«اشىق قوعامعا – اشىق ارحيۆ» اتتى ءى حالىقارالىق مۇراعاتشىلار كونگرەسى قالاي وتەتىنى وڭىرلىك كوممۋنيكاسيالار قىزمەتىندە وتكەن بريفينگتە ايتىلدى. 19-21 قازان كۇندەرى الماتىدا 200-دەن استام ەلدىڭ مۇراعاتشىلارى باس قوسىپ، جەكە تاجىريبەلەرىمەن بولىسەدى، دەپ حابارلايدى اlmaty-akshamy.kz.
قازاقستان رەسپۋبليكاسى پرەزيدەنتى مۇراعاتىنىڭ ديرەكتورى ءاليا مۇستافينا مۇراعاتتىق مۇرا تاريحتىڭ نەگىزى، الەمدىك مادەني مۇرانىڭ ماڭىزدى قۇرامداس بولىگى ەكەنىن ايتتى.
«مۇراعات – ادامزاتتىڭ كوپ عاسىرلىق تاجىريبەسى مەن ءبىلىمىنىڭ قويماسى. بۇگىنگى تاڭدا دۇنيە ءجۇزىنىڭ بارلىق ەلدەرىندە مۇراعاتتاردى، تاريح قويمالارىن قورعاۋ جانە قولداۋ بۇرىنعىدان دا وزەكتى، ويتكەنى ول – تاريحي ءبىلىمنىڭ ىرگەتاسى بولىپ تابىلاتىن مۇراعاتتىق قۇجات»، – دەپ اتاپ ءوتتى ءا.مۇستافينا.
قازاقستان رەسپۋبليكاسى پرەزيدەنتى ءارحيۆى ديرەكتورىنىڭ ايتۋىنشا، مۇراعات سالاسىنىڭ ءداستۇرلى، كونسەرۆاتيۆتى ۇلگىسى جاڭا تەحنولوگيالاردى ەنگىزۋ جانە سيفرلىق اكتيۆتەر كولەمىن ارتتىرۋ ارقىلى سيفرلىق جۇيەدە باسقارىلاتىن زاماناۋي مۇراعات ۇلگىسىنە اينالۋى كەرەك.
«مەملەكەت باسشىسى بۇگىندە جاڭا قازاقستان جۇيەلى قايتا قۇرۋلار جولىمەن كەلە جاتقانىن اتاپ ءوتتى جانە كونگرەستىڭ «اشىق قوعامعا – اشىق ارحيۆ» تاقىرىبى قوعامىمىزدىڭ بارلىق سالالارىنا دەموكراتيالىق پرينسيپتەردى ەنگىزۋ ۇدەرىسىندە وزەكتى بولىپ وتىر. اقپاراتقا اشىق قولجەتىمدىلىك مۇراعاتتىق قۇجاتتاردىڭ قۇندىلىعىن ارتتىرادى»، - دەپ جالعاستىردى وكق سپيكەرى.
مۇراعاتشىلاردىڭ حالىقارالىق كونگرەسىن قازاقستان رەسپۋبليكاسى پرەزيدەنتىنىڭ ءارحيۆى حالىقارالىق مۇراعاتتار كەڭەسىنىڭ قامقورلىعىمەن ۇيىمداستىرعان. قازاقستان تمد ەلدەرىنىڭ ىشىندە ءبىرىنشى بولىپ الەمنىڭ 200-گە جۋىق ەلىنىڭ مۇراعاتشىلارىن بىرىكتىرەتىن يۋنەسكو قۇرىلىمى ۇيىمدارىنىڭ، حالىقارالىق مۇراعاتتار كەڭەسى باسشىلىعىنىڭ قولداۋىمەن جانە قاتىسۋىمەن كاسىبي مۇراعات قوعامداستىعىنىڭ ءىس-شاراسىن وتكىزىپ وتىر.
