2023 جىلى الماتىدا سوت ورىنداۋشىلارىنىڭ ورىنداۋىندا اليمەنت ءوندىرىپ الۋ تۋرالى 22 415 اتقارۋشىلىق ءىس جۇرگىزىلدى. ونىڭ ىشىندە اتا-انالىق مىندەتتەرىن ورىنداماعانى ءۇشىن 159 بورىشكەر اكىمشىلىك جاۋاپكەرشىلىككە تارتىلدى. بۇل تۋرالى وڭىرلىك كوممۋنيكاسيالار قىزمەتىندە وتكەن بريفينگتە الماتى قالاسى ادىلەت دەپارتامەنتىنىڭ وكىلدەرى ايتتى.
دەپارتامەنتتىڭ باسشىسى بالايم كەسەبايەۆانىڭ ايتۋىنشا، اليمەنت بويىنشا بورىشكەرلەر بالالارىن اسىراۋدان باس تارتىپ، ناقتى قارجىلىق مۇمكىندىكتەرى بولسا دا، تابىستارى مەن مۇلكىن جاسىرادى.
«ىشكى ىستەر ورگاندارىنا بورىشكەرلەردى قىلمىستىق جاۋاپكەرشىلىككە تارتۋ تۋرالى 133 ۇسىنىس جولداندى (ق ر بويىنشا 1242)»، - دەپ حابارلادى سپيكەر.
سونىمەن قاتار، بورىشكەرلەرگە قارىزدارىنا بايلانىستى رەسپۋبليكادان شىعۋعا 1328 ۋاقىتشا تىيىم سالىندى.
سونداي-اق، دەپارتامەنتتە جۇمىسسىز بورىشكەرلەردى جۇمىسقا ورنالاستىرۋ جانە كامەلەتكە تولماعان بالالاردىڭ پايداسىنا اليمەنت ءوندىرىپ الۋ بويىنشا شارالار قابىلدانۋدا.
«بورىشكەردىڭ تۇراقتى تابىسى مەن مۇلكىنىڭ بولماۋىنا بايلانىستى اليمەنت ءوندىرىپ الۋ مۇمكىن بولمايتىن جاعدايلار بار. وسىعان بايلانىستى، ءبىز جۇمىسپەن قامتۋ جانە الەۋمەتتىك باعدارلامالار دەپارتامەنتىمەن بىرلەسىپ بوس ورىندار جارمەڭكەسىن (8 جارمەڭكە) وتكىزۋ ارقىلى ولاردى جۇمىسقا ورنالاستىرۋ بويىنشا شارالار قابىلدايمىز، ناتيجەسىندە 780 بورىشكەر جۇمىسقا ورنالاستىرىلدى»، - دەپ اتاپ ءوتتى ب. كەسەبايەۆا.
الماتىدا الەۋمەتتىك ماڭىزى بار ساناتتاعى ىستەر بويىنشا بارلىعى 23 615 اتقارۋشىلىق ءىس جۇرگىزىلدى، اليمەنتتەن باسقا، بۇل جالاقى، زەينەتاقى جانە جاردەماقى ءوندىرىپ الۋ.
2023 جىلى دەپارتامەنت 230 بورىشكەرگە قاتىستى اكىمشىلىك قۇقىق بۇزۋشىلىق تۋرالى حاتتامالار جاسادى، 68 اكىمشىلىك قاماۋعا الۋ قولدانىلدى. بورىشكەرلەردى قىلمىستىق جاۋاپكەرشىلىككە تارتۋ تۋرالى 137 ۇسىنىس جولداندى.
الماتى قالاسىندا 24 مەملەكەتتىك جانە 288 جەكە سوت ورىنداۋشىلارى جۇمىس ىستەيدى، ولار جىل باسىنان بەرى 731 051 اتقارۋشىلىق ءىس جۇرگىزدى (608 441). ونىڭ ەداۋىر بولىگىن، 354 000-نان استام جاعداي (354 067) زاڭدى تۇلعالاردىڭ پايداسىنا ءوندىرىپ الۋلار قۇرايدى.