ق ر قارۋلى كۇشتەرى دەسانتتىق-شابۋىلداۋ اسكەرلەرىنىڭ قولباسشىسى گەنەرال-مايور الماز جۇماكەيەۆتىڭ باسشىلىعىمەن «مىزعىماس باۋىرلاستىق-2024» بىتىمگەرلىك كۇشتەردى كوماندالىق-شتابتىق وقۋ-جاتتىعۋعا دايىنداۋ جونىندەگى ەكىنشى شتابتىق كەلىسسوزدەر ءوتتى، دەپ حابارلايدى اlmaty-akshamy.kz.
وعان بەلارۋس، قازاقستان، قىرعىزستان، رەسەي، تاجىكستان مۇددەلى ۆەدومستۆولار وكىلدەرى، گەنەرال-لەيتەنانت رۋسلان شپەكبايەۆ باسقاراتىن بىرىككەن شتاب وفيسەرلەرىنىڭ توبى جانە ۇقشۇ حاتشىلىعىنىڭ قىزمەتكەرلەرى قاتىستى.
ءىس-شارا بارىسىندا وسى جىلدىڭ قىركۇيەك ايىندا الماتى وبلىسىنىڭ «جاعالاۋ» پوليگونىندا وتەتىن وقۋ-جاتتىعۋ اۋماعىنا بارلاۋ جۇزەگە اسىرىلدى.
تاراپتار وقۋ-جاتتىعۋدىڭ يدەياسىن، ۇقشۇ ۇجىمدىق بىتىمگەرلىك كۇشتەرىنە بولىنەتىن بىرلەسكەن قولباسشىلىق پەن ۇلتتىق كونتينگەنتتەردىڭ قۇرامدارىن، پراكتيكالىق ءىس-قيمىلداردىڭ ءتارتىبىن، سونداي-اق جان-جاقتى قامتاماسىز ەتۋدى ۇيىمداستىرۋ ماسەلەلەرىن قاراپ، كەلىستى.
ەكىنشى شتابتىق كەلىسسوزدەردىڭ قورىتىندىسى بويىنشا دەلەگاسيا باسشىلارى ءتيىستى حاتتاماعا قول قويدى.
ەستەرىڭىزگە سالا كەتسەك، ۇقشۇ-عا مۇشە ەلدەردىڭ بىتىمگەرلىك كونتينگەنتتەرىنە ارنايى دايىندالعان اسكەر، ميليسيا (پوليسيا) جانە ازاماتتىق پەرسونال، سونداي-اق ۇيىمعا مۇشە مەملەكەتتەر بولەتىن كۇش-قۇرالدار كىرەدى. ولاردىڭ جالپى سانى 4000-عا جەتىپ جىعىلادى.
اتالمىش وقۋ-جاتتىعۋ ۇقشۇ اسكەرلەرىنىڭ توپتارىن باسقارۋ ورگاندارى لاۋازىمدى تۇلعالارىنىڭ پراكتيكالىق داعدىلارىن ارتتىرۋ جانە ۇجىمدىق قاۋىپسىزدىك جۇيەسى قۇرامالارىنىڭ، كۇش-قۇرالدارىنىڭ ءىس-قيمىلىن ۇيلەستىرۋ ماقساتىندا وتكىزىلەدى.
قازاقستاننىڭ بيىلعى جىلى ۇيىمعا ءتوراعالىق ەتۋ كەزەڭىندە مالىمدەلگەن باسىمدىقتاردىڭ ءبىرى – ۇقشۇ-نىڭ بىتىمگەرلىك الەۋەتىن دامىتۋ.