كونگرەسستى ۇيىمداستىرۋ مەن وتكىزۋگە قازاقستان رەسپۋبليكاسى مادەنيەت جانە سپورت مينيسترلىگى، قازاقستان رەسپۋبليكاسى سىرتقى ىستەر مينيسترلىگى، قازاقستان رەسپۋبليكاسى اقپارات جانە قوعامدىق دامۋ مينيسترلىگى جانە الماتى قالاسىنىڭ اكىمدىگى، سونداي-اق مۇراعات قىزمەتكەرلەرى: قازاقستان رەسپۋبليكاسىنىڭ ورتالىق مەملەكەتتىك مۇراعاتى قازاقستان رەسپۋبليكاسى ورتالىق مەملەكەتتىك كينوفوتوقۇجاتتار جانە دىبىس جازبالار مۇراعاتى، الماتى قالاسىنىڭ مەملەكەتتىك ءارحيۆى جانە ءال-فارابي اتىنداعى قازاق ۇلتتىق ۋنيۆەرسيتەتى قولداۋ ءبىلدىردى. فورۋم الاڭدارىندا ءارتۇرلى فورماتتاعى جانە مازمۇنداعى ءىس-شارالار ۇيىمداستىرىلدى، ولاردىڭ ادەتتەگى فورماتتاردان باستى ايىرماشىلىعى - سپيكەرلەردەن تىڭداۋشىلارعا، قۇرمەتتى قوناقتاردان ستۋدەنتتەرگە دەيىن بارلىق قاتىسۋشىلاردىڭ ينتەراكتيۆتى قاتىسۋى.
فورۋم قازاقستاننىڭ بارلىق ايماقتارىنان جانە 15 شەت ەلدەن 200-دەن استام قاتىسۋشىنىڭ باسىن قوستى.
حالىقارالىق ارحيۆتەر كەڭەسىنىڭ اتىنان باسپا ءسوز اتقارۋشى ديرەكتور كارلوس سەررانو ۆاسكەس قاتىسۋدا. حالىقارالىق ارحيۆتەر كەڭەسىنىڭ باسشىلىعى قازاقستاندىق مۇراعاتشىلاردى قولداۋ تۋرالى شەشىم قابىلدادى، ويتكەنى «اشىق قوعامعا – اشىق ارحيۆ» كونگرەسى سياقتى ءىس-شارالار وزدەرىنىڭ قاجەتتىلىكتەرى مەن ماسەلەلەرىمەن بولىسۋگە، سونداي-اق ىنتىماقتاستىق پەن قولداۋ مۇمكىندىكتەرىن انىقتاۋعا مۇمكىندىك بەرەدى.
«الەمدە كەيدە بۇرمالانعان جانە جالعان اقپارات وتە كوپ. سوندىقتان دا بۇگىندە ارحيۆاتەرگە ەرەكشە ميسسيا ارتىلىپ وتىر – ول سەنىمدىلىك پەن شىندىقتىڭ قاينار كوزى بولىپ قالۋ. بۇگىنگى تاڭدا بۇكىل الەمدە مۇراعاتتىق اقپاراتتى پايدالانۋشىلار سانىنىڭ جىل سايىنعى ءوسۋ ءۇردىسى بايقالادى. كونگرەستە ارحيۆ ءىسىنىڭ بەلگىلى وتاندىق جانە شەتەلدىك ماماندارى مۇراعات ىسىنە جاڭا تەحنولوگيالاردى ەنگىزۋ ماسەلەلەرىن كوتەرۋدە»، - دەپ ەسەپتەيدى ءا.مۇستافينا.
جاڭا تەحنولوگيالار نەگىزىنەن مۇراعاتتىق اقپاراتقا كەڭىنەن قول جەتكىزۋگە ىقپال ەتەدى، پايدالانۋشىلارعا مۇراعاتتىق قىزمەتتەردى كورسەتۋدى ساپالى جاڭا دەڭگەيگە كوتەردى، سونىمەن بىرگە ولاردى پايدالانۋدىڭ كەرىسىنشە جاعى دا بار، مۇراعاتتىق اقپاراتتى قورعاۋ ماسەلەسى دە وزەكتى بولا تۇسۋدە. بۇگىنگى تاڭدا سيفرلىق اقپاراتتى ساقتاۋ جۇيەسى كونسەپسياسىنىڭ نەگىزى قاجەت، سونىمەن قاتار ارحيۆتەر زاماناۋي IT ءبىلىمى بار جاڭا ماماندارعا وتە مۇقتاج. سوندىقتان فورۋمنىڭ ماقساتى – مۇراعات ءىسىن دامىتۋداعى تۇبەگەيلى جۇيەلى وزگەرىستەر بويىنشا ناقتى ۇسىنىستار ازىرلەۋ.
كونگرەسس اياسىندا ارنايى كاسىبي ورىنداردا مۇراعات ءىسىن دامىتۋدىڭ وزەكتى تەندەنسيالارى، مۇراعات ءىسىن جان-جاقتى جاڭعىرتۋ ءۇشىن بۇگىنگى تاڭدا قولدانىلىپ، ەنگىزىلۋى قاجەت جاڭا تەحنولوگيالار مەن قۇرالدار تالقىلاندى.