەجيسسەر ناريمان تورەبايەۆ.
كارتينانىڭ سەنارييى بىرنەشە جىل بۇرىن جازىلعان. تورەبايەۆ اتاپ وتكەندەي، كەز-كەلگەن رەجيسسەر، ءتىپتى ەڭ راديكالدى اۆتورلىق بولسىن، ءوزىنىڭ كينوسىن مۇمكىندىگىنشە كوپ ادام كورگەنىن قالايدى. سوندىقتان دا ول بۇل فيلم تەك فەستيۆالداردا عانا ەمەس، سونىمەن قاتار پروكاتقا دا شىعىپ، ستريمينگتەردە كورسەتىلەدى دەپ ۇمىتتەنەدى.
باستى رولدە بولات شانين، ال ەكىنشى پلاندا وتاندىق كينەماتوگرافتىڭ جاڭا جۇلدىزدارى - شۇعىلا ەشەنوۆا ("شەكەر. سوڭعى مۇمكىندىك")، شىڭعىس بەيبىت ۇلى ("جوشى حان. ۇلى ۇلىستىڭ ءامىرشىسى") جانە ەلجان تۇرىس («جاۋجۇرەك مىن بالا»).
“مەن ءارقاشان ءوزىمدى وسىنداي فەستيۆالدىق جوبالاردا سىناپ كورگىم كەلگەن، مۇندا ءسىز اسىقپاي جۇمىس ىستەيسىز، مۇندا بيزنەس ەمەس، شىعارماشىلىق ءبىرىنشى ورىندا. رەجيسسەردىڭ كوزقاراسى ۇنادى، ونىڭ اكتەرمەن ديالوگى بار. ءدال وسىنداي جوبالاردا اكتەر شىنالادى، وسەدى”، - دەپ اتاپ ءوتتى بەيبىت ۇلى.
ءفيلمدى تۇسىرۋگە تورەبايەۆقا ونىڭ تۇراقتى كومانداسى - وپەراتور ايدار مۇسابەكوۆ، كومپوزيتور عالىمجان سەكەيەۆ جانە قويۋشى-سۋرەتشى الەكسەي فيليمونوۆ كومەكتەسۋدە.
ەستەرىڭىزگە سالا كەتسەك، تورەبايەۆتىڭ الدىڭعى "ول شاينەكتى ساتىپ الدى" كارتيناسى قازاقستاننىڭ كينوسىنشىلار قاۋىمداستىعىنىڭ جىل سايىنعى "سىنشىلار تاڭداۋى 2024" سىيلىعىندا جەڭىمپاز اتانىپ، وندا ول "ۇزدىك رەجيسسەر"، "ۇزدىك مونتاج" جانە "ۇزدىك ساۋندترەك" نوميناسيالارىندا جەڭىسكە جەتكەن